回歸 15周年之移民二代：移民回流說 學加國人，捍 衞香港
1 :
GS(14)@2012-04-29 13:59:59http://hk.apple.nextmedia.com/te ... 379&art_id=16278072
我是香港蠱惑仔
你未必聽過 Mall852，但應該見過他的出品：廣東大飲茶遊戲卡、荔園立體拼圖、花牌相架。最新推出的香港鬥獸棋，把動物棋換成「中央正虎」、「狸超人」、「耳猿」；前作靈界揸 fit人，則以鬼古套入桌上遊戲，很港味、很高登。
Mall852的「 852」是香港區碼，這個知識，土生土長的香港人知道、未必用得到， Andrew則對「 852」這組數字極敏感，因為他移過民。他 83年被送到加拿大多倫多讀中學， 87年全家移民。隔了一個太平洋生活， Andrew對香港人身份仍然自覺， 89年天安門事件，他跟隊去中國大使館抗議、 90年吾爾開希到他就讀的 UBC演講，他走堂去一睹風采。「當年吾爾開希係一個瘦嘅靚仔，講過乜我唔記得，都係人權、自由之類，最記得係佢講講吓暈咗，好 dramatic，但場面好感人，人人當佢係英雄。」
他念細胞生物學， 93年畢業後三個月，即刻返香港。理由是，性格不合。「加拿大悶；每年 10月開始落雨、跟住落雪，無街去，只可困在家裏煲碟煮嘢食。香港不同， 24小時都可以有活動。我鍾意刺激，唔適合加拿大。」
現實一點的考慮是，華人在加國無前途。「在加拿大我從來無歸屬感，歧視？梗係有。試過行行吓街俾人圍、搭巴士細聲聽歌俾人話嘈、經過鬼仔較低隻窗叫我滾返屋企。」
「去到搵工，華人在大公司好難上位，除非你英文非常流利，同老細搭到嗲──當然，好多華人選擇喺餐廳做侍應，靠貼士過活，一樣可以買靚車媾女，但我估我基因裏是個香港蠱惑仔，我有外國護照、又識英文，不如靈活啲走位，返香港仲有前途。」他趕上廣告界黃金時代的尾班車，四年間，由月入$7,500的小薯仔，紮職至 Account Director， 97年人工近$40,000，那是香港最繁榮的日子。
香港是加拿大翻版
待過加拿大，他說，現在香港人經歷的「中港矛盾」，是十幾年前加拿大翻版，「以前溫哥華叫 Hongcouver，好多香港人移民過去，財大氣粗，買屋買最大、剷走晒啲樹，一家四口一人一部靚車。起屋，無格調可言，方方正正，用盡所有空間，同加拿大風格好唔同，佢哋叫香港人啲屋做 Monster House（怪獸屋），加上廣東話嘈，當時加拿大好唔鍾意香港人。」
分別是，加拿大沒有任由城市失陷，「加拿大做咗好多功夫捍衞核心價值！新移民先捉你上幾個月融合班，教你英文，告訴你當地人的習俗和禁忌；在家大家講方言，出到街，一樣要講英文。香港唔係，回歸以來，不停改變自己去遷就人，好多內地人嚟香港咁多年唔識講廣東話。口講尊重多元文化，但無實質嘢做過，由得文化矛盾越嚟越深。」
北上找生路其實是絕路
05年 Andrew退出廣告界，中間搞過貿易公司， 09年開 Mall852，賣內地人看不懂的香港特色，只因看不過眼香港人的「媚內」，「香港以前好有影響力，家好契弟。一味想迎合內地人，失去自己特色，最終也只會失去價值。」
年前香港設計中心率團，帶業界北上，鼓勵設計師在內地開 studio，說是人工平、地平云云，他氣到當場質問主持人：「你叫人哋將基地搬上去，即係解散所有在港員工；咁都算，你將所有嘢教晒內地人，人哋一成熟，一腳踢開你，香港建造業、廣告業已經承受緊同一個惡果，點解要重複犯錯？」看似找生路，其實是送上絕路。「全世界都知中國嘢平，但點解紐約、東京設計界，唔將基地搬去中國？做設計，最緊要融入文化環境，你叫設計師上東莞，日日俾骨場、夜總會包圍，點會有好設計？」他從昔日廣告界同行的遭遇得到教訓，「上到去，不斷迎合別人、甚至變成別人。作品出嚟，十足北京二線公司的設計，人哋有錢，即刻可以搵國際大公司取代你。」
大家使唔使咁恨錢？
「貪錢囉，如果唔係凡事講錢，或者可以換取更大空間，不會招致今日的下場。以前廣東話好靈活，家連語言創造力都無，只係不斷抄微博潮語。」
「有時我唔明，大家使唔使咁恨錢？淨係做 700萬人的市場，係咪會死？搵錢使唔使搵到咁盡？ 97前香港電影都係拍畀香港人睇，都死唔去，唔似家，不倫不類。」
他慶幸移過民，開了眼界，知道錢不是人生唯一宗教。今日他希望捍衞本土特色，反攻大陸，「香港文化在亞洲曾經好 Top Level，影響整個東南亞，中國近代都是看港產片、聽廣東歌大，只要我們不放棄，繼續做好自己產品，香港應該可以有自己的生存空間，可以影響番內地。」