中環在線：利豐搵唐唐堂弟入局李華華

吃開巷金利豐朱太

2010-12-23 NM

有「殼后」之稱的金利豐證券老闆朱李月華（朱太），最近自導自演了一單百億「大刁」，將金利豐以一百二十億元作價，注入家族上市公司黃金集團，變相借殼上市，估值冠絕本地上市券商。

出身賭業世家的朱太，交際手腕了得，與不少城中大孖沙，如新世界鄭裕彤及華置劉鑾雄等稔熟，令金利豐由專門做二、三線上市公司融資，再接連沾手數宗轟動市場的「大刁」，包括中策「蛇吞象」收購南山保險等，迅速紅遍金融界。

上週五，朱太開腔暢談上市大計，自爆往蒙古、哈薩克斯坦尋寶，及一手「活化」細價股的來龍去脈。除此之外，這位下屆立法會金融界別議員大熱人選，更首次剖白從政意向。

上週二，「殼后」朱李月華透過旗下上市公司黃金集團，「以小吃大」，作價一百二十億元，收購金利豐，並將易名「金利豐金融集團」。收購價包括二十億元現金，其餘以票據、新股及可換股債券支付。黃金集團復牌後，股價一度逆市急升逾五成，截至星期二收市，仍升近三成四，市值急增十三億元。金利豐的賬目亦首次曝光。截至今年三月底，公司盈利超過四億元，較○八年海嘯期間增加三點六倍。

壹：記者朱：朱太

壹：年年賺大錢，仍要上市？

朱：三個月前先決定搞上市，之前都掙扎咗兩、三年。點解呢，錢我搵到，賺多一毫或賺少一毫，唔想同人交代，或承受呢個壓力。上市係為擴充投行生意，好多人以為我淨係炒股、借錢，其實我做好多收購合併，即係ibank，卻冇人知。我睇好二○一一年，內地或海外企業會繼續來香港搞上市。到時，除外資大行及中資如中金、中銀外，作為本地華資代表嘅金利豐，亦可列入佢哋嘅考慮名單內，分一杯羹。

壹：大陸人好睇牌頭，上咗市做起大陸生意會容易啲？

朱：上咗市有個名係易傾啲，我主力做大陸企業來香港上市，明年上半年我睇好個股市，九七年去到兩萬點個市盈率叫做有泡沫，當時炒空氣多，但係今日，內地、中東仲大把錢，恒指去到三萬點都未算泡沫啦！

壹：百億估值如何得來？

朱：（突然板起臉）早前報紙計錯數，話我六十五倍P/E（市盈率）上市（注：如以市值一百二十億計，年賺四億，市盈率為二十八倍），我未有咁大嘅膽，押咁大嘅賭注，叫人用咁高嘅P/E來買我嘅股票。報紙澄清咗，但好多內地網站、報紙跟住寫，嘩……呢個金融大鱷，唔好買啦，我好唔開心！老實講，直至今年上半年，我都冇諗過上市，唔使做window dressing（粉飾櫥窗），自己都分咗好多份花紅。搞上市後就唔會咁，今年業績一定靚仔好多，幾多唔講得住，但今年的P/E一定低過二十八倍。

壹：什麼業務最賺錢？

朱：幫上市公司做收購、配售及包銷等佣金收入，佔生意額三成幾。另外，孖展借貸利息及證券經紀佣金各佔三成幾及兩成。

壹：彤叔、大劉有興趣入股？

朱：我出到聲，好多人都會支持！仲傾緊策略投資者，入股或組合營公司，大部分係基金，希望明年二、三月收購完成前，可以陸續公布。

海外掘金「活化」殼股

除了搞上市，朱太今年亦忙於四出尋寶，六月時先後飛往蒙古烏蘭巴托及鄰近新疆嘅哈薩克斯坦。身為「殼后」的朱太，曾沾手過百二、三線上市公司，海外尋寶主要目的，正是為「活化殼股」。

壹：烏蘭巴托及哈薩克斯坦有什麼吸引力？

朱：近年交易所做好多功夫開拓海外市場，愈來愈多海外公司來上市，交易所行前，我哋扯衫尾跟喺後面。烏蘭巴托靠近內蒙邊境，我哋包咗架飛機，去睇煤。之後再坐五、六個鐘飛機，去哈薩克斯坦，嗰度有石油、天然氣、煤等資產，哈國首都建設好靚，好多英國及加拿大人。下個月打算去烏克蘭，農產品最出名，係俄羅斯「糧倉」，因為係高原，牛奶特別靚，另外仲想去南美。

壹：在這些發展中國家有沒有私人投資？

朱：有。我喺柬埔寨嘅吳哥及金邊，買咗好多地，呢啲國家政治穩定後，必定發展經濟，約兩年後，發展會好好。內地已經好多人喺嗰邊，到時有咩需要就起咩，酒店、住宅都得。

壹：細價股變身資源股，炒作後通常不了了之？

朱：我覺得你哋以前寫我時用嗰個字，係「活化」個殼，好貼切。好像1051（國際資源），咪做得幾好，成個管理層咁多鬼佬。上市公司去收購海外資產，或者有企業來香港搵平台，有上市公司唔介意合作，咁就借殼上市。好多項目，我哋睇係OK，但end-up唔得，係你（間公司）唔爭氣。

