📖 ZKIZ Archives

成人影片分享網站ThisAV創立六年，陪伴港男度過不少寂寞夜晚。網站滿足港人生理需要，亦安慰人心，社會經歷重大危機時，多次展現良心。雨傘運動期間，網站將標誌轉為黑白。對比選擇沉默的政客及媒體，顯得更有人性。ThisAV創辦人身份神秘，即使身體力行撐社運，卻從未對外表明政治立場。他接受本刊專訪，首度開腔講述對一系列社會事件的看法。這位土生土長的港人，向記者詳述經營網站起與跌，又爆行內不少幕後人員，其實是已婚女士。對於被稱讚為香港良心，他深感慚愧：「有可能傳統媒體自我審查愈來愈嚴重，令網民寧願相信一個成人影片分享網站內容，咁其實十分可悲。」近年不少社會爭拗，亦令他覺得很疲累。港大校委發言外洩事件，他最初沒將錄音片段下架，親友早勸他「唔好玩火，話依家呢個政府唔係以前個政府……要搵藉口拉我有咩出奇？」最終有人直接向外國伺服器公司投訴，他無奈把錄音下架。「如果會怕因言入罪，其實已經係無咗言論自由。」

港大校委錄音片段被上載到ThisAV網站翌日，記者透過電郵聯絡到網站創辦人Chris（受訪者着本刊為他起名）。當時他自稱管理員，指創辦人不便受訪，「始終怕影響家人同朋友，希望你明白，中國人社會對從事有關情色行業嘅人，有啲忌諱同偏見。」以為色情網站創辦人很開放，原來都受中國傳統思想束縛。

拒談性別抓商機入行

Chris其後改變主意，但只肯透過電郵受訪。他在香港土生土長，對於個人背景三緘其口，只就着有網民謠傳他在科技大學畢業，澄清非三大（港大、中大、科大）畢業生。記者與他對話期間，感覺他為人感性，有可能是一名女性，加上他透露業內很多從業員其實是女性，甚至已婚有小孩。記者打蛇隨棍上，問他到底是男是女，他選擇不回答。對於Chris來說，ThisAV只是一盤生意，他強調只是一名商人，以公司模式經營網站，「我唔熟有咩AV女優，有咩新片，甚至好少睇AV」，他亦有涉足其他生意。ThisAV創立於○九年，現時每日約一百萬人次瀏覽，Chris不肯透露創立網站時成本及現時每月收益，但指收入基本上靠廣告。

人棄我取拓日本市場

Chris創立網站時正值金融海嘯之後，好工難尋，雖然他獲得聘書，但不是其理想職業。他做過IT生意，接觸到很多外國成人市場數據，發現色情影片網站有商機，便決定入行。「既然唔係做想做嘅工作，倒不如搏一次，而且永遠都係經濟差嘅時候最易創業，因為成本平同機會成本低。」當時全球沒有中文成人影片分享網站，「我係第一個行出一步去試，開始做嘅時候，全世界都覺得華人成人市場無得做，大多數因為中國對呢類網站唔開放，我當時只係諗做人哋唔做嘅市場，人棄我取，做到今時今日。」經營之初，猶如摸着石頭過河，不久他便發現單靠香港及台灣廣告市場，根本不能回本，遂嘗試攻入其他地區，發現網站於日本市場特別成功，終於殺出血路。現時瀏覽ThisAV用戶最多來自日本，佔其總瀏覽量約六成。ThisAV曾經歷重大危機，有網絡供應商突然破產走佬，「差啲連server都拎唔番，啲人幾日睇唔到片都照嚟」，他聯絡不同人士及公司，立即訂購新伺服器，最終解決危機。ThisAV近年躋身本港百大網站，瀏覽人數比不少媒體網站都多。網站取勝之道，其中一個是市場推廣。「以前鹹書同風月版，俾人感覺係阿叔匿埋喺廁所偷睇，但我見到年輕一代不論男女，已經對性冇咁忌諱，更公開談性，我就將佢包裝到更年輕化。」Chris找來本地樂隊ToNick創作及演唱網站主題曲，建立鮮明和年輕形象，是過去本港成人媒體從沒做過的事。但他承認若要跟世界最大專攻歐美市場的成人網站比較，收入還差很遠。

女性員工擅接洽廣告

創立色情影片分享網站，難免遭衞道人士鄙視。但Chris認為網站亦帶來好處，「如果社會對（性）呢樣嘢太封閉，會更有問題，要從年輕時接觸，從中明白做好多事之前要顧及後果，先係最好嘅教育方法，好過全無認識……依家已經係資訊爆炸年代，無可能對年輕人封閉資訊。」他透露公司不少幕後人員是女性，特別是廣告部門：「因女性一般verbal skill（語言技巧）比較好」。靠她們見客亦有好處，曾有廣告客戶派女員工接洽，「之後問番佢本來有啲擔心，但見我哋都係女性，就放下戒心。」Chris強調：「唔好俾電影呃到，可能呢個行業有神秘感，先覺得做成人網站一定係男人，而且覺得多數係公仔佬，當然我冇檢查晒係咪每個人有紋身啦，但我睇番中外市場真係冇咁嘅現象。」他又透露業內不乏讀書人，甚至有麻省理工學院畢業生，很多人本身是讀藝術或商科出身的高學歷人士，十分專業。

