📖 ZKIZ Archives

曾江唔怕被虐：有要求逼出質素

1 : GS(14)@2015-04-23 02:16:14

■曾江謂就算給他再揀，他都選做龍成邦。攝影：陳志嵐


出爐金像獎最佳男配角曾江，在神劇《大時代》扮演總華探長龍成邦，也是郭藹明父親，在劇中他被鄭少秋飾演的丁蟹綁架，曾江嚇到在車廂瀨屎瀨尿，被秋官嫌污糟用水喉狂射，這幕經典，觀眾至今難忘。


【曾江】潛逃台灣的總華探長龍成邦，與毒梟周濟生是結拜兄弟，後來認展博作乾兒子。

叫秋官放盡

80歲的曾江昨日在尖沙嘴接受本報記者專訪，談到當年這幕經典場面，他記憶猶新說：「我記得沖水時佢錫住我，但我同佢講：『假嘅有乜好睇？真係沖落去撞到我，又有水花，好激情㗎嘛，觀眾係好殘酷，鍾意見到演員俾人糟躓，我話阿秋你嚟啦，唔好就住。』一係我就唔做，但點解唔做盡？」曾江和秋官同是要求高之人，高手過招是否火花四起？曾江笑說：「佢有要求，我有要求，所以出嚟啲嘢係有質素。」各有要求會否有拗撬？他坦言：「肯定有，但我覺得有拗撬啲嘢先至出嚟，個個人都係咁演，有乜癮？我哋知道出發點係想整個戲好。」如果可以再選擇，曾江想演繹哪個角色？他笑笑說：「我都係適合做龍成邦，但如果做丁蟹，我演繹方法同秋官一定唔同，可能有另一個感覺。」



想郭藹明好

劉青雲在劇中演出鋒芒畢露，曾江也大讚：「青雲最好嘅嘢，就係冇戲裏面有戲，哭哭啼啼容乜易，但冇戲裏面有戲唔容易。」至於扮演他女兒的郭藹明，曾江說：「佢未做過戲，記得我有場戲暈咗喺屋企，佢要拖我，但佢拖唔郁，希望我可以幫佢，但我話no，最憎係道具畀個空篋我，冇感覺吖嘛。我唔係鍾意教人，我就想佢好，佢選美出嚟，需要有人畀條路佢行。」撰文：戴彩煥場地提供：Harlan's（The One）





來源: http://hk.apple.nextmedia.com/entertainment/art/20150422/19120829
PermaLink: https://articles.zkiz.com/?id=289844

曾江82歲迷彩爺爺

1 : GS(14)@2017-01-21 03:36:49

■82歲的曾江腰板挺直，跟老婆焦姣辦年貨做埋阿四。



在演藝圈縱橫多年的曾江，當年的男子漢，如今卻變成溫純的住家公，下星期就是農曆新年，日前82歲的曾江和太太焦姣在九龍城侯王道辦年貨，雖然曾江滿頭白髮，但是精神飽滿，紅光滿臉，外披迷彩外套，揹住一個背囊，腰板筆挺，健步如飛。曾江伴着太太焦姣，先到一些海味雜貨店搜購，滿載而歸之後，再到附近的街市買菜，雖然他們年紀大，但是環保意識好強，買菜時，準備好環保袋放好所有菜，謝絕膠袋，最後焦姣又再行入一家健康食品店掃貨，曾江則尾隨其後，為太太服務。採訪、攝影：朱志聰、黃曉程




來源: http://hk.apple.nextmedia.com/entertainment/art/20170120/19902544
PermaLink: https://articles.zkiz.com/?id=323421

經歷三段婚姻焦姣係曾江首任妻子老友

1 : GS(14)@2017-01-21 03:36:49

大家所認識嘅曾江，可能係因為「美源髮采」又或者可能係因為《竊聽風雲》系列，佢係大家公認嘅老戲骨，其實佢嘅學歷都有番咁上下，早年已經喺外國留海，就讀美國加州大學柏克萊分校，仲要係建築系學士畢業，唔知係咪過讀藩書，佢嘅感情觀都好西化。82歲嘅曾江有過三段婚姻，早喺1969年佢就同五、六十年代女星藍娣結婚，佢哋仲育有一子，不個婚姻維持咗十年就結束，翌年曾江同專欄作家鄧拱璧再婚及後育有一女，不過同樣都係十年後離婚。最後，曾江同現任妻子焦姣喺1994年結婚，22年嚟仲恩愛如昔。不過，藍娣胞姊張萊萊曾經接受訪問爆料指當年曾江為戀鄧拱璧而拋離藍娣，不過藍娣一直餘情未了，直到當年曾江與鄧拱璧離婚後，藍娣希望再續前繼，而當時藍娣一心等待好友焦姣為自己同曾江再繫紅線，點知最後好友同前夫撻著，而身為家姐嘅張萊萊仲直認曾經因此事恨透焦姣。




來源: http://hk.apple.nextmedia.com/entertainment/art/20170120/19903260
PermaLink: https://articles.zkiz.com/?id=323422

老婆胞妹外甥都做娛圈曾江全家都係星

1 : GS(14)@2017-01-21 03:36:49

家陣興講星二代，星爸星媽星仔星女，全部都有根可尋，不過，於1960年代加入演藝圈嘅曾江，演藝經歷約半世紀，除咗佢本身係星，佢身邊嘅原來都係星，今次真係星，全部都係星。太太焦姣曾江現任太太焦姣，於1961年考入台灣中影演員訓練班，演藝經歷同曾江差唔多，近年少喺幕前出現，比較近期嘅有台劇《流星花園2》同電影《竊聽風雲2》等。而曾江嘅前兩任妻子，藍娣同鄧拱璧，前者係五六十年代嘅香港電影明星，後者則係專欄作家及著名模特兒，都係名人。女兒曾慕雪香港舞台劇演員曾慕雪，係曾江同第二任太太鄧拱璧所生嘅女兒，佢係香港演藝學院戲劇學院（榮譽）學士，主修表演，佢曾經參演過《羅密歐與朱麗葉》劇目，並於2005年加入PIP劇場，佢數年前接受周刊訪問時，坦言抗拒借父母之名發展，亦絕少提及自己係曾江個女，但佢強調自己同曾江關係良好。胞妹林翠已故港星林翠（原名曾懿貞），係曾江嘅胞妹，林翠於1953年考入由導演黃卓漢領導的自由影業，曾拍攝《四千金》、《游龍戲鳳》同《豆腐西施》等名作。外甥女王馨平林翠之女、即歌手王馨平係曾江嘅外甥女，雖然王馨平近日淡出幕前，但佢同舅父曾江關係良好，仲有一齊食飯見面。外甥陳山河林翠同男星秦劍（原名陳健）之間育有一子陳山河，亦即王馨平同母異父嘅哥哥，同樣係曾江外甥，不過陳山河星途不及母親或妹妹，星途浮沉，喺1997年淡出娛樂圈。其實再數多一層，王馨平個爹哋（即曾江個妹夫）係港台武打明星王羽；而曾慕雪個後父（即鄧拱璧丈夫）係粵劇名伶阮兆輝，個family tree再散開都仲係星……




來源: http://hk.apple.nextmedia.com/entertainment/art/20170120/19903262
PermaLink: https://articles.zkiz.com/?id=323423
Next Page
ZKIZ Archives @ 2019