【動畫】同新紮姐仔陳婉婷有咗「餡」？鄭俊弘搵樂小姐拆彈
1 :
GS(14)@2017-04-06 07:41:33鄭俊弘被指背未婚妻Beebs偷嗒何雁詩，報道出街後，堅稱自己唔係「第三者」嘅何雁詩，就話自己「清者自清，行得正企得正。」至於男主角鄭俊弘，潛咗一日水，到夜晚先蒲頭接受訪問。不過佢未接受訪問前，就有人爆料指外表乖仔嘅佢，其實係圈中「食家」，除咗同蔡思貝、王君馨、吳若希傳緋聞，仲同秦沛女姜麗文拍咗6年拖，到鄭俊弘紅咗之後，就飛甩姜麗文。原來鄭俊弘緋聞女角名單中，仲漏咗一個成員，呢個就係無綫新紥姐仔陳婉婷(Hebe)。昨日有讀者爆料，指13年喺《星夢傳奇》勝出走紅嘅鄭俊弘，搭上陳婉婷，二人打得火熱，一直想公開戀情嘅Hebe，仲以「肚」要求鄭俊弘公開女友身份，但彈起咗嘅鄭俊弘就對Hebe愛理不理，為防有後患，鄭俊弘仲匯報俾無綫高層樂易玲知，幫自己打定個底。讀者話Hebe見鄭俊弘冇反應，有晚扮醉踩上鄭俊弘屋企，打算借醉講數，點知一入門口，就見到樂小姐大大個棟咗喺鄭俊弘屋企個廳度……事後《蘋果》打俾陳婉婷，佢好大反應話：「吓，唔係啩！邊個作故仔，我連佢(鄭俊弘)電話都冇，大家唔熟。」
來源:
http://hk.apple.nextmedia.com/entertainment/art/20170406/19981787