不平則鳴非香港良心

港大發生校委發言外洩事件，網民再次盛讚ThisAV是香港良心。其實早於○一年馬尼拉人質事件，網站呼籲網民捐錢；反國教期間停止開放一天。網民指ThisAV「對比起沉默嘅偽君子，更有人性」。背後做出良心決定的人，正是Chris，「我性格比較直，見到不平事就好想表達感受，只係無諗過有咁大回響。」他說：「我做過嘅事，其實人人都可以做，（就好似）喺自己facebook轉吓頭像，發表見解。只係因ThisAV每日有一百萬人睇而變得特別。」他指身邊很多朋友參與社運，他亦去過雨傘運動現場，但並非在最前線，「我唔能夠話佢哋有正義感，因歷史並未評定嗰啲運動係對定錯，只係佢哋比我走得更前，付出得更多，被人話我係香港良心，我有啲慚愧。」港大錄音片段被網民上載到ThisAV，Chris獲悉後，查證片段沒違反網站伺服器所設的美國及瑞典法例；版權持有人亦沒投訴，故他決定不將片段刪除。他自細信奉要依法律及程序行事，「我亦唔覺得成人網站需要有自我政治審查。」但若片段干犯美國或瑞典法例，尤其是兒童色情內容，便會立即刪除。

遭人投訴錄音迫下架

惟上週四晚上，有人向其外國網絡供應商投訴，他無奈將錄音片段下架。Chris指家人及朋友知道網站有港大錄音片段後，「都勸我唔好玩火，成日都話依家呢個政府已經唔係以前個政府，連用胸部攻擊警察都告得入，要搵藉口拉我有咩出奇？」他即使想堅持，都要考慮親友感受，「惟有抱住一堆疑問delete咗啲片」。對於港大校委事件，他質疑反對陳文敏任副校的校委動機，認為「本身大學招聘有既定程序，當大學主要管理層同大部分員工，都覺得陳先生無問題，其他人去challenge，係咪過去程序內都有嘅事呢，定係針對陳先生，動機係咩？」他認為若不解釋清楚，只會愈描愈黑，公眾會更質疑，從而製造更大社會危機，尤其對政府信任程度。「我認為政府嘅spin doctor（政治化妝師）要先為危機降溫，而唔係跟政黨同傳媒對立，咁只會愈描愈黑，無幫助。」比起政府中人，Chris更有政治智慧。

傳統媒體趨自我審查

身為媒體負責人，他指傳統媒體自我審查愈來愈嚴重，但情況屬正常，因傳媒是商業機構，一定跟老闆立場，「不單本港同內地，即使Murdoch（梅鐸）旗下傳媒機構，亦出名喺政治上有取態，你哋壹傳媒都一樣。只係呢幾年有部分傳媒會更加刻意去選擇性報導。」但他認為以上情況是走向公民社會的必然過程，只是有些人太刻意令老闆高興而「做得over咗」，令到愈來愈多人反應大。「尤其依家網媒崛起，令到同傳統媒體嘅反差更大，例如有傳媒怕無得續牌，特登去please政府而跪低，網媒普遍冇呢個包袱，呢個過程係正面定負面，好睇媒體點走落去，依家感覺係傳統同新媒體互相角力嘅分水嶺，自我審查主要係傳媒想表現鮮明立場嘅原因。」

非倡港獨或打倒政權

對於香港社會現況，他認為近年社會爭拗令他好疲累。「我喺殖民地時代長大，自小被灌輸呢個社會每樣嘢都要跟程序跟規則，例如排隊唔可以打尖，唔可以造假等等。但呢幾年社會太多事，令我對呢啲堅持質疑，變成呢啲都係理想，唔可以係現實。」他舉香港電視發牌事件為例，「政府可以否決港視申請牌照後，去修改已經發出嘅政府文件，將『no ceiling』（無上限）字眼刪去。政府帶頭做呢啲事，我作為商人，仲敢喺呢個地方投資？我唔係咩港獨分子或者要打倒政權，我都睇到中國喺共產黨領導下，某啲方面有進步，例如前幾日宣布專門學校都提供免費教育，令整體人民教育程度提高，我覺得係德政。」然而，為何不少人懷念殖民地時光？「係咪中國管治的確有可以改善嘅地方？愛一個地方就好似愛一個人咁，一定會有害怕，但係害怕失去呢個人，同害怕呢個人會傷害你，係完全兩回事。」記者透過電郵跟Chris聯絡多日，他每次都很快回覆。記得第一次問他被稱為香港良心的回應，他的回答悲觀，稱回想以往在網站的舉動，覺得部分行動有點衝動，又透露曾有人發電郵罵他出風頭，「我覺得香港成個環境變咗，就算見到自己認為氣憤嘅事，都無好似以前咁。有時我都唔知到底係怕人認為我哋鍾意出風頭，定係覺得香港依家已經無咗言論自由而害怕。」

無力感增捍言論自由

他之後解釋，對於社會現況有一種無力感正在增加，但他希望會慢慢消失，亦寄語香港人別灰心，「至少你同我都仲有機會上到facebook，一班人可以自由地喺高登鬧政府，另一班人可以喺香港討論區，鬧佔中嗰班係死廢青，我希望每個人都關心社會發展，無論支持定反對政府都好，冇多元聲音，就永遠唔會進步。」

撰文：李啟發攝影：鄒潔珊[email protected]