📖 ZKIZ Archives

樓市持續升溫，除了業主高興外，最開心莫過於地產代理。

論規模，肯定是中原及美聯兩大財團獨霸市場（利嘉閣及香港置業，分別是中原及美聯的附屬公司）；但中原主席施永青卻指行業並非「中美大戰」這麼簡單，大行亦難以攻破陀地勢力雄厚的區域。「中原、美聯各佔市場三分一，其餘由中、小型行佔據，我哋好少沾手舊區市場。」

事實上，各區有不少陀地經紀行揮低大行，例如駐紮屯門的祥益地產，長期佔區內逾一半成交；而曾在中原任經紀的創富物業老闆，睇準大行欠缺靈活，遂自立門戶，短短三年已成為粉嶺大哥；至於主攻大角咀的龍鳳地產，大行甚至於區內全無蹤影。祥益地產

開業年期 21年

分行數目 25間

區域 屯門

代理人數 200人

中原、美聯向來明爭暗鬥，但在屯門卻不敵地頭蟲。今年六月，祥益連開四間分行，老闆汪敦敬猛讚市中心屯門時代廣場的鋪位難求，較兩旁的美聯或香港置業的鋪位大三倍，「喺正轉角位，兩邊落地玻璃對正市中心，我哋要預先交裝修設計俾大業主先爭得到。」

屯門是祥益的根據地，故此凡有大行開鋪的地方，必定有其足跡，例如全港最大型居屋兆康苑，便有三間分鋪，而最旺的屯門市中心，亦有七間分店插旗，「有啲鋪足足等咗十年，我不惜工本爭番嚟。」

屯門面積之大，約有半個九龍，難怪祥益開鋪政策如便利店般，總有一間喺左近，令屯門分店多達二十五間；反之四大代理鋪，在屯門加起來亦只得十九間分鋪，有屯門大行經理說：「唔係潑自己冷水，屯門有一半成交都係祥益做。」

舌戰施永青

不單愛鬥鋪多，兩年前汪敦敬更曾與施永青在電台舌戰，施認為細行於金融海嘯後不宜逆市擴張，質疑汪的策略不切實際。「施永青嗰時睇淡樓市，我就話樓市好快復甦，結果你都睇到啦。」

其實行內對祥益的印象麻麻，指其職員筍盤就自己買，然後托高價格沽貨獲利，汪敦敬試圖解畫，指經紀買賣實屬正常，「只要交易時向買家申報就無問題，如果違法，同行早就報警啦。」

惟背後仍有不少炒家對這種手法有怨言，認為有利益衝突。汪敦敬卻反指常被行家抹黑，「商場閉路電視，影到對方踢我哋職員，有晒證據，最後對方要留案底！」

專請笨人

他笑言旗下經紀不作奸犯科，反而「笨笨地」居多。全公司二百名職員，有七成是再培訓人士及新移民，「佢哋住喺屯門，客仔多數係街坊或者同鄉。」

任職祥益經紀十二年的陳阿麗，九七年屯門八佰伴結業，便轉行做代理，由於廣東話半桶水，帶客睇樓時非常尷尬，「我講嘢唔正，要講幾次客人先明白。」可幸屯 門住有不少新移民，口音反成為其優勢，「有個客見我有口音，問我邊度嚟，原來大家都係福建鄉里，之後講鄉下話傾偈，最後傾成百三萬買兆禧苑，佢啲兄弟姊妹 後來都幫襯我。」陳阿麗現已成為祥益佣金最高的經紀之一。汪敦敬笑說：「我啲伙記識講中國十六種方言。」

搞地區關係

政府七十年代發展屯門新市鎮，汪敦敬是首批殺入屯門開地產鋪的人，自此便立心在區內搞關係，現時身兼區內多項公職，每年農曆新年大派十萬個利是封，又扮聖 誕老人派禮物，「我哋中、小型公司，廣告一定唔夠大行多，惟有實際啲答謝街坊。」又例如業主只要簽下委託書，讓祥益獨家放盤，便送五百元的全屋清潔。

祥益一直是屯門王，但汪敦敬卻從未在區內居住，近年他愛買九龍站豪宅，惟作為地產公司老闆，亦要透過對手入市，「我透過中原同利嘉閣搵盤，始終西九靚盤唔易搵，要四十八小時內決定買唔買。」

