霍格華茲同學會《哈利波特》電影五周年 演員去哪兒
1 :
GS(14)@2016-07-09 07:02:13唔經唔覺，電影《哈利波特》系列最後一集《哈利波特─死神的聖物2》（ Harry Potter and the Deathly Hallows： Part II）上映至今已經係第五年，五年之間唔少花咗10年拍呢部電影嘅童星已各有去向，有啲繼續喺影圈發展，有啲就冇再拍戲，以下落嚟同大家報告一下哈利波特嘅同學仔（同敵人）嘅去向。1.哈利波特（Harry Potter）26歲嘅英國男星丹尼爾拉德克里夫（Daniel Radcliffe）喺影壇仲喺好活躍，香港觀眾不時見到佢嘅消息。佢嚟緊會喺怪雞新片《Swiss Army Man》扮演會放屁嘅死屍。2.妙麗格蘭傑（Hermione Granger）26歲嘅英國女星愛瑪屈臣（Emma Watson）亦都係依然好活躍，佢嚟緊會喺真人版《美女與野獸》扮演貝兒，佢亦係聯合國大使，為爭取女性權益好落力。3.榮恩衛斯理（Ron Weasley）27歲嘅英國男星路柏格連特（Rupert Grint）自從飾演完榮恩後，拍嘅戲都係偏向輕鬆搞笑，佢最近拍緊一部叫《Sick Note》嘅黑色幽默電影，會於2017年上映。4.奈威隆巴頓（Neville Longbottom）27歲嘅英國男星Matthew Lewis越大越有型，佢不時拍電影同電視劇，喺新片《遇見你之前》（Me Before You）係第二男主角。5.張秋父親出生於香港嘅梁佩詩現年28歲，佢拍完《哈利波特》之後都有繼續演戲，佢現時忙於拍新片《The Foreigner》，有成龍及皮雅斯布士南（Pierce Brosnan）參演。6.花兒戴樂古（Fleur Isabella Delacour）呢位讀波巴洞魔法學校嘅花兒由法國女星Clemence Poesy扮演，Clemence現年33歲，近年喺英劇《The Tunnel》做女主角。7.跩哥馬份（Draco Malfoy）28歲嘅湯費頓（Tom Felton）最近都幾忙吓，拍攝緊電影《 Stratton: First Into Action》、《Megan Leavey》之外，嚟緊又會參演美劇《閃電俠》（The Flash）。8.維克多喀浪（Viktor Krum）呢位保加利亞魁地奇代表隊的搜捕手係由保加利亞男星Stanislav Ianevski扮演，現年31歲嘅佢拍完《哈利波特》就冇乜演戲，拍過兩三部電影，現時留有長鬍鬚。9.葛果里高爾（Gregory Goyle）28歲嘅英國男星Josh Herdman於戲中扮演馬份嘅跟班，大大隻好霸道，佢拍完《哈》就冇乜再演戲，最近轉行做MMA選手!10.柯林克利維（Colin Creevey）呢個哈利波特嘅小粉絲唔再係瘦弱小男孩，呢位英國男星Hugh Mitchell現時27歲，留有長金髮，喺電視劇《The White Queen》、《Holby City》等演出，為人比較低調。11.露娜羅古德（Luna Lovegood）現年24歲嘅愛爾蘭女星Evanna Lynch拍完《哈》片後不時都會接電影拍，亦有為《哈》環球影城活動做宣傳，所以大家不時見到佢出現。12.金妮衛斯理（Ginny Weasley）25歲嘅邦妮賴特（Bonnie Wright）都好少演戲，佢轉咗做幕後執導，嚟緊佢會執導一部《Medusa's Ankles》嘅電影。13.弗雷及喬治衛斯理（Fred& George Weasley）呢對榮恩嘅孖生哥哥由英國孖生男星James及Oliver Phelps扮演，佢哋已經30歲，不過依然好動，不時喺instagram上載好跳跳紮嘅相，不過佢哋已經好少演戲。14.西追迪哥里（Cedric Diggory）30歲嘅羅拔柏迪臣（Robert Pattinson）拍完《哈》就去咗拍另一賣座電影系列《吸血新世紀》（Twilight）扮痴情吸血鬼，迷倒萬千少女，不過佢最近人氣大跌，因為冇乜代表作。15.西莫斐尼干（Seamus Finnigan）27歲嘅愛爾蘭男星Devon Murray喺電影扮演哈利同榮恩室友，佢拍完《哈》後都冇再拍電影，佢最近捲入官司，被前經理人指控佢欠付管理費，追討21萬英鎊（約210萬港元）。
來源:
http://hk.apple.nextmedia.com/entertainment/art/20160709/19688155