魚樂無窮：斷背山式炒股票
1 :
GS(14)@2017-04-22 10:20:53有股評人近期推乜跌乜，成為城市熱話，無他，睇人仆街最開心，在八卦心態作祟下，大家都搵緊主角係邊個。不過，人有三衰六旺，行起衰運上嚟，如果咁啱市況唔就，推乜跌乜其實唔難，所以我無意落井下石。你見過賭場連開十七鋪大未？我見過，我真係見過！如果好運，你可以贏到開巷，黑仔嘅話，每鋪落part買100蚊，都可以輸足1,700蚊。有睇開本欄嘅戰友都知道，我甚少提供買賣價位，你可能話我趕客又好，不負責任都好，但作為投資者，每個人對每一隻股票，都有一個獨一無二嘅價位，正如每個人心中都有一座斷背山一樣，更會因應市況、情緒、倉位而出現變化，未能駕馭勉強跟風入市，蝕底嘅一定係自己。第二季心水股合興（047），三扒兩撥升抵目標價0.25元，可喜可賀。合興管理層日前接受傳媒訪問時表示，首季外賣收入佔比突破30%，同店銷售同樣續升，雖未有透露實際數字，但增長勢頭未完乃不爭事實，正所謂炒股炒前景，噚日一棍再破頂，話唔定係新升浪開始，有貨可以繼續揸，食咗糊嘅不妨搵位買番！
唐牛
http://www.fb.com/tongcow88本欄逢周二、四刊出
來源:
http://hk.apple.nextmedia.com/financeestate/art/20170420/19995227