| ||||||
| 股神畢菲特似乎應該改叫賭神！佢老人家同CNBC講，自己間公司Berkshire Hathaway已經賣咗啲好特別嘅保單畀客人。保單內容係，如果法國響今年世界盃攞到冠軍，佢哋願意賠償3000萬美元！賠得咁大，分分鐘造就更多上帝之手或者世紀頭槌之類出現！ 查 實股神嘅保險公司一向保啲另類風險，例如承保美國職棒明星Alex Rodriguez的合約或者大學籃球賽可能停賽等。咁都未算，佢前年仲同對冲基金經理普羅蒂傑斯，對賭標普500指數基金淨收益（賭約由2008至 2017年）、又同佛羅里達州政府賭天氣期權。相對華華淨係同對面位嘅同事，賭吓六合彩，股神嘅層次真係高好多！ 股神今年 賭波賭得大，內地民企富豪賭得亦唔細，攞真金白銀嚟搞波！正當中國足球壇一片腥風血雨之際，恒大地產（3333）老闆許家印宣佈，豪掟1億人仔，入主剛被 罰降班、由中超降為中甲嘅廣州足球俱樂部；仲有消息話，佢下個目標係搞埋籃球。咁計埋舊年豪掟2000萬搵魔鬼教練郎平搞支恒大排球，即係話佢除咗係內房 民企大王，遲啲仲係手握中國三大類球賽嘅「波霸」，唔知size細啲嘅乒乓波同高爾夫球，佢有無興趣呢？ 陳家強自踩三文兩語唔掂 財 經事務局局長陳家強噚日去浸大同工商管理學院嘅學生對話，教授張仁良問佢，香港學生嘅三文兩語有無需要改善？局長話，應該多方面發展，中文、英文、普通話 都要，廣東話唔掂都好大鑊o架（唔係啩！？）。至於英文呢種國際語言，局長有感而發，「其實人哋要話你，就總有啲嘢話你，俾人話英文唔掂，都唔使氣餒，應 努力改善，我語文能力都唔係咁好，成日中英文夾雜……」局長都算用心良苦，自踩嚟勉勵學生。 張茵叫國家准生多啲細路 響08年 全國「兩會」，因為一句「勞動合同法形同鐵飯碗」而搞出大頭佛，玖紙（2689）老闆張茵舊年全程封嘴。點知蟄伏一年，兩會今年都未開波，張總又等唔切， 喺飛去北京嘅航機上同《廣州日報》記者爆料，話佢今年嘅主題係「呼籲國家放開二胎政策」，仲話如果自己兩個仔唔夠料，唔會畀佢哋接班，希望大家唔好睇唔起 「富二代」……唔知社會大眾今年又點回應張總呢？ 李華華 [email protected] | ||||||