T.O.P大麻案罰款不足百元網民：買份炸雞都唔夠
1 :
GS(14)@2017-07-05 03:49:39韓國天團BIGBANG嘅29歲成員T.O.P，本月初被爆去年10月喺自己屋企吸食大麻，上周四T.O.P就大麻案件喺首爾中央地方法院刑事8單獨庭進行一審，T.O.P喺現場再度就事件道歉，並表示：「過去嘅日子我深深為今次嘅失誤進行反省，我太愚蠢，真心向呢段時間因為我錯誤嘅行為而令受困擾嘅人、對我感到失望嘅人道歉，無論咩刑罰都會接受，並承諾今後唔會再發生呢啲事。」由於T.O.P喺庭上承認前後吸食四次大麻，所以檢方要求判10個月有期徒刑，緩刑兩年，以及1萬2千韓圜（約80港元）嘅罰款，最終判決喺今個月20號進行。不過一審結束後，唔少網民對於T.O.P只須交不足百港元嘅罰款，令到唔少韓國網民都難以置信，更留言話罰款不足以喺韓國購買一份炸雞。當中網民指喺韓國購買一份炸雞須要萬六元韓圜(約108港元)，但T.O.P食大麻嘅罰款竟然比炸雞仲平，令到佢哋覺得個判決好唔公平，不過根據韓媒報道，根據韓國嘅法例，吸毒者被捕後會被充公毒品及有關用具，如果冇沒收就會以相當價值嘅罰款代替，而檢方嘅罰款就係依照韓國嘅大麻市價，一支大麻為3千韓圜(約20港元)，因T.O.P前後吸食大麻四次，所以只須支付1萬2千韓圜嘅罰款。
來源:
http://hk.apple.nextmedia.com/entertainment/art/20170703/20077011