📖 ZKIZ Archives

繼eBay和雅虎拍賣後，最潮的拍賣網站是來自內地，由阿里巴巴集團持有的淘寶網。根據官方統計，每日有十五萬香港人在淘寶瀏覽，平均每日成交額達二百五十萬元人民幣。

大部分香港人上淘寶網都是為了買平貨，但有一批香港年輕人卻發現商機，打正香港旗號反攻大陸，閒閒地月賺十萬八萬。足球員轉行賣波鞋

世界盃來到最後階段，對幾乎晚晚睇波的司徒飛來說，可謂苦樂參半：苦的是愛隊阿根廷八強出局，樂的是淘寶網的生意急增三成。他在網上設置了世界盃專區，「單是世界盃版足球，已經賣咗成百個，阿根廷同西班牙的波衫亦一早斷市。」

司徒飛表示：「內地的正貨足球用品好貴，好似世界盃足球，香港賣九百蚊港紙，內地賣千一蚊人民幣。」而他在淘寶網只賣七百多元人民幣，難怪其門如市，「我都係從香港入貨，但係用批發價，所以普遍貨品都賣得平過香港專門店少少。」

車禍改變人生

他之所以有門路以批發價入貨，背後原來有段慘痛經歷。今年二十四歲的他，曾是職業足球員，十五歲便效力南華青年軍，但受傷多過落場，○七年更遇上車禍，「坐朋友電單車尾撞車，腳跟捲入電單車入面，從此無得再踢職業足球，前面條路突然無晒，人生好灰暗。」

只得初中學歷的他頓感晴天霹靂，父母迫他重返校園，但他不願，遂想起自己在○五年已開設了淘寶網戶口，「當初開戶係因為有朋友在內地體育用品專門店工作，可以用員工價買嘢，叫我幫佢哋轉賣出去，分番錢俾我。不過我只係當兼職，每個月最多賺幾千蚊。」

車 禍後，他惟有認真做起來，「其實足球用品喺內地並唔普及，大部分人踢波仲係著布鞋。」加上南華的教練見他因傷被迫退隊，心生憐憫，主動介紹相熟的足球用品 供應商，讓他直接在香港入貨，價錢比幫襯內地朋友的員工價更平，「我每星期帶一、兩次貨去深圳，每次十幾件衫，幾對鞋，銷售額有兩、三萬蚊。」

專揀熱門球隊

但 做生意始終在商言商，不能長久靠人可憐，故待規模漸增，他便主動爭取談判本錢，「我擔保買入某個金額的貨，條件係價錢要更平。」司徒飛表示每年買入近八百 萬元的足球用品到內地轉售，「主要係Adidas同Nike的產品，波衫就要選曼聯、阿仙奴、國際米蘭等熱門球隊，世界盃就入阿根廷、西班牙，少啲非洲球 隊。」惟偶爾也會有死貨，「好似上季利物浦表現差，波衫就賣得唔好。」大部分產品會從香港速遞到深圳，每星期亦派員工來港取貨兩次，「有時海關見我哋多 貨，會唔俾我哋過關，但唔會罰錢或充公。」

現時他透過淘寶網每月賣出近千件貨品，每月營業額約七十萬元人民幣，另外他還會把貨物轉售予內地球隊或足球員，因而每年大賺逾百萬元人仔。難怪他年紀輕輕，便手戴逾七萬元的鑽石勞力士，並在深圳設有兩個辦公室，請了十多名員工協助打理生意。

儘管已進身為老闆，惟他並未放棄足球，在深圳成立一隊業餘足球隊，還把足球夢寄託在細他七年的弟弟司徒富身上，「佢都踢緊南華預備組。」弟弟在南華的履歷，更被他放上淘寶網宣傳，自己則每週踢兩、三次衞生波。他表示世界盃後會到北京做手術，為腳傷作最後努力。

