📖 ZKIZ Archives

激進民主派人民力量嘅議員陳偉業與陳志全為菲律賓總統阿基諾三世在峇里島玩殘梁振英，不肯為三年前慘劇道歉一事，聲言要在立法會提出私人條例草案，限制在一定時間內，唔發菲傭准許證，不准菲律賓人入境，以為咁就可以迫使阿基諾三世政府向香港道歉及賠償，可說十分天真。激進派容易激氣上腦，好容易胡思亂想，成為衝動派掌門人，孖陳議員就係一個例子。
香港雖是中國境內一個特區，但外交事務由中央管轄，對菲律賓交涉外事，如菲律賓擺起款嚟，搞對口單位講求對稱嘅話，梁振英根本冇資格見阿基諾，譬如馬尼拉市長到北京，習近平駛乜要見佢？三年前之馬尼拉殺人慘劇，純屬不幸事件，好似美國大學中學校園殺人事件一樣，中國學生不幸遇害，令人極度遺憾震驚之外，中國及特區政府根本難以向美方採取報復行動。我地當然可以大罵菲律賓警察無能，不專業，處理事件糊塗混賬，菲律賓政府其實豈會不知，但要佢嘅總統親口道歉，佢地點肯制呀。香港議員條氣唔順，大可呼籲香港人自願式杯葛聘請菲傭，改聘印傭、泰傭、孟傭，相信會有人響應，但動議立法禁用菲傭嘅話，未免太蠻橫，一刀切不切實際，好多香港家傭僱主（包括左丁山家人）一定反對。香港現在勞工短缺到極，周圍請人困難，不少中產家庭因為可以聘請菲傭，主婦先至可以出外打工，如果呢大批女士（相信起碼有十萬八萬人）突然間失去菲傭嘅話，佢地就會被迫回家湊仔湊女，離開本地勞動市場，打擊到本港經濟活動。
或曰：可以請印泰孟女傭代替，但香港聘請菲傭起碼有三十年歷史，彼此講英語，溝通問題不大，如要大批家庭再適應印傭泰傭文化，咁又何必？此外，你估禁止菲律賓人來港，禁用菲傭就會逼迫到阿基諾道歉？大想頭啲喎，近年菲律賓經濟增長可觀，信貸評級調升菲律賓國債評級，阿基諾三世有恃無恐，除非習近平李克強親自打電話俾佢，威脅斷絕中菲貿易關係啦。

菲律賓發生巨大風災，死亡人數不斷增加，國際救援組織估計還有超過二萬二千人失蹤，真係聽者落淚，聞者心酸。亞洲國家之中，孟加拉每年受季候風吹襲時，死亡人數不計其數，不過孟加拉離香港幾遠，本地傳媒甚少詳細報導，而菲律賓鄰近香港，橫掃菲律賓之颱風，往往吹到廣西，粵西一帶登陸，故此香港人有乜可能唔知？更何況香港有菲傭十幾二十萬人，不少家庭與菲律賓人扯上關係呢！
有報導話，在港菲傭之中來自颱風海燕橫過之菲律賓島嶼災區嘅，有近萬人，有咁啱，得咁蹺，大記者家中姊弟聘請嘅菲傭，一共四個，就係來自同一家庭親生姊妹A B C D，佢地鄉下雖然好彩位於「海燕」路線之下，但全鄉已無一淨土，所有木屋、茅屋、磚屋皆蕩然無存，海水如潮湧入，捲走傢俬財物，鄉人倖存性命者，皆成光棍一條，缺水缺糧。四姊妹在港驚到魂魄唔齊，強忍眼淚，但已顯得心情恍惚，煲滾水唔記得熄火，菲傭C煲燶水煲。大記者一家姊弟當機立斷，提早十八日出十一月份薪水，召開家庭會議後，復每人多送二千五百元作救災費，以穩定佢地嘅心情。卻原來，最慘情者乃菲傭A（大家姐），佢早已安排了假期，聖誕前回鄉結婚，早已在港買定結婚所需衣物，搜集各人贈送之新禮物，舊衣物，寄咗三個大喼回鄉，依家當然已經全遭怒水吞沒。大記者弟弟（菲傭A僱主）特准佢提前還鄉，帶埋萬幾銀返去救災，左丁山聞訊，特別再送一封利是俾菲傭A。
不時睇到新聞有外傭亂嚟，與僱主不和搞事嘅新聞，但左丁山聘請菲傭多年，從未發生事故，每位菲傭都做得幾開心，表現甚佳，無他者，我地在家吃甚麼，菲傭就吃甚麼，去茶餐廳、快餐店、馬會會所吃海南雞飯，隨行菲傭亦吃雞飯或套餐，每日下午菲傭仲可以在家自己沖咖啡吃多士做下午茶，久而久之，人心肉做，菲傭那會同我地鬥氣吖，有朋友話左丁山家人好彩啫，每次都請到一個好菲傭，或者係啦，但自己好心有好報啫。