睇通大行弊病減佣致勝

祥益是屯門開荒牛，相反成立不足三年的創富物業，已在粉嶺開了六間分行，四大則在該區合共有十間鋪，創富老闆張銘均牙擦地說：「一開鋪我就預咗要同大行平分天下，而家佔咗三分之一成交。」

張銘均以前是粉嶺及上水區的地產經紀，不時自己也揸鑊鏟，「响粉嶺做咗十四年，沙士之後，啲樓低水得好緊要，索性邊做代理邊炒樓。」翻查資料，從○四年起，張銘均至少炒過二十多個上水及粉嶺單位，買入價大部分約一百萬元，通常賺一至二成便離場，最厲害是從未損手。

直至○七年，他決定放手一搏，花七十萬元創業，「樓市始終有波幅，唔會長升，炒樓始終有風險。」故此他揀在私樓較集中的粉嶺開鋪，半年內開兩間分行，與大行硬碰。

創富物業

開業年期 約3年

分行數目 6間

區域 粉嶺

代理人數 50人

炒樓即炒魷

他在創業之前，已與區內的炒家打了招呼，「除咗大家都識嘅鬍鬚余之外，仲有四、五個炒家活躍於粉嶺，佢哋揸貨比鬍鬚余仲多。」

他更向炒家承諾連同自己在內，所有員工不可炒樓，違者必炒魷，「你問吓鬍鬚余，係咪好多大行經紀有筍盤都自己炒先，對佢哋唔公平。」

他更睇穿大行靈活性低，去年底帶頭將買家的佣金減至七折，大行起初也照跟如儀，「佢哋減咗四個月就無繼續，聽講話總公司怕對其他區嘅客唔公平，影響深遠，所以即刻停止。」他表示此招薄利多銷奏效，生意額急增一半，故今年在區內再多開三間鋪。

成功搶了佔有率，他又再度橋，欲將佣金調回正常水平，最近便開了裝修公司鋪路，「慢慢加到八成、九成，轉為送幾千蚊裝修禮券，同時又可以幫襯我哋裝修公司，我又賺得番，一舉兩得。」

擴張太快易中伏

經濟低迷時，就算分行逾百間的大行亦重創，利嘉閣在九七年，分行數目逾一百間，惟金融風暴後縮減至六十間。至○一年，樓市仍未復甦，終以一億元賣盤予中原。

而香港置業，九六年為擴充，引入長實，翌年擴展至一百四十間分行，金融風暴後縮減至二十五間。有報導指，香港置業與長實的關係太密切，遭其他地產商杯葛，使港置只能賣長實樓盤，生意轉差，經紀不斷跳槽，直至○○年被美聯收購。

另外，紅極一時的鴻運地產，曾是沙田區的二手樓大阿哥，可惜金融風暴後大損元氣，至○○年轉攻一手盤，卻被中原、美聯夾擊，最終結業。○三年，其老闆田國強的妻子沈國芳重操故業，成立鴻雋地產，至今規模依然不大。

為抗衡大行，美國的世紀21引入特許經營模式，小型地產鋪加盟後，每月付專利費，便可使用其招牌，現時在港有一百三十間分店。

舊區包通渠

細行欠缺宣傳，故上述兩大陀地公司老闆也樂於訪問，惟獨在旺角及大角咀開了十間分店的龍鳳地產老闆甄智傑卻異常低調，卡片只印上投訴部經理，「我只想平平淡淡做生意，依家只負責客人投訴，我派個經理同你做訪問啦。」

四十多歲的甄智傑，是龍鳳的創辦人，行家指他甚少在店內出現，只知他在區內有數個物業收租。

龍鳳地產

開業年期 18年

分行數目 10間

區域 大角咀、旺角

代理人數 約20人

被迫擴張

龍鳳現時在區內有十間分店，較歷史悠久的大同地產還要規模大，惟行內人指它是「被迫」擴張，「其實佢唔想開咁多分行，有啲隔籬街已經有一間，但職員做得耐，要俾佢哋多啲發展，所以先開分行，否則就自立門戶。」

事實上，龍鳳就算分行眾多，但員工只有二十名，龍鳳地產經理陳宗健表示每間鋪只有一至兩人，若要帶客睇樓，鋪頭便索性關門，因此營運成本有限，「好多職員都係附近嘅師奶，一做就十幾年，有自己班客，買樓賣樓都係同一個代理經手。」

