被指似黑社會侯：額頭鑿住？
1 :
GS(14)@2016-03-09 16:13:11【本報訊】新界鄉頭向來予人土豪感，侯志強昨談到派員參選時也盡顯霸氣，呼籲其他黨派小心，「上得戰場，冇得刀下留人，梗係見一個斬一個」。有聽眾烽煙質疑其行為似黑社會，侯反問：「邊個額頭鑿住係？」王先生昨烽煙電台指侯所組新黨非獲全港支持，「我第一個出嚟唔支持你，你唔好發火住，因為你個人好火㗎」。他指侯在佔中及水客問題上，「你行出嚟直情成個黑社會咁」，又指侯的兒子佔中期間曾掟水樽：「你哋組黨仲猛過長毛嗰隻，長毛掟嘢嗰啲係輕微啲，你直情會打呀。點樣可以做立法會議員？」其間曾大笑的侯回應指：「我一啲都唔會火，我只係一笑置之。」他又否認兒子「掟嘢」，「我個仔同我風格唔同，絕對唔會掟人水樽，雞毛都唔掟一條，我哋動口不動手」。
認口氣大 日日食蒜頭
他並反駁被指黑社會：「黑社會所為？邊個係黑社會？邊個額頭鑿住係黑社會？唔通講真話嘅人就係黑社會？」強調若他有黑社會所為一早被捕，自評對不平事會直斥其非：「你話我大口氣咩？我每日都食蒜頭，每日一杯。」 ■記者許偉賢
來源:
http://hk.apple.nextmedia.com/news/art/20160309/19522106