司徒飛小資料

年齡︰24歲

淘寶年資︰5年

淘寶評級︰四鑽石

銷售產品︰足球用品

每月營業額︰70-80萬元

每月盈利︰約15萬元

淘寶掘金步驟

1. 帶備身份證及回鄉證到內地銀行開戶口，以便日後收錢

2. 到淘寶網http://www.taobao.com免費登記

3. 填妥資料後會收到確認郵件，點擊連結便完成註冊，用戶同時已登記了與買家溝通的「阿里旺旺」，以及交收錢銀的「支付寶」

4. 登入淘寶網，在「我的淘寶」點擊「我要開店」

5. 用真名及身份證號碼為支付寶進行認證，並輸入內地銀行戶口，日後便能以該戶口收款

6. 下載阿里旺旺

7. 已可賣貨，但想吸引網民瀏覽，最好設有以下兩項：

消費者保障服務︰為消費者提供「假一賠三」等保障，申請後店鋪網頁有標記顯示，毋須收費，但要按金，金額視乎貨品種類而定，護膚品則為2000元人民幣

旺鋪︰令版面較為漂亮，每季收費150元人民幣，亦可直接幫襯功能較多的旺鋪拓展套餐，每月98元人民幣

歐洲水貨客轉戰國內

買波衫波鞋固然好賺，不過並非人人有門路入平貨，但原來像Joyce般到莎莎、卓悅買化妝品，再靠淘寶網轉售到內地，亦每月穩賺六萬元。

本週日，在三十三度的酷熱天氣下，Joyce拉着車仔到土炮護膚品店彩豐行掃貨，不消半小時已買了二千多元貨品，其後再轉戰莎莎及天使，「幫客買貨，一間搵唔到就要去第二間，有時要行五、六間鋪。」汗流浹背的她說。

零成本開業

她 每週掃貨四次，事前會多行幾間店鋪格價，「一件百幾蚊的貨，卓悅同莎莎價錢有時差幾十蚊。」掃貨完畢後，晚上將貨品拖到深圳拍檔的家中包裝，之後填寫速遞 表格，辦妥一切才趕返香港。她表示走走趯趯雖然辛苦，但勝在長做長有，「有啲內地朋友話我知四川、湖南啲商場，賣嘅化妝品比香港貴成倍。」

她 笑言這門生意原則上有賺無賠，且不用成本，因為客人在淘寶網付款落單後，她才入貨，故此無存貨問題，運費亦由買家支付。儘管自由行令內地人可隨時來港，惟 從湖南來港旅遊的郭小姐，亦表示經常在淘寶網買港貨，「雖然每次來港都買好多護膚品，但還是不夠用，在內地又怕買到假貨，所以會在淘寶找香港代購。」

走水貨出身

Joyce就像其他水貨客一樣，每日帶着大批貨品闖關深圳，即使遇到海關截查，也應付自如：「關員問點解帶咁多面膜，我咪話開美容班，要用咁多，佢又話要拉要罰，我咪扮傻話唔知囉，使驚佢，我嚇大o架！」

應付海關的經驗十足，皆因她中五畢業後便經常參加歐洲水貨團，○三年起更索性帶團做領導。她指走一轉手袋、手錶等水貨可賺十多萬元，惟風險極高，「試過有次辛辛苦苦運貨返到香港後，俾人爆格，成批貨無晒，唔見幾十萬。」

去年底，她發現身邊朋友經常幫襯淘寶網，細看之下見有人做香港代購生意，遂決定分一杯羹，不過單是內地人溝通的用語已考起她，「原來『秒殺』即係低價散貨、『性價比』係貨品功能同價錢是否成正比。」她遂找來朋友的內地妻子夾份開檔，她負責買貨，拍檔則負責與客人溝通。

寄貨連收據

幫客人代購指定護膚品後，Joyce按照香港專門店的正價發售，不過就收人民幣，「淨係匯率已經賺一成幾，加上店鋪時不時減價，好賣的產品我又會賣貴少少，加加埋埋利潤都唔錯。」在芸芸護膚品當中，最好賣的居然是彩豐行的產品，「大陸人好信香港品牌，而家有三成銷售額來自彩豐行。而且買滿一萬蚊面膜，每張半價只需五蚊，但我定價十蚊至十三蚊人民幣，所以每兩個月便一次過買二千張面膜。」

