近年全球經濟開始放緩，香港市道更每況愈下，零售業可說是重災區，本地商家受到很大的影響。專門推出精密遙控坦克兼出口至全世界的東方玩具，因近年國際消費力下滑，遙控坦克銷售數字大不如前，差點面臨結業危機，為了營救公司，掌舵人Steve決定打入近年愈吹愈行的本土熱，以My Tiny新品牌推出香港特色車仔以及場景模型，希望殺出另一條血路。 My Tiny發展2年，現時產品包括場景及車仔，比例大至1:18，細至火柴盒size都有，售價由$49至$850不等。問老闆Steve邊款搶手？他表示能令女士都肯花錢購買便是成功，「場景同車仔，當然車仔好賣好多，至於出咩款，其實都係我嘅idea，當然我唔會亂嚟，要照顧本地唔同人嘅口味，講到最多人like，就係比較中性嘅雪糕車、天星小輪，一個月試過賣1萬架，你諗吓多咗女仔鍾意，即係多1倍銷量啦！」今年38歲的Steve是車迷一名，自小喜愛儲Tomica車仔，18年前大學畢業後便開始創業，先在ebay做網上Tomica買賣，後來更成立了自己的模型王國。Steve說：「啱啱開始生意都唔錯，喺ebay做咗幾年，我哋已經係全球最大嘅Tomica網店，差唔多有1/3嘅listing係我哋公司嘅貨。創業4年後，機緣巧合下做埋遙控坦克買賣，最後發展到有自己嘅遙控坦克出品，最高峰每年有7位數字嘅收入o架，都冇諗過而家會轉型。」11年，Steve表示網購愈來愈方便，車仔買賣開始失手，「我哋一架車仔純利$4，之後ebay收購paypal後又加行政費，仲有倉租、人工都加咗，再加上競爭大，以前都係得幾個對手，到而家有成五、六十個，盤生意已經冇得做。」Steve之後放棄了投資百萬的ebay拍賣系統、賤賣2萬架車仔、辭去近一半同事，「一心唔做B to C嘅生意，主攻B to B嘅遙控坦克業務，點知呢3年外圍經濟差，歐債危機爆出嚟之後無論歐元、澳元同盧布都乏晒值，好似我哋主要大客俄羅斯，每年都有400萬單，最近就一下子冇晒，整體生意少咗4/5，所以我要尋求新出路，如果唔係好快就要執笠。」 冷門市場先有出路 創業18年以來，Steve認識不少廠家，亦學會如何設計及製造一架模型車，經過反覆思量，最後想到以車仔重新起步，打入冷門的本地市場。「日本車仔起碼出現咗30年，點解啲細路仲要拎住人哋出嘅消防車、警車嚟玩呢？我就向住本土方向去做，希望家長除咗買畀小朋友玩外，亦買一個回憶畀自己，My Tiny個名就係呢個意思。」由出口至世界的遙控坦克，變為只有香港市場的本地特色車仔，沒有出口，好多朋友都不看好My Tiny，相反Steve認為這個未有競爭的空間很有潛力，「美國消防車、法拉利，好多人已經造緊，至於香港本土嘅車仔，雖然市場只係得700萬人，不過真係唔多人做，最大競爭都係80M嘅巴士，咁我咪做其他囉，仲有警車、消防車，所有公共交通工具都有諗過。」 賣街即放催淚彈 Steve表示，一架車仔由設計到零售，起碼要1年時間，製作場景需時更久，「我一開始投入咗70萬去造場景嘅模具同包裝，點知有好多嘢都要細改，最終年半都未有第一件產品推出，都差啲頂唔住，直到My Tiny第一架車仔推出市面，呢架1:43嘅Hiace警車，一推出就撞正雨傘運動警察放催淚彈嗰日，好彩我哋第一批貨仲有GoGo Van登場，客人就算唔like警察，都有其他選擇。」即使遇到催淚彈，頭500架警車同GoGo Van最終於一個月內售罄；之後推出的香港場景反應也不俗，Steve說：「開始時每款貨每次約推出500件，大部分產品喺一個月內都會清倉。之後得到唔少分銷商嘅支持，應承一年內唔會落架，我哋就開始做埋好似Tomica size嘅火柴盒車仔，你諗吓一架車仔要投資8萬開模，每架批發賣淨賺$8，同一款車都要賣1萬架先回到本，不過好彩呢啲車仔售價平，反而更好賣，好快就回本。」 拎license最重要 製造一架火柴盒車仔成本只需8萬，Steve坦言呢個數字唔係好高，人人都做到，所以My Tiny的車款無論廠牌或拉花，印得上去都已經有license，這樣才有競爭力。「拎license最難，有時唔係有錢就拎到，又或者嗰個係一個百萬嘅天價，都係托賴以往識落嘅模型廠方朋友，呢啲問題先搞得掂，同埋多得第一個傾得成嘅GoGo Van，呢個成功例子，方便我之後去同人傾合作。」對於未來發展方向，Steve希望車仔可包含全港的交通公具；街景方面，以港人的集體回憶為主線。「我哋已經做咗天星小輪、電車，佢哋全部都拎晒license，我哋而家已經搞緊山頂纜車，希望可以整埋港鐵就差唔多啦。場境方面，好似皇后碼頭、拆咗嘅屋邨呢啲消失咗嘅地方，我都好想令佢重現眼前，好似牛頭角下邨場景就將會喺下個月嘅玩具展展出，希望反應ok啦！」 客人 Johnson：我最鍾意就係1:43車仔，因為比火柴盒車仔更精緻；另外摺得嘅場景款都吸引，啱晒香港嘅窩居，如果有埋彌敦道、地鐵出口嘅場景就仲正！ facebook@My Tiny 〈開業成本〉模型開發及器材：$700,000模型製作：$550,000包裝費用：$160,000總投資：$1,410,000 〈每月收支〉營業額：$1,000,000倉租：$30,000人工：$220,000運輸：$20,000上架費用：$15,000行政費用及雜費：$50,000盈利：$665,000 撰文：黃德禹攝影：劉宇軒 |