陳宗健指舊區經紀要提供另類服務，「條渠塞咗、停電、漏水都會搵我哋幫手，我有好多相熟鋪頭嘅電話。有時業主會問我哋點裝修，邊間裝修鋪好，如果業主想劏房，仲要教埋佢哋點攞牌同裝修。」

九○年代初，房協興建的油麻地駿發花園落成，大行亦曾嘗試殺進該處開鋪，惟最終亦被龍鳳揮低，「駿發的二手成交唔多，養唔起一間大行，細行無咩開支先做得 住。大行每月要上繳約十萬元行政費給總部做廣告費，皮費太重。」一名地產經紀笑說，一些單幢樓較多的舊區，即使所有成交全由一間大行獨霸，亦不夠維皮。

現時舊區有不少重建新盤落成，龍鳳也積極搶生意，今年在奧運站新盤海桃灣樓下開了分行，以為可食正區內換樓客幫襯，可惜生意麻麻，陳宗健坦言：「新盤點都唔夠大行鬥。」

大同地產決裂

大角咀細地產鋪林立，其中有逾四十年歷史的大同地產最悠久。首間分店位於大角咀大同新邨，故以此為名，高峰時擁有二十八間分行，單是美孚便有近十間分行。

惟○三年，三名股東不和決定分家，各自分區盤據，但依然沿用大同地產作招牌，彼此的裝修亦很統一，一律掛着葫蘆及銅鑼等中式布置，只是樓盤資料已各不相通，外人難以知道已拆夥。本刊找到大角咀大同的老闆劉小娟，但她拒絕回答任何問題。

iPad、iPhone喺地球每個角落賣到成行成市，如果話蘋果係最強科技公司，照計都好合理。

不過，喺某啲角度睇，原來強中自有強中手！花旗國《商業周刊》最新公佈嘅年度最佳表現科技公司排行榜，排No.1嘅竟然係嚟自中國嘅騰訊（700）！

騰訊市值只得嗰424億美金，拍馬都追唔上蘋果嘅2950億美金，到底隻企鵝係憑咩砌低蘋果呢？

原來，呢個排名唔係鬥大嘅，而係鬥增長，咁騰訊嘅銷售有成64%增長，勁過蘋果嘅52%，加埋其他項目亦都技勝一籌，所以先至會爆出呢個小冷門……

睇怕喺喬布斯眼中，馬化騰（圖）隻QQ企鵝，應該仲猙獰過iPhone Apps嘅Angry Birds！

除咗騰訊為國爭光，呢個榜頭10位，仲有百度同本地薑偉易達（303），分別位列第三同第八，再次證明搞科技，唔一定係鬼佬先叻！

今年五月初，港股大時代期間，本刊找來城中人氣最高的十位股評人，點評大市走勢，以及每人推介一隻 心水股。話咁快，已到埋單計數嘅時候。過去三個月，港股如坐過山車，大時代泡沫爆破，恒指由高位最多急挫兩成。十位參賽者成績「驚人」，冠軍竟然是出道僅 一年的渾水。渾水：靠細價股跑出（冠軍）

「我都唔知自己贏咗，多謝晒！民生珠寶（1466）好多嘢都符合我嘅揀股準則，例如貨源歸邊、市值唔算大。不過，我都估唔到跌落嚟之後，上得都幾快。事實 上，今次大跌市對細價股影響一樣咁大，好似跌二千點嗰日，細價股都跌得好急，但有啲反彈得幾快。依家我自己個倉市值都跌咗兩至四成。一直以來，我嘅規則都 係市值太高就放，暫時仲work。上一季散戶對細價股嘅參與少咗，殼股嘅買賣冇咁密，財技動作少咗，但係零零星星都有啲疑似賣殼動作，好似上個星期嘅卓高 （264）同日成（3708）。嚟緊我會推介偉志控股（1305），貪佢市值細，貨源又歸邊，佢跌咗落嚟升得唔算多，依家仲係under value，目標價睇$5.75。