做 網上生意，最難是贏取客人信任，故她先要用香港身份證在淘寶上認證，網頁便會標明是香港商家；之後要每天花十多小時坐在電腦前，回覆客人問題；還將香港生 活照放在淘寶網上，大賣溫情兼港產。最重要是將每件貨的單據連貨寄給顧客，再用香港報章雜誌包裝，博取顧客信任，「不過會畫走個價錢，以免俾客人知我賺幾 多。」

Joyce小資料

年齡︰29歲

淘寶年資︰半年

淘寶評級︰四鑽石

銷售產品︰化妝及護膚品

每月營業額︰20萬元

每月盈利︰約6-7萬元

淘寶突圍四招

1. 用香港報紙及雜誌作包裝，令顧客相信貨源來自香港

2. 連發票及店鋪袋寄給客人，證明香港購買

3. 在網頁內上載一些香港照片及生活照

4. 送神秘小禮物，如買護膚品送試用裝

代購變零售

Joyce的生意可算手作仔，賺的都是辛苦錢。但自○五年已在淘寶搵食的Benny卻把生意企業化，成為首批在淘寶網發圍的香港人。「我太太住深圳，我成日上去探佢，索性做代購，每次都帶護膚品上去。」

他最初每星期帶貨三、四次到國內，三年之後已累積一萬個好評，月賺兩、三萬元。為了迅速增加好評，他不時搞促銷，「例如買滿一定金額有禮物送，仲會辦活動，好似客人買完產品之後，只要在我們網頁登幾張相及用後感，網民投票寫得最好的一個可獲價值六千蚊的LV手袋。」

Benny 認為評級對做淘寶生意有很大幫助，故恃着自己是評級最高的香港淘寶賣家之一，便轉型向內地代理取貨，「有好評同無好評做法唔同，好評多，人哋自然信我，我 唔使再寄張單證明係香港買。其實同內地代理攞貨，咪同香港買一樣。」但他的店名叫「香港網上自由行化妝品」，實有誤導之嫌。

由於一線產品難 攞貨，故他主力代理二線的化妝品牌，「好似大S之前出咗本美容書，介紹咗好多唔出名的護膚品，我哋好評多，就算產品唔出名，客戶都會信我哋介紹。」他請了 六個員工在網上招呼顧客，「全部受過一個月訓練，對每一種產品同護膚方法都好熟。」計及後勤包裝等員工，他請了十個人工作，「依家係薄利多銷，但唔使咁辛 苦囉。」

Benny小資料

年齡︰32歲

淘寶年資︰5年

淘寶評級︰四藍皇冠

銷售產品︰化妝及護膚品

每月營業額︰70-80萬元

每月盈利︰約7-8萬元

評級機制

在淘寶網上，每宗交易均可評級，好評加一分，壞評扣一分，再按分數分為心、鑽石、藍皇冠和金皇冠四級，每個級別的圖案越多，代表分數越高，獲五個相同圖案，即可跳升一級。

拉麵已經開到成行成市，自從一蘭的出現，曾經是風頭躉的拉麵店，如魂、達磨等，再無人龍，競爭進入「生死鬥」。在大坑呢？細細的一個小區，粗略估計有九十間餐廳，當中已有十多間食日本菜。但二十六歲的伍國泰（Alex）和伍志成（阿成）無懼競爭，「偏向虎山行」。去年十二月在大坑開設拉麵及串燒店「金之藏」，並「挑機」說：「我哋啲嘢係最好食嘅。」視對手為無物。開業七個月，暫時食住拉麵風，每月賺七萬至十萬元。他們更設下宏大目標：三年後有十八間分店，八年內集資上市，揚言：「只是把成功複製成功。」

