| ||||||
我是香國成，喺慈雲山開跌打鋪，捽腳捽到買樓住複式。係長實雍澄軒買家，而家係見報率最高、鬧得最大聲嘅雍澄軒「苦主」。以下係我嘅故事： 我八歲由東莞來香港，十五歲時，見有跌打館招請學徒，貪學成後會被稱為「師傅」，夠晒威水，就毅然報名。做呢行，一定不能hea住做，亦不能用死力起勢捽，就係咁，一做四十幾年。起初一個症我收幾十蚊，我捽腳捽到買股票、捽腳捽到買洋樓。八七年，我借足九成、用五十六萬元買咗一間慈雲山地鋪，開自己嘅跌打館，客人都係附近街坊。○○年再用四百萬買入現住嘅牛池灣複式單位。我仲有炒樓炒工廈，最記得炒藍田匯景花園，我同個老友半夜爬入地盤逐層行，睇清楚去到邊層先有海景，高峰時賺過千萬。我認我投資係好狼死，但人得一世，來也空空、去也空空，我想中間精彩啲啫！何況我輸錢一定會還！九七年，金融風暴，賺嘅錢無晒不特止，仲倒蝕兩千萬。我做跌打一個症才一百幾十，好多人叫我破產算數，但我唔肯。做人唔可以無誠信，無咗信用仲邊有人信你呀？我咪咬緊牙關日捽夜捽囉，原本開朝九晚九，嗰時跌打鋪就二十四小時營業，半夜兩三點有人來都做！成個慈雲山啲人，半夜有乜急症都會嚟搵我。 識唔識還債？ 只是，捽極都唔夠還債。最賴貓試過拖銀行幾期唔供，諗住令佢減息。當年層層樓十幾釐息呀，點知銀行話：要拍賣我間跌打館。呢個係我本業，一定唔賣得！為保住間鋪，就算俾銀行罰加息，同賣走晒啲優質單位還債，我都照頂，誓不破產！就係咁，捱過晒啲低潮，近年物業價格回升我先翻身。今年二月，見雍澄軒有投資價值，遂以三百萬入貨。為完成交易，我搵兩層樓嚟加按，準備好晒啲錢來full pay。我投資鋪鋪膽搏膽，點知五月長實一句話「唔玩落去」，就取消晒啲交易？邊有人買賣物業咁賴貓！我唔玩你就殺訂，你唔玩就向我退番一萬幾千？有人話我咁有錢，唔係「苦主」；我唔苦，但唔代表我唔可以攞番公道！我哋已準備好文件，搵何俊仁幫手打官司，要長實賠雙倍訂。我小市民一個，輸咗都識還債，李嘉誠，你又識唔識？ | ||||||