女子組：輸少當贏

青姐（胡孟青）：「我五月時睇萬洲目標價$6.2，之後最高上過$6.19，股災後可以有$5，仲想點呀？好多公司股價唔見一半啦。豬肉價格已見底，我繼 續睇好萬洲，$6.2係招股價，衝唔上係因為太多蟹貨，要時間消化。依家梗係Cash is king，搵啲現金多又業績好嘅買囉。我睇好電能實業（6）。佢揸住五百幾億現金，如果冇新收購，可能派特別息出嚟，你一定有賺；如果有新收購，一定係好 嘢，係電力資產，你又皆大歡喜。」

小炒王（梁心欣）：「七月時港股三日跌成三千幾點，我都無諗過咁快。八月個市會較靜，但係上個月嘅低位（22,836點）就唔會穿。我之前揀中遠國際，主 要係因為佢資產夠多，航運股喺呢個時間做得幾好，同埋有息派，雖然之前set個目標價$10今年未必到，但會繼續睇好。」

沈大師變「沈大輸」

「以五月頭恒指嗰時嘅水平，大家都計唔到之後個跌市，但係我喺五月尾，衝上去28,500嗰時，已經喺報紙叫人減磅，如果大家有聽我講，問題應該不大。至 於我推嘅人保，個市唔就都冇辦法，加上A股個變數，好老實，我都預計唔到。我相信個市會上番，嚟緊睇$5到$5.5。」

淡市四大抗跌股

港股轉勢，財演擂台幾乎全軍盡墨。恒指五月時高見28,524點，截至本週二，已累跌超過一成四。大時代期間熱炒的股份，升得快亦跌得急。不想再食「驚風散」，首選穩打穩紮的抗跌股。

友邦（1299）

賣點•今年上半年的新業務價值達9.59億美元，按年升21%，符合預期。•業務表現相當強勁，香港表現最佳，而中國年化新保費升至2.2億美元，新業務 價值利潤率更達84.8%。•獲美銀美林、摩根大通及高盛等多間大行唱好。專家耀才證券市場研究部經理植耀輝：大家可能擔心加息會影響到集團在東南亞市場 的表現，但內地的業務可抵銷這方面的負面因素。

創科（669）

賣點•美元持續升值，利好一眾主要客戶為美國的出口企業。•美國六月新屋動工大幅增長9.8%，利好創科在當地的業務。專家大和分析員John Choi發表報告，指出創科旗下Milwaukee（充電式鋰電）仍然是15至17年增長最快的電動工具品牌之一，並將目標價由31.5元升至33元，維 持「買入」評級。

滙控（5）

賣點•剛發表的中期業績表現不俗，集團第二季稅前盈利達66億美元，按年升18%，勝預期。•集團落實以 52億美元，向Banco Bradesco出售巴西業務，相信交易可帶來可觀財務效益。擁躉/專家蘭桂坊控股主席盛智文：大跌市時亦沒有減持，因為跌市是A股的問題，而出售資產可 以令集團更靈活。騰祺基金管理投資管理董事沈慶洪：滙控純以收息計，炒上落市仍是不錯選擇，股價會在65至73元徘徊。

置富產業信託（778）

賣點•近年積極擴張，一三年向母公司長實（1）收購天水圍嘉湖銀座商場後，去年十二月再收購觀塘麗港城，為公司帶來增長潛力。•上半年置富每基金單位分派 逾23仙，以六月底的平均收市價7.8元計算，相當於有六釐股息。業績公布後，股價升穿八元，息率仍逾五釐。擁躉理工大學管理及市場學系副教授梁劍平：置 富旗下商場七、八成的商鋪與民生有關，受零售業不景氣的影響較小。現時平均呎租只是38元，還有增長空間。

撰文：梁延宇插圖：詹震寰[email protected]

今次《Start up擂台》的主角，是成立半年有多的Clipper。由80後、港大工商管理系畢業的Ryan，想出為香港食肆做一個集結優惠券的apps平台，形式如現已過氣的coupon網。我們找來曾研發《蘋果日報》iPhone版、香港資訊科技商會會長黃岳永，品評Clipper。會面後他坦言未有興趣投資。衰乜呢？我點sell

大家好，我叫Ryan，Clipper創辦人之一。以前的優惠券，一張張印在報紙雜誌，剪出來很麻煩，其實平均只有1%的優惠券被使用。Clipper的出現，就是將全港優惠券電子化，方便商戶及顧客，角色如一個中介。你只需在Clipper app點選啱用的coupon，去到商戶scan一下QR code，就可兌換優惠。對顧客來說，就好像用OpenRice，可以在網上評分。亦有地圖功能，可睇到香港邊度有優惠。我哋除飲食外，亦有美容保健、旅遊等優惠。再開啟GPS功能，仲可以search附近有優惠的商鋪！對商戶來說，我哋system易操作、介面靚！而家已經有超過二千間商店加入，做到breakeven。前景？好樂觀！

