《風雲》音樂劇星期四開網上現割喉式劈價
1 :
GS(14)@2017-04-05 23:56:51由鄭嘉穎、謝天華、呂良偉同譚耀文等大堆頭演出嘅《風雲5D》音樂劇，去年7月已做定宣傳，原定4月1號開始於紅館上演，點知到2月15號突然宣佈延期，最令人驚奇嘅係，演員譚耀文都係早兩日至知延期消息。咁延期成點呢？4月1號同2號場次，順延至同月15、16號舉行，其他場次包括4月6、7、8、9號四場就不變。換言之即係後日頭場。大會都好識做，向4月1同2號嘅觀眾致歉，可換取《風雲》紀念品一份。至於點解要delay？總監陳淑芬就解釋謂：「經過技術部門連日開會，希望將呢個5D效果可以做到最好，亦希望可以有多啲時間綵排。」好喇，開場在即，啲飛去成點呢？去城市電腦售票網一睇，似乎………如果你想買飛嘅話，仲有好多揀位機會喎。票價分$350、$550同$980三種，昨日實測試過，由4月6號頭場，試買$980飛，你買5至9張連座都有位。最平嘅$350，想6個人齊齊坐，依家仲有飛賣。唔知到時入座率又會係點？
來源:
http://hk.apple.nextmedia.com/entertainment/art/20170405/19980505