妖口搵食投資法 高仁
1 :
GS(14)@2016-09-07 22:21:082016-08-29 HJ
各位「巴打」，港股經過去年的大時代後，先有妖股大股東疑似被斬倉，繼而以超筍價每股一仙賣盤（詳見2016年02月29日本欄〈洋參「仙」生真假賣盤〉）；後再有妖股爆炒急瀉又合又供，令到股價踏上成仙之路；因而觸發高仁炮製了「識破上市公司成仙成妖之路」系列文章。
雖然妖股往往會被投資者貼上負面標籤，但經過與「豬朋狗友」在飯局中研究，「高仁指點」話你知，各位只要投資有法，也可以跟機構投資者一樣，在妖口中搵食。
在披露對話實錄之前，請各位「巴打」與「絲打」重溫人物背景，簡介如下：
程更計──本地證券行經紀兼財務顧問，除了招呼散戶之外，亦向上市公司出謀獻計；
沈繼司──核數師，熟悉會計制度，對數字敏感，但對外面世界一無所知；
施友化──擁有公司私有化經驗的前「唉賓」，為人醒目，被看中轉型為上市公司CFO。
程更計：各位，今次做乜唔去我哋去慣「老蘭」附近嗰間馳名燒鵝飯店嘅？
高 仁：無他嘅，沈繼司話好耐冇見面主動邀約飯局，而呢間餐廳都係佢親自Book。喂！沈繼司，我就話連續6年喺公餘時間幫《信報》寫拆局文章忙到嘔電啫，但你究竟呢一年忙緊啲乜呀？
沈繼司：好耐冇見大家，真係唔好意思。呢一年，我係幫緊「十大惡人」去搞做殼，呢間餐廳「十大惡人」都有份投資，所以我Book會有八五折優惠。勁不勁？
程更計：（聞「十大惡人」色變）聽聞……呢碟係佢最喜愛嘅菜式，究竟係咪真係豬耳嚟？定係……
沈繼司：香港有《商品說明條例》嘛，Menu都寫到明係豬耳咯，點會似得妖股咁蠱惑喎！
程更計：正所謂「不入虎穴，焉得虎子」，如果我想投資妖股，在妖口中搵食，到底有乜嘢好方法呢？
升得愈急 沽壓愈大
高 仁：講點投資之前，我哋不如講吓，何謂妖股。如果有啲股票無端端會勁升，跌落嚟又會有人托住，估值超貴仍然會升，而且成交量大經常入十大，就有可能係妖股。
施友化：妖股可能冇乜實質業務，只得概念、MOU或股票投資，而且經常變身，跟住市場行業潮流去改名，而且仲會好有創意。如果道行高嘅話，可能會買傳統老字號品牌，或者邀請明星入股以助聲威，方便吸引啲魚（散戶）游過嚟【表】。
沈繼司：機構投資者點樣喺妖股賺錢呢？
高 仁：以CB形式入股。例如，妖股現價係4元，換股價有30%溢價，機構投資者通常會喺最高利益嘅時候，即係Reflection Point約莫喺5.2元，先至沽空去鎖定1.2元嘅利潤。
施友化：所以，妖股升嘅時候就自然會有沽壓，令到升勢放慢；而且股價愈升得急，沽壓就會愈大，因為機構投資者都為咗要鎖定利潤。相反，當股價下跌嘅時候，機構投資者可以將之前沽空嘅股票用平價平倉，間接支持股價。
程更計：即係，我跟住機構投資者嘅盤去做，就應該可以搵到食？
（飯局未完，下周待續）
妖股投資系列之一
本欄逢周一刊出
歡迎交流上市公司的財技個案及招數，請電郵至
[email protected]。
#高仁 #財經拆局 #財圈識真假 - 妖口搵食投資法