專家有問

黃：黃岳永C：Clipper黃：對商戶來說，講咩都假！做平台最緊要有用家，你哋如何增加市場佔有率？C：我哋搵咗Samsung合作。用Samsung手機到「沛公」、「放牛牛」等十一間甜品店，可有額外優惠。先養住一班客，之後根據用家評分慢慢改進，用家就會增加。優惠券夠唔夠吸引，都好重要，例如有商店只推出全店八折、九折優惠，其實消費者睇到唔覺吸引，亦影響平台質素。喺最初，我哋幾個創辦人逐間食肆拍門。最叻做鐵板燒嘅，我哋建議做盡啲，打六、七折，引用家到你鋪頭用，否則優惠太少無效果。黃：咁現時有幾多人download咗？當中真正活躍嘅有幾多？ C：而家有七萬幾人下載，當中一萬個用戶，最少每星期用一次Clipper。我哋嘅想法係，做好用戶體驗，保持平台上有八百至一千張優惠券。每個月亦會集合一批商戶，提供主題留住用家。例如買一送一咖啡、一蚊食雪糕等。又有一個AI系統，主頁排名會根據用戶喜好編排，令某類受歡迎優惠券，可出現在較高位置。

黃：我見你哋介面幾靚，讓商戶加入的系統都設計得好完善，不過你哋就咁被動等商戶加入？C：唔係，我哋開咗商戶自行登記嘅途徑，亦有三個同事負責行街搵商鋪，主要係中小企，因為大連鎖店亦唔需要我哋。我哋本身規模一樣細，有啲商戶因此主動介紹其他鋪加入，係我哋強項。（找外面的sales team？）因為唔清楚質素，所以無考慮，尤其我哋係Start-up，想慳錢，所以請咗唔少係實習生。黃：咁你哋長遠目標係咩？C：優惠券只是我們的切入。而家你在Google找美甲店，搜尋結果很散亂，我哋想做線下商鋪的Google。找寵物、飲食、美甲、玩樂等類型的商鋪，上我哋嘅app啦！有評分、引發評論、俾人參考，將來希望轉成一個大型資訊性平台！

專家判決

十分滿分嘅話，我會俾六分，算合格啦！不過現階段如果按佢哋方向，我就唔會投資啦；但當交個朋友，可以 教路。Clipper嘅手機畫面設計係好靚、好方便，但注重包裝，就忽略咗定位。唔係瓣瓣都做就係好，要搵方向。佢哋user唔夠active，我望過成間公司亦好後生，缺乏一個有經驗嘅Program Manager，負責綜合數據、搞campaign。例如星期六、日，推出一系列的限時限區優惠，讓女性user去旺角美容、行街、食飯，全部都用到Clipper，這樣各種優惠券可以幾何級數使用。其次，我想知Ryan會否再搵天使基金？有錢，就每個campaign十萬蚊、十萬蚊咁掟落去！搵有品味嘅鋪頭合作，直接俾錢佢哋做優惠！還有未來要建立品味。要用家覺得Clipper有taste先用你，唔係貪平少少，否則幫襯大陸支付寶啦！亦唔好似OpenRice；唔該，過濾啲好嘢先俾我！我一星期去旺角一次，都想食得好啲啫！現在是web 3.0年代，你要知客人喜好，知得愈多，愈可以製造demand。這個又是要花錢。例如做crowdsourcing，讓用家建議你哋加邊啲潮鋪，你就同間鋪傾做優惠券！優惠券仲有好多玩法，用完美容服務去食飯有折，都可以係一個新優惠。能夠將客人由一間鋪轉到另一間，係好值錢的！你只要計到佢做這次優惠的盈利，收平佢少少，一個聰明嘅生意人點都會同你合作！你做到我所講，要打敗OpenRice，根本唔難！