本刊為此請來曾到日本留學，食盡香港拉麵及串燒店的多媒體作家健吾；及在元朗、大埔有三間分店的「串皇」老闆Wingo，分別試食及點評生意模式；發現這兩個老闆想向全港名店「挑機」成功，還有一點距離。

成和Alex同在台山出生，由細玩到大，來港後一個住石排灣邨，一個住華富邨。出身貧窮，令他們渴望發達，阿成說：「我細個見到一架紅色法拉利經過，我同自己講，第時一定要揸到佢。」Alex於中四暑假，走去做亮碧思香薰直銷，一個月賺幾萬蚊，其後更退學做全職，一年賺到四十萬。不過他漸漸發現，直銷令他眾叛親離：「我問自己，點解會無晒啲朋友，於是無再做，返去內地開餐廳。」最終不但生意失敗，更欠下一身債，回港到果欄送生果；惟恨發達的心，一直仍在。四年前，他與阿成見串燒熱，與幾個朋友合資於香港仔開設串燒店，後來業主加租，他們把其轉讓出去。

去年，他們見拉麵熱，又捲土重來，Alex說：「我哋見拉麵好hit，就想開間店。搵過好多地方，有次行去大坑睇吓，覺得呢度好舒服喎！到晚飯時間，呢度任何一間普普通通嘅茶餐廳，門口都泊咗名車，我就覺得有得做。」細問之下，這個前身本是車房的鋪位租金只需三萬多元，Alex和阿成便「扑槌」開「金之藏」，賣拉麵亦賣串燒，並「挑機」區內名店。

挑機一我哋啲嘢全區最好食

金之藏既非名店，亦無日本大師在背後發功，拉麵一碗五十至八十多元，毛利達八成；在開業前，阿成到札幌的拉麵店試食兼學師，「我哋啲拉麵係向日本供應商訂，豬骨湯每日加埋豬骨、豬手同雞腳，煲足八個鐘o架。」串燒方面，則主打澳洲和牛、法國鵝肝多士及廣島蠔，毛利最高達九成。「但係我哋其中一項主打龍蝦，賣九十八蚊一隻，毛利得一、兩成，有時海鮮價，來貨已經一百蚊，蝕賣o架，咪當拉上補下囉。」肉類主要向供應商取貨，而為求新鮮，蔬菜及海鮮，則由阿成或員工，每天到街市入貨。Alex指，現時鋪頭拉麵與串燒的營業額為三七之比。阿成認為拉麵及串燒雙線並行，是他們成功之道，「間間都只專門做一樣，我哋兩樣都有！」事實上，在金之藏開業之前，大坑區內已經有六間拉麵店及八間串燒店。阿成和Alex毫不擔心，開業前幾個月，經常到區內試食，認為自己的食物質素數一數二，Alex「寸爆」點評附近的串燒店「五谷」：「上次食完佢嘅燒和牛，食咗一塊就冇食，好失望；三個人，食咗六百幾蚊，都係得三成飽咋。」又指人氣拉麵店「達磨」：「已經笠晒水啦，你見邊有人排隊。」而對「拉麵來」在Openrice大坑區的好評一直高踞頭幾名，Alex則說：「我俾二萬幾蚊搵打手係Openrice寫好評，都可以排得高啲o架。」

「日本達人」健吾食咗一個月嘅鹽

曾到日本留學的多媒體作家健吾，是拉麵及串燒痴，食盡香港名店，他試食金之藏後說：「叉燒同竹筍都算好食，不過麵底似吉之島貨色，札幌拉麵本身已經偏鹹，呢度嘅湯底仲鹹，都可以話正宗嘅，不過喺香港又熱又焗嘅環境，如果唔係鼻塞加飲咗酒，根本食唔落。一碗好食的拉麵，湯底用嘅水最重要，但好多店鋪都係用番普通香港的水（編按：達磨等拉麵店會把湯底用的水先過濾），所以做唔到日本嘅口味。」而阿成和Alex「傲視同行」，拉面、串燒，並駕齊驅，更反成敗筆：「串燒價錢同水準都合理嘅，龍蝦肉質彈牙，青椒夠juicy；雞翼好味，但其實燒雞翼好難唔好味喎！呢度食串燒，一個人埋單三百元，但我去米芝蓮餐廳食一餐，可能都係差唔多咁嘅價錢。我覺得阿成同Alex未夠了解自己店鋪嘅食物，拉麵同串燒分開食還可以，但拉麵又鹹，串燒又鹹，我兩樣都食，好似將一個月要食嘅鹽一次過食晒。」

