| ||||||
當紅退出,過埠嫁到美國的葉玉卿,老公胡兆明經營超市、銀行生意、住堡壘、出埠坐私人飛機,十六年富泰少奶奶生活,表面十足風光。奈何老公近年生意逆轉,債主追數,私人飛機被扣押,三間大屋要拍賣還債,投資的上市公司全線仆晒,負債億億聲。處於財困懸崖,45歲的葉玉卿焗住復出拍戲,重投捱更抵夜的生活,為財赤的肥Jeff撲水出點力。 超市吊緊命 復出拍賀歲片,卿卿打定底,事先張揚接戲非因老公胡兆明經濟有問題。曾經誇口身家有八十億,今日仍強調身家豐厚:「依家使極都係面嗰層!」事實卻另一回事。在紐約華人圈子,早已盛傳胡兆明唔掂。過往經常坐私人飛機出埠的卿卿,今次與女兒及老公返港坐民航機,富泰不再。據知,胡兆明在美國的家族生意「香港超市」,被來自溫州及福州的投資新移民所開設的大型連鎖超市夾擊,生意大幅下滑,八間分店處於吊命狀態。網上盛傳,「香港超市」拖住批發商唔少數未清,又指胡家只佔超市百分之四十,並非如外間所指,超市由其家族全資擁有。至於○六年大鑼大鼓開設的「United International Bank」(國際銀行),在當地亦只屬蚊型銀行,據悉銀行有多位合夥人包括議員,胡兆明只是其中一名小股東。「卿卿老公經濟有問題,喺New York華人圈子已經唔係秘密。其實胡兆明娶卿卿前只係個普通生意人,後來卿卿用自己啲私己錢同佢一齊投資房地產,啲身家先愈滾愈厚。但近年美國經濟唔好,超市生意競爭好激烈,佢哋雖然係老品牌,但規模始終太細,唔夠人撼,無咩錢賺。 上市公司停牌 「外面啲人以為佢哋有米到買私人飛機周圍去,查實胡兆明係同個外籍鄰居一齊開咗間公司,專回收舊私人飛機,翻新再賣出去;有時仲會飛架機去啲發展中國家搵買家,遇到呢類business trip,就順便帶埋妻女一齊玩,情況就好似回收車場老闆,攞啲車揸吓咁。「○八年金融海嘯嗰陣,胡兆明身家大縮水,之後啲生意又唔掂,好似同台灣人合作,其中有間佢佔一成股份、做網上旅行社嘅上市公司『Joystar』仲破埋產。老公手緊,所以卿卿今次返香港都唔係坐私人飛機,更何況機票錢係電影公司俾!」知情者透露。卿卿老公瓣數多,除超市、銀行外,○○年胡兆明注資西雅圖生產電腦軟件的Detto,但生意一鑊泡,Detto股價近日更跌至變仙股。另外,他任大股東兼總裁,○三年在納斯達克上市的「Yifan Communications」,同樣因無業績,甚至連年度、季度報都欠奉,到○九年終被除牌。 一鑊泡錢債官司纏身 葉玉卿自誇老公胡兆明身家80億,但受08年金融海嘯打擊,名下的飛機公司、地產公司,甚至個人分別被入稟追債。其名下飛機公司Wu Air Corp被Texas1845 LLC追討1,900多萬美元欠債(index no:3202/2011),債主甚至派人扣起其中一部飛機。房地產公司Lucky Star Realty Hicksville LLC和他本人,被另一債主FCOF UST Indigo LLC入票追討686萬美元欠債(index no: 012195-2010),要求拍賣三間位於長島的Hicksville商廈物業。另一宗私人債務(index no: 7122-2011),葉玉卿同列被告,被債主前妻Kimberly入稟追討100萬美元,胡兆明只歸還10萬美元,法庭下令葉玉卿胡兆明須歸還餘下90萬美元。 投資損手Joystar Inc 06年以0.59美金入股,佔10%的Joystar Inc網上旅行社,由於經濟不景,於08年12月破產,損手離場。 