用家品評

拉麵達人邱生：「我哋拉麵鋪一碗麵平均八十蚊，喺Clipper做全線拉麵五十蚊優惠，用咗兩個月，帶來收益高於佢全年三千幾蚊嘅收費。其實我之前試過派傳單，大概一千蚊一個月，平均派一千張先有三至四個客，浪費晒啲傳單及印刷成本。Clipper就無呢個問題，現時有多過千五人用過優惠。「另外，用Clipper要掃QR code，最終可幫我統計有幾多客人是『返頭客』還是新客。不過掃QR code要逼住同facebook連結，就令唔少顧客卻步。現時收費幾平，如果佢收我一千蚊一個月我一樣會考慮！不過有時派傳單唔使俾優惠，無額外支出，但用Clipper一定要俾優惠，呢個因素都要考慮。」

撰文：孫樂祈攝影：鄭樹清攝錄：鄭樹清、廖健昌插圖：劉志誠[email protected]

阿里巴巴的馬雲、順豐的王衞、以及騰訊的馬化騰，三個人的住屋反映三種風格。馬雲買入山頂白加道前比利時領事超級豪宅，要大地在我腳下；王衞住九龍塘喇沙利道的自建獨立屋，布滿天眼，守衞森嚴；而馬化騰則喜歡石澳大浪灣道的寧靜，從華光航運的趙世光手上接貨。馬雲和王衞這兩大巨頭，近日終於正面爆發了衝突。順豐與阿里旗下淘寶的數據接口突然關閉，買家不能追蹤貨物最新位置，賣家亦無法確定貨物是否已被接收，交流大受影響。事件驚動阿爺出手，強調要「講政治、顧大局」，雙方暫且握手言和。據馬雲的身邊好友指，近年他猶如「阿里戰士」上身，東征西討，霸道成魔。偏偏砵蘭街起家、已進身香港第五大富豪的王衞，已經不是靠馬雲搵食，被逼埋牆角終於反擊，企硬落馬雲面。

坐擁十二萬人速遞大軍的順豐，總部在隔岸深圳；老闆王衞在一○年，以三億五千萬元買入九龍塘喇沙利道五十五號地皮，方便中港兩邊走。項目於三個月前以七千多萬元補地價，現已建成三層高獨立屋。記者在現場視察，發現這座外形如一個「方箱」的建築物，四角布滿天眼，門前還種了多棵大樹遮蔽大屋，守衞相當森嚴，反映主人極之小心謹慎。記者在週六、週日登門拜訪，屋內菲律賓工人並沒露面，只透過對講機說王衞不在家。《壹週刊》拿得其設計圖，發現全屋竟有十間睡房，四個主人房，總共有十五個廁所！另外有自修室（Study room）及健身室。記者從高處往內望，發現在大門內，放有一座華麗金色的巨型四面佛，在天台，則放了兩個練拳用的沙包，以供發洩。據知私生活神秘的王衞，已經結婚，妻子在香港科技大學畢業，入了順豐工作並結識王衞。上週六，在王衞大宅，便有一名年輕男子拿着籃球出入，樣子與王衞極為相似。

割斷網友命根

上星期，王衞突然主動出手，讓外界終感受到他的速遞大哥權威。上週五順豐與淘寶數據接口突然關閉，互相指摘對方先切斷信息接口，令淘寶的買家、賣家，不能即時追蹤及確認貨物的位置及資訊。事件震撼網界，而對一些喜歡在淘寶購物的中環OL來說，影響頗大，因為她們淘寶購物後，都習慣留意貨物運送資訊。在中環做文職的阿菲表示，上週五才知道他們系統出現問題，查不到貨物資訊，「平時會上網查閱，會追蹤貨物嘅check in 號碼，因為可以知道貨物幾時到去攞貨。」現在不能查閱，她說十分不便，「都好麻煩，如果急用都好麻煩，因為查唔到。」查閱貨物資訊這麼重要？「都頗重要，因為如果貨物較貴重，都希望運送過程安全。」她又說，不時會在淘寶購物，「都經常買一些細小嘅物品，衣服，配襯用品，電腦用品同書本。」並且多數選擇順豐運貨，「因為順豐較快和有效率，其他公司會慢一點。」另外，有OL又抱怨，現在順豐很多體積大的貨品都不收，連狗尿片都不可以，鐳射唱片又說有機會侵犯版權，所以有可能因為這情況激發雙方決裂。

