陶傑日前講到港英時代行政局非官守議員，係因時代需要而特別用人，例如工業興旺時期任用「鍾士元、唐翔千、安子介等等」大工業家。陶傑所言甚是，不過左丁山有少少修正，唐翔千（唐英年父親）為人低調，富而有禮，甚少在公眾場合露面及擔任政府公職。上世紀五六十年代至七十年代中期，香港係輕工業高速發展時期，先以紡織業為主，後有電子業接上，故此幾十年前嘅行政局議員之中，有一位唐炳源（字星海）先生，在聖約翰、清華、MIT受教育，係無錫唐家望族後人，高唐翔千一輩。唐炳源之公子係唐驥千，孫兒唐裕年，唐翔千係佢嘅堂姪。因唐家與錢穆先生同是無錫人，唐炳源先生大力支持農圃道時期嘅新亞書院，係新亞校董會主席，又捐錢三百萬元興建中文大學圖書館，曾經有不少新亞經濟工管系學生畢業後就到荃灣南海紗廠工作（今麗城花園原址）。
當年港英搵行政局議員，明刀明槍係官商勾結，英資滙豐，怡和嘅大班係「當然成員」，華商大亨如周埈年爵士、周錫年爵士、馮秉芬爵士、簡悅強爵士等分階段入局，至到後來有新興電子業，先至輪到鍾士元及更年青嘅李鵬飛入立法局，太古彭勵治及鄧蓮如在七十年代中之崛起，其實與怡和老早部署遷冊有關，港英索性傾向另一大英資財團。行政立法局內之非官守議員全是港督委任，自然聽話到極，加上佢地代表晒英資華資財團之經濟利益，行政局傾掂嘅政策，出面邊會有人反對㗎！
唐翔千雖然冇入行政立法兩局，但佢間公司（由唐家與周文軒家族佔大部份權嘅南聯實業）嘅高層職員安子介（董事）成為兩局議員，且成為貿發局主席㖭，安子介後來收咗一位徒弟，就叫做梁振英，所以前年特首競選活動時期，曾經有人講笑話，唐家掌櫃嘅徒弟仔出來挑戰唐家大官！
世界就是這樣的挪移，沒甚麼規則。南海紗廠已改組到不知去向，很多香港人已不認識唐炳源與唐驥千，香港當然亦沒有了大紗廠、染廠，（現愉景新城就是查家中國染廠的舊址），特區政府的行政會議成員再沒財團大班，沒有大老闆出來講話支持政府，入面啲專業人士根本對香港經濟運作毫無影響，第一謀臣張震遠已成大笑話，點樣支撐一個行政主導嘅政府喎！ 