胡景邵早訂大計 助亞視起死回生稱一年內止蝕 惜白武士夢碎
1 :
GS(14)@2015-04-14 02:05:31■胡景邵（右四）4月10日曾於亞視總部門外出現，更與葉家寶（右二）握手。
【本報訊】亞視不獲續牌，匯友資本當了半日白武士後，最終亦無法順利進場。但原來匯友首席合夥人胡景邵，早已為亞視度身訂做「起死回生」大計，更揚言最快一年即可令亞視扭轉月蝕千萬劣勢。他又堅信本地免費電視市場就算在無綫一台獨大的環境下，仍大有作為。記者：吳永強
亞視一直被視為「吸錢黑洞」，除已故遠東創辦人邱德根外，過去多個老闆均損手離場。當人人說「前世做錯事，今世做亞視」，胡景邵卻認為亞視仍有作為，「三人成虎，呢個人話亞視，嗰個人話亞視唔得，三個人講完就洗咗你腦，就話唔得喇！嗰啲話送畀我都唔要嘅人係純粹睇數，但佢唔睇動態（日後可增長潛力）嗰條數，係計唔到數」。胡景邵過去曾投資多項文化產業，包括拯救瀕臨清盤的大型連鎖唱片店HMV，及入股製作《蝙蝠俠三部曲》的美國傳奇影業（Legendary）。今次收購亞視，他發現要在無綫壟斷的市場下生存，並非不可能的任務，「唔係一台獨大，係另一台唔爭氣……成個（電視廣告）市場有40億元，TVB有37億，要攞5%市佔率，就收支平衡。而家亞視係零廣告收入，由0%去到5%唔係咁難」。要撼低無綫王者地位，胡景邵指過去亞視老闆經營不善主因，是未有為亞視定下安份守己位置。他指出絕不能以大台心態自居，亦不要妄想能夠短時間內與無綫對撼，「想打無綫就好難（經營）」。
否認有太子黨金主
除要定位清晰外，改善節目質素這個問題亦必不可少，胡認為電視業界太過着重於劇集元素，「大家太過糾纏於呢場戰爭上」，反而應想辦法製作更多類型節目，再配合O2O（線上與線下結合）元素活化電視業。亞視近年話事人均具紅色背景，節目取態被視為緊跟「阿爺」論調。曾在中資機構工作，亦曾跟隨「紅籌之父」梁伯韜打工的胡景邵，今次打算入主亞視，坊間亦有傳背後有太子黨金主撐腰。胡景邵未透露收購亞視資金來源，卻澄清自己並非紅底，而在決定收購後，中方亦未有派人接觸，「我斬釘截鐵話你聽，真係冇（紅色背景）。我做過中資、非（洲）資、法資、台資、日資，好多公司我都做過，亦結交咗唔同投資者、老闆……但同太子黨、國企都冇關係」。
來源:
http://hk.apple.nextmedia.com/news/art/20150413/19110559