2010-8-15 AD
|
||||||
|
每月大食會輪到 左丁山請客，請幾位老友去上海總會食火丁甜豆、茶葉燻雞、龍鬚桂魚、小籠包等等，個個話正，連聲讚好，談話談到興高彩烈，但係基金Ｆ就冇免費晚餐咯，人人 要問佢對地產嘅睇法，呢位地產大好友已經對我哋唱好地產兩年以上，呢晚繼續唱好，理由好簡單啫，市區豪宅供應不足，利息低到極，而需求湧至，價格冇法子唔 升。我哋就知道供應不足啫，需求就唔敢肯定噃，只知道以局長薪水嚟供豪宅，局長也會斷擔挑。基金Ｆ話：「照我所知，世界大金融機構陸續調人嚟香港，一啲大 牌明星都會嚟，例如global head（環球主管）之類呢個級數嘅人馬過往為咗社交生活，文化生活，只肯由倫敦搬去紐約，或者紐約搬去倫敦，但今年有變化嘞，英國狂加稅至50%，再加 上花紅稅，令呢班人好惡頂，而紐約嘅稅務環境亦不友善，所以佢哋想搬到亞洲。亞洲只有兩個城市好揀，一係新加坡，一係香港，想做大陸生意嘅就以香港為首選 啦。」原來如此，除此之外，又有傳說話華爾街大行受金融改革法案影響，會分拆炒賣業務，部份搬來香港經營。 凡有環球主管級人物遷港，隨之而來嘅職員起碼十幾人，滙豐紀勤來港辦公，就有幾十人從倫敦跟埋過嚟。呢批人係要住半山豪宅嘅啫，故此基金Ｆ繼續睇好豪宅市道，市區（特別係港島）住宅價錢有倫敦化嘅趨勢（倫敦靚屋係畀外國人住嘅，英國普通打工仔住唔起）。 不 過如果真係因為倫敦高稅率趕客，金融界人士來港定居的話，本港有三方面要加緊改善至得，第一係空氣質素，第二係國際學校學位，第三係文化生活。第一項要望 天打卦，七月份香港有藍天白雲，空氣合標準，到咗八月又唔掂嘞；第二項就兩睇，英國哈勞學校（Harrow School）到屯門開學，可以吸引倫敦銀行家子弟。第三項呢，西九快啲上馬啦，西九真係能夠成為香港West End嘅話，香港一定可以爭贏新加坡。 |
||||||
|
||||||
|
錯過了機會總有命運在前 今天你又要花多少錢 經由此去在大富翁棋盤上兜圈 時 裝店不是便利店，用來買水買煙買雜誌，毋須有事才登三寶殿，得閒入去行一轉、兜個圈，睇下有咩新貨返，已是香港人幾十年來天天上映的指定工餘場節目，要準 買家不會空手而回，時裝店的板斧不外乎貨真價實衫要靚，服務環境氣氛要三好，一間間轉攻網上大展鴻圖的E-shop又要使出什麼法寶叫人一click到尾 直落到check out？ 開鋪先求名與地，係人都知網址愈短愈好愈易記，但好的域名難求，易記不如易找，以下提及時裝網店常見最趕客的十個錯誤…… 一‧任憑你實鋪面積上萬呎，網店大小最終仍得由用家的屏幕和解析度決定，別以為失驚無神來一個full screen便會好行得多，須知人家網購的同時也一心多用，轉身就走非罕見之事，一擊關網冇回頭，更容易。 二‧切勿幾件幾件上，買衫不同買畫，時裝精、心水清，一目十行，毋須逐件鑑賞。 三‧ 縮圖要清，大圖要靚。妃嬪三千，有幸得寵的，梗係要睇得清楚，不強求360度迴旋也起碼要前後兩面加局部大特寫，可以放大見到衣裝布料的紋理為準。網購已 少了手感這項重頭戲，不會可愛到以為得張300×400像素就會引到人落疊嘛？有的還加上水印，視覺上更殺風景。做得生意就大方點，俾人偷圖事小，失客事 大。 四‧摸不到的平面一件，不夠睇頭，找模特撐起是好，但要是由衣不稱身的素人來演繹，就變成叫平庸大眾感同身受的反面教材。 五‧提到尺碼，憑字母當試身，世界上除卻SML外，如果沒了0246和3579的對照，46與38二人的身份換掉，圓滿的掌握問誰可以，英美歐日衫碼鞋碼的對換表又怎可能缺少？ 六‧好嘞，好嘞，搞搞震又真係有幫襯，要放入購物籃嘞，但客人來自四海，你這邊用歐元結算，對方可能先開始計數，你的電子商貿系統呢？那個叫「貨幣換算器」的功能放了在哪裡？ 七‧俾錢啦，咦，原來寄往歐盟以外的地區可以自動扣除VAT 20%喎，即是當打個八折，好比頭條新聞咁重要的消息點解唔早講？置頂都唔會？傻懵笨鈍蠢，呢樣又係邊類？ 八‧有些店反互聯網特性而單做本土生意，如「no shipping outside USA」或「日本國內,限K?9」等沒所謂，不過請早揚聲，別敗有心人用Google翻譯上你店的興呀。 九‧OK，識時務者為俊傑，連非洲岡比亞或接近北極的斯匹茲卑爾根群島也肯寄，祝你生意興隆外，記得給收件人一個郵件追查的號碼。係囉，點解呢間E-shop又係唯獨香港唔寄嘅？收手啦，枯枝！ 十‧其實還有十一二三四，不過寫得太長氣便不好看，何況這不是給你網店免費的意見書。但這一點必要記住，我訂閱貴店的電子報無非圖個方便，得知大減價和新貨到的日子，不代表你需要幾封電郵一天來，日日請食spam，不要逼我在unsubscribe與block之間取捨。 作者：小奧 小時了了，最愛寫小說寫詩，惟腦閉塞，後勁不繼，遠走挪威，隱姓換名，老來上網為樂，以博客「小奧私陸」作巢。 微博網址：http://t.sina.com.cn/littleoslo‧http://www.littleoslo.com i am a thing-finder, and when you're a thing-finder, you don't have a minute to spare |
||||||