Yifan Communications Inc 由胡兆明擔任主席,03年持有提供軟件服務的網上Yifan Communication Inc上巿公司,由於未能遞交年度及季度報告,被美國證監除牌。 Detto Technologies Inc 00年注資成為大股東,以生產電腦軟件為主的Detto Technologies Inc,由於業績欠理想,成為仙股公司。 三物業拍賣 有資料顯示,緬甸華僑胡兆明原名:Myint J.Kyaw,又名:Jeffrey Wu,過去上身的官司至少有三宗,均與欠債有關。其中一單是名下的回收私人飛機公司,因向另一公司分別借貸,合共一千九百多萬美元,以兩架私人飛機作抵押,最後沒有如期還錢,○六年遭對方告上法庭,由於對方自行揸走其中一架用作抵押的飛機,胡兆明的公司於是反告對方,這場民事案,足足打了六年,訴訟費龐大,令經濟危危乎的胡兆明大傷元氣。至於另一欠債官司,是原告指胡兆明欠債唔還,向法庭要求將他的三個物業拍賣填債。今年三月,當地傳出卿卿老公放聲氣,要將於○○年斥資約四千萬港元買入,位於紐約長島,佔地十二畝的百年古堡莊園愛巢,以八百萬美元出售,套現填氹,但因美國經濟太差,暗盤放售至今,無人問津。 吹大豪宅價值 葉玉卿曾向傳媒聲稱,丈夫斥資五億五千萬港元於紐約華人區Flushing興建商住兩用大廈Victoria Tower,但09年落成後銷情淡靜,直至今年四月始全部售出;據紐約田土廳對該大廈的估價是1,370萬美元(約1億660萬港元),與卿卿聲稱價值有極大距離。此外,田土廳資料顯示,胡兆明於10年將大廈分別向中國銀行和兆豐銀行借貸3,100萬美元,今年一月再向Quontic Bank按揭100萬美元。而他名下的另一棟位於Flushing的大樓,亦抵押給銀行借款600萬美元。 親自拉客售樓 卿卿老公唔掂,家庭成員先後出事,其兄胡兆林於美國開設的「金僑酒家」,在○八年金融海嘯後倒閉瀕臨破產;胡兆明自顧不暇,無力出手!一向為頭家仆心仆命的卿卿,不時身體力行,出手救夫。○九年,以長女Victoria名字命名、位於紐約Flushing的相連十九層商住大廈落成,卿卿不顧身勢,親落在售樓處拉客。「塊地係卿卿用私己,同老公一齊買返嚟,之前租咗俾間大型餅店,○五年收番,由起樓到落成,佢哋向銀行做咗四、五次按揭,借咗幾億。點知撞正經濟唔好,Victoria Tower嘅單位去得好慢,好多人都親眼見過卿卿喺售樓處親自sell客,啲單位前後用咗幾年先賣得晒!其實之前超市唔夠人撼生意唔好,卿卿已經成日喺超市打躉,幫老公吸客。」知情者說。 七萬養胞兄 九六年引退,嫁到美國的卿卿,將在港物業變賣,抬住七百多萬(港元)私己,助夫開拓事業,在美國買地買屋保值。眼見老公陷入困境,離開影壇十六年的卿卿決定復出,雖然今次俾面曾志偉,復出價只收百零萬,誠如卿卿所言,一部電影片酬,對她老公生意上落銀碼微不足道,但更重要是試水溫,錢其次,重新活躍娛樂圈,借自己的知名度助老公開拓商機,卿卿亦放定聲氣,自稱拍出癮,不排除繼續接戲。「當年胡兆明都因為有個出名老婆,換來好多機會。卿卿想賺嘅係名氣,方便識多啲人,片酬就當幫補仔女讀書同養娘家;就算幾唔掂,佢仍然每月俾七萬蚊家用養阿哥(前飛圖老闆葉志銘),以前佢係名店VIP,個個月都入貨,但近年老公唔掂,佢已經絕跡名店半年,寧願慳自己。」知情者說。 光輝隱退 85年,葉玉卿以第一屆亞洲小姐季軍進入娛樂圈,在亞視六年,先後跟歌手張立基、伍衞國拍拖,事業卻無甚起色。91年,身材豐滿的卿卿把心一橫拍三級片《情不自禁》,結果一脫成名成為搶手女星,片酬高峰達一千萬。有身材有腦的她,兩年後開始轉型,接拍文藝片《天台的月光》以及《紅玫瑰與白玫瑰》,更因而獲提名最佳女主角及女配角。93年,踩多瓣以性感女神形象出唱片做歌手,首本名曲《擋不住的風情》頻頻獲獎。96年,卿卿在飛機遇上美籍華裔商人胡兆明,並決定退出嫁到美國,現育有兩子一女。 |