菜鳥vs豐巢

順豐與阿里決裂的關鍵，是規模已成熟的順豐，已不願順應阿里的所有要求。阿里於一三年成立了物流網「菜鳥網絡」，旗下軟件可以查詢及寄出快遞，支援網購如淘寶、天貓、京東、蘇寧等包裹跟蹤功能。追蹤物流對網購平台來說相當重要，阿里就曾因物流慢及快遞服務差等原因，收到多次投訴，有用戶甚至因此轉用淘寶主要競爭對手京東。當時順豐及部分快遞公司，都「被迫」加入菜鳥成為小股東，以免得失阿里這個大客。不過「菜鳥」愈來愈壯大後，馬雲的野心才昭然若揭。菜鳥根據天貓、淘寶等平台的交易及銷售數據，建立一個數據庫，稱為「天網」；在不同地方及物流區設有的倉庫，稱為「地網」。透過天網跟地網配合，菜鳥可以利用數據，調配存貨及物流，提升效率。例如利用大數據，事先分析及預測買家需求，並提前要求店主準備存貨，讓買家在實際發出訂單前，已把貨品送往買家附近的中心及網點，大大縮短物流時間。搭通了「天」、「地」線，中間的物流速遞，亦即是順豐現在的業務，自然亦是馬雲的囊中物。二○一五年，淘寶透過運用「菜鳥」收集到的訊息，在「雙十一」光棍節，以一日半時間便發了二點七億個包裹。同年順豐與部分行家，成立快遞櫃平台「豐巢」自保，抗衡菜鳥，雙方搶佔物流「最後一公里」（即把貨物從倉庫送到消費者手上）。去年三月豐巢和菜鳥合作，菜鳥提供買家手機號碼資料給豐巢，豐巢則提供快遞櫃資訊給菜鳥，互相交換Big Data。不過，今年三月傾續約時，菜鳥提出豐巢要回傳所有包裹、包括非淘寶系訂單資訊給菜鳥，結果「豐巢」斷然拒絕，引發今次風波。

試底線

順豐王衞拒絕與馬雲分享數據，企硬唔俾面馬雲。不足一日國家郵政局便要出口調停，強調雙方要「講政治、顧大局，尋求解決問題的最大公約數」。後來更召集兩方高層，要他們連夜到北京開會，最終達成共識恢復數據交流，Big Data大戰才暫且平息。香港中文大學亞洲供應鏈及物流研究所所長張惠民分析，這場爭議明顯是圍繞數據，菜鳥認為順豐在其「底下做生意，應該把所有數據俾晒我」，所以試其底線。數據是錢，他舉例，「跟蹤貨船的路線下，對天氣的預測可能比天文台還要準確。」在未來，數據不能以錢買到，只能以數據交換數據。王衞的反撲，獲騰訊的馬化騰、京東的劉強東，網易的丁磊，以致一眾網友讚好。王衞亦的確不用買馬雲的賬，根據快遞市場份額，連順豐在內的五間快遞公司，佔市場逾六成，排列為圓通（14.67%）、中通（14.25%）、申通（12.42%）、韻達（10.31%）及順豐（9.53%）。順豐市佔率雖然最小，但單價高，毛利亦最多（通達系平均每單毛利降至一元以下，順豐仍可維持在四元以上），令其利潤冠絕全行。順豐的核心優勢在於固有的商務快遞，即為寫字樓客戶傳送高價值文件及物品，而非網購層面，客戶已包括蘋果、華為、小米、Uniqlo等。

砵蘭街起家

身為「香港仔」的王衞，在內地出身，但七歲已來港，持有非「R」字頭的香港身份證。他於砵蘭街數百呎地鋪起家，初時只有六人，專替企業運送信件到自己鄉下順德，王衞亦要親自中港兩邊跑，更以割價搶灘，「人哋收七十蚊一件貨，順豐收四十，靠量拉低成本，搶了不少生意。」街坊對他印象深刻，指他幾乎每日凌晨已經在店內工作，做到晚上才離開，「以前條街無咩人行，佢開咗鋪之後，多咗貨車上上落落，跟住其他物流公司、足浴都相繼開鋪，帶旺成條街。」惟順豐生意愈做愈大，貨車及員工經常霸佔整條街，惹來鄰鋪不滿，「嗰時成條街啲鋪都唔鍾意佢，我哋想停車都無位，惟有向警察投訴，成日有鐵馬嚟趕車，直到順豐搬走至解決。」為擴大勢力範圍，王衞拉攏中港的行家加盟，每區有判頭負責開鋪，「佢寧願賺少啲，請班判頭返嚟賣命，幫佢不斷設立網點。」但各區諸侯乘機搵着數，某些大區因勢力坐大，竟自行開檔搶生意。九九年王衞見情況愈趨嚴重，決定買回所有網點，足足三年，才統一版圖。至今，順豐已經是年收入五百多億的大企業，並於今年初於A股上市。王衞持六成半順豐。內地的大企業亦難免有國家隊的身影，招商局及國開金融間接合共持有順豐近一成三股份。