挑機二三年開十八店

記者觀察，在大坑內的達磨及拉麵來等食店，於下午六時已開始滿座，而這個時間，金之藏仍未有客，直至七時多，客人才開始入座，十八個位尚能坐滿，但未見人龍。金之藏的員工亦比較熱情，記者見他們會走出門口，甚至往對面街主動拉客，這做法與其他著名食店，食客慕名而來的情況截然不同：「我哋印咗二千幾張卡片，兩個月派晒喇。樓上好多街坊都嚟食，我哋俾八折o架。」Alex每個月都會為店鋪定下約廿萬元營業額作目標，如能達標，樓面經理和廚房均能夠按比例獲得分紅，在底薪上，每月再多幾千元佣金。而樓面員工則聘請十八、廿二的年輕人，貪他們夠活力。開業七個月，鋪頭曾月賺十萬、八萬，今個月則回落至七萬元。還未回本，Alex和阿成又以月租三萬多元於西環厚和街開分店，阿成說這樣做是：「成功複製成功。」記者曾到厚和街看過，雖然同街有甜品店發記及幾間食店，但人流明顯較大坑少，但阿成及Alex卻有信心會成功，他們說：「呢度已經係成功，（點成功？）好食囉！我哋所有成功的因素都集合，一定可以在其他地方取得成功。」兩人更計劃於一年內在港島區開四間分店，三年內變成十八間，野心之大，難免令人覺得痴人說夢。Alex則說：「我已經計劃好晒自己未來嘅砌圖，而家只係逐塊逐塊砌上去。我從無諗失敗，淨係諗點樣贏！」

「串皇」Wingo現實歸現實

有三間串燒店的「串皇」Wingo，以過來人身份評這盤生意，未感樂觀：「我做咗十幾年，都係得三間鋪，其中有兩間喺元朗，相隔只係一條街，客路已經爭好遠。第一間客人肯企喺門口食，第二間要放啲櫈俾佢哋坐先得。第一間店有成功，第二間係咪一樣用同一條formula呢？去大坑食嘢嘅人，預咗使錢，幾十蚊一碗拉麵無問題，但西環呢一帶，幾十蚊可以食到一個牛排，你喺呢度六十蚊先得三粒和牛。「樂觀係無錯，但理想歸理想，現實終究係現實，生意唔會全部順風順水。有啲珍珠奶茶店一次爆十間，唔夠兩年咪無晒，佢哋應先做好一間，而家味道偏鹹，可以再改善。第二係培訓員工。我有啲仔同事，噚日好有熱誠，今朝就打俾我話唔知醒。阿成話請人無問題，樂觀太早了！另外，如果要開咁多分店，仲要諗開工廠，中央處理啲食物。」
老闆回應

做生意講求天時、地利、人和， Alex和阿成食正拉麵熱，加上扑中大坑這個地利，每個月盈利可達七至十萬元，但能否成功，最終還靠他們的管理及態度；聽過健吾及 Wingo的意見，阿成虛心表示會改善食物質素，「我哋遲啲會將湯底改淡啲，啱番香港人口味，所以西環新店會俾客人揀湯底。」至於 Wingo擔心他們擴充太快，阿成回應說：「佢有佢成功之道，但每個人睇法唔同，我哋開店前都做足資料搜集，始終要開順咗先知。」對於前輩意見，啱聽才聽，二人最終仍想在拉麵界挑機。