| ||||||
農曆年,電視收視慣性偏低,但「創意無限」的無綫非戲劇製作總監余詠珊,卻一於少理,學習強國大台,於年廿九(二月九日)搞春節晚會《新春黃金慶典》,並且玩埋港、台、韓三地聯播。自知資源牙力有限,未必請得郁一班早已被國內春晚活動落釘mark實的阿哥阿姐,余詠珊於是氹掂月底返港做賀歲電影宣傳的葉玉卿,捱義氣預錄,為她一手策劃的山寨版春晚打定底!高層撐華姐讓路 以往慣例,無綫一年一度的《國際中華小姐競選》例必在農曆新年前搞掂,但今年則延期至二月二十四日舉行,雖然外傳是搵唔夠贊助商有關,但其實另有原因。原來余詠珊執意要在年廿九(二月九日)舉行一個香港、台灣、韓國三地聯播的春節晚會,要《華姐》讓路,空出人手及資源。「農曆年香港人鍾意出埠避年,rating(收視)一向都唔好,Sandy(余詠珊)氹掂公司推遲做《華姐》,又爭取到一大嚿錢做預算,部分環節仲要飛外地做,好落本。」一名無綫幕後人員透露。 卿卿俾面志偉 港姐公投成為笑柄,在無綫受到「特別保護」的余詠珊,地位絲毫不受影響,繼續搞作多多。雖然未全面落實春晚節目的內容,但她已預先氹掂今個月底返港、為賀歲電影做宣傳的葉玉卿,為春晚錄定一part節目。「咪又係志偉出面搞掂,佢一句幫幫手,卿卿就一口應承,連價都冇講,剩係收封利是仔!」即使官非纏身,但據知有份孭重飛的曾志偉,未有叫停飛往外地做春晚錄影的計劃,至於飛韓國定台灣,稍後才有最後決定。「志偉星期一(一月十四日)已經去咗警署做續保手續,下次再報到都係農曆年之後嘅事,呢段時間佢會專心搞春晚同賀歲片宣傳。」知情者說。 經理人部唔配合 高層拍板搞春晚,變相截斷了公司一班阿哥阿姐藝員大時大節搵快錢財路。據了解,由於樂易玲揸旗的經理人部門企硬不肯全面配合,令春晚節目有大部分內容至今仍未落實。「失驚無神話搞,啲客早半年前已經mark晒啲期做街外騷,都唔知去邊度唧啲期出嚟?有啲未有job嘅,一樣唔想做,大家都搏吓喺外面或者大陸有人搵,唔想錯過農曆年搵錢機會!」一名經理人部門的職員說。自己友同外援一樣難度期,已定名為《新春黃金慶典》的春晚決定放棄直播,改為錄影,由汪阿姐及鄭裕玲主持,葉玉卿外,暫時落實的演出只有阿叻同狄易達在西九長廊跳熱舞,陣容果然「鼎盛」! 屢試屢敗 余詠珊加入無綫後,為鞏固勢力,不斷招攬舊公司同事,又積極獻計推出「破格」節目,可惜全軍覆沒,收視和口碑都差強人意。 《爆足一周》 接收被商台炒魷的查小欣,推出節目《爆足一周》,節目出街被網民鬧爆翻炒舊料,最終播了四集便腰斬收場,成為史上最短命節目。 《港姐》普選爛尾 港姐40周年,余詠珊搞一人一票普選,但選舉當日,因電腦系統負荷唔到,臨時改由評判選出三甲,爛尾收場,結果無綫共收到477宗投訴,破晒紀錄。 《玩轉三周1/2》 余詠珊入無綫後的頭炮節目《玩轉三周1/2》,動用全台藝員停廠拍攝,但反應奇差,更被網民批評照抄足美國趣劇《MDDtv》和日本劇集《志村劇場》。 《走過烽火大地》 節目的預告片打鑼打鼓指攝製隊深入伊拉克、阿富汗及伊朗等地區拍攝,但節目播出後,被觀眾投訴貨不對辦,其中一集話去阿富汗,但大隊攞唔到簽證,最後只到了土耳其郊外的難民營,另外一集計劃去敍利亞,又因為太危險,返轉頭。 |