馬雲輸氣度

另一邊廂，馬雲被指缺乏氣度，其身邊人指他近年變得太霸道。馬雲對操控王衞手頭的物流訊息極為着緊，淘寶的前高層，現職Mydress董事的Leon說，物流正正是決定阿里巴巴生死的其中一環，「做電子商貿有三大環，第一是平台本身的資訊流，第二是現金流，第三是物流，其實缺一不可。」淘寶雖然貴，但系統較清楚、員工有穿制服形象較好，「而如果計快遞公司，順豐我估係香港最貴。內地都偏貴，例如廣州寄廣州，十蚊以下，但順豐十幾蚊。百分比計接近七十幾八十。」馬雲的管理哲學非常動聽，說企業管理如同太極一樣，陰和陽，物極必反，什麼時候該收，什麼時候該放，什麼時候該化，什麼時候該聚。然而員工競爭極大，為免被辭退、亦為高薪厚職極度進取，阿里經理級別年薪三十萬人民幣起跳，更能分得阿里2400股（相等於二百萬港元）。有員工需要連續十二天上班，在重壓下患上中度抑鬱症；有孕婦因子宮大量出血死亡，家屬指女兒為準備假期工作交接，凌晨十二點還在工作，過勞引致死亡。雙十一備戰期間連家也不能回，公司在門外空地準備好數千帳篷、被鋪，讓員工安心工作至凌晨，故他們有「阿里戰士」之稱。阿里巴巴的員工有兩成人會被評為優秀員工，這些員工的收入有頗大差距，亦是另一造成「阿里戰士」的原因。淘寶的前高層，現職Mydress的Leon說大家對公司都很有歸屬感，希望公司賺到更多錢，分紅都多一點。

霸氣之形成

馬雲霸氣的建立，亦在於其政治影響力。馬雲一直被視為江派人物，阿里巴巴於美國上市的招股書中，發現一批江派公司持有大量阿里股份。其中有江澤民曾孫江志成創辦的博裕資本，江派的中信集團、國開金融、中投公司共出售二千六百萬股，套現近一百四十億。中投公司出售後仍持有阿里巴巴集團總股數的2.1%。曾是江派入幕之臣的馬雲，近年多次陪同習近平外訪，馬雲都緊隨其中，又被收編為習派。作為向新主習派「洗底投誠」的政治籌碼，他豪擲過百億人仔，堆砌傳媒王國，習近平熱愛足球，馬雲便投資恒大足球投其所好。習近平亦有依賴馬雲的地方，特朗普主張美國優先，狠批中國搶走美國的職位，要帶回那些職位，對中國毫不客氣。馬雲成了中美的窗口，今年初馬雲獲特朗普接見，討論了支持小商家的發展，尤其是美國中西部地區的小商家。王衞與馬雲，都有國家隊背景；在這場緊湊的數據大戰中，兩人將繼續且戰且行。

馬雲金句

1. 你窮，是因為你沒有野心。2. 上當不是別人太狡猾，而是自己太貪。3. 當你成功的時候，你說的所有話都是真理。4. 因為信任，所以簡單。5. 我從太極中悟到：事情並沒有好與壞，關鍵是看你怎麼看。6. 每個人都有成功的機會，就看你給不給自己機會。7. 一個好的東西往往是說不清楚的，說得清楚的往往不是好東西。8. 想成功就要瘋狂一點。9. 在未來人們不僅關注力量和力氣，他們更注重於智慧，善良，責任。10. 首富生活很痛苦，人人都圍着我的錢轉。

撰文：孫樂祈、王敬蓮攝影：財經組協力：李海澄[email protected]