壹：以前你好低調，市場仲好多傳聞，話你專係斬人倉食人殼，你點睇？

朱：以前經我手做的中小企融資係好多，但我冇斬人倉，好少！叫佢哋減持就有，所以佢哋咁尊重我！好像559（華藝礦業），有大企業來收購，大股東都有利，呢啲叫活化，唔係斬倉。

立法會議員大熱

立法會金融服務界議員詹培忠多次表態，指兩年後不再參選，市場近日跑出五位候選人，包括恆豐證券董事長張華峰、金銀業貿易場永遠名譽會長馮志堅、利昌金鋪常務董事胡經昌、東泰證券主席李君豪，以及大熱門朱李月華。

壹：會唔會選一二年立法會？

朱：係呀，呢樣嘢我今次要講，呢排有好多傳言話我選立法會議員，（會心微笑）詹哥叫咗我好多次！我公司上咗市，業務咁多，公職亦多，更加唔想做。有咩好做啊？我政治智慧低能，而家行出來，俾人評頭品足，已經好難過。詹哥紅褲子出身，認識深。（壹：你青出於藍？）唔好咁講，大鑊o架！呵呵！詹哥好出色，可以連續演講兩個鐘頭，唔使睇稿，我做唔到。而且老公第一個反對，有時間都留俾家庭。

壹：睇你份履歷，又係全國政協，又係保良局總理，現時公司仲上埋市，好切合立法會議員資格喎！你認為代表業界須具備什麼資格？

朱：詹哥講過有三個條件，口才、急才及適量嘅錢財。佢哋叫我做，因為我做咁多公職，多人識我，其他候選人比較單純，淨係金融，冇我履歷咁平均。（壹：劉夢熊呢？）如果有第六個候選人，可能包括佢！呵呵。

壹：當年成立上市商會，證監會都無「祝福」，到現時都多咗唔少藍籌公司做會員，同港交所又多咗溝通，你希望在商會內扮演什麼角色？

朱：（收起笑容）唔係○二年的仙股事件（注：○二年港交所發表諮詢文件，建議股價連續三十個交易日低於五角的上市公司除牌，建議引起財經界人士不滿，細價股狂跌。）我都唔會「的」起心肝去做。搞商會吃力不討好，上市公司老闆個個咁高咁大，好難搞，又各有各忙。但好像仙股（事件）咁騎呢嘅嘢，對個市影響咁大，冇諮詢過業界，冇溝通。商會依家可以有溝通渠道，好像之前話延長董事禁售期，業績公布前三個月唔准買賣，跟住又話要做季度報告，咁即係一年十二個月都唔做買賣？我聯同業界七個唔同團體，同證監、財經事務局傾，最後傾掂數，一年有四個月可以買賣，大家都OK！其實我lineup過幾次業界嘅人，為華資開拓更多商機。團結華資，唔一定要做議員。

後記︰貓屎咖啡

訪問於金利豐國金一期的辦公室進行，甫坐下，朱太便叫員工奉上四杯咖啡中的「極品」——貓屎咖啡。「朋友送嘅，你哋試吓，我唔識，都係咁飲，不過咖啡豆係新鮮即磨嘅。」

出名吃得開、八面玲瓏的朱太，一直以「大公關」自居，人前人後均推舉老公朱沃裕為幕後功臣。踏入朱太辦公室，面積不但比朱沃裕小得多，牆邊櫃上堆放着冬菇禮盒及各種零食，與老公放滿文件的辦公室，大相逕庭。朱太笑着摷出一大盒北海道薯條，分派予記者。「朋友知我鍾意吃零食，送咗成箱來，試吓，幾好食o架，成盒拿去啦。」記者眼利發現地上有一大袋用數個玻璃樽裝着的鹹魚，朱太即時拿起一樽，興致勃勃地介紹道：「我阿媽自已整o架，蒸番熱好好味o架，我拿來送俾朋友，俾兩樽你哋試吓。」這位在金融界大吃三方的「大家姐」，在老公、美食面前，即時軟化成為一個貴婦師奶。

朱太簡歷

年齡︰52歲

家庭︰已婚，丈夫朱沃裕，育有一子一女

背景︰自小在鴨脷洲長大，父親李惠文，原名李樹福，是葡京賭場黃金廳廳主，母親馬少芳，朱太為長女。

76年︰到美國三藩市讀書，畢業於美國金門大學，取得管理學士學位，婚後在當地從事房地產投資。

92年︰與夫回流香港，同年成立金利豐證券，以兒子英文名Kingston命名，寫字樓設於香港仔。

95年︰於中環皇后大道中購買寫字樓，將金利豐由香港仔遷入中環。

99年︰成立投資銀行部，涉獵新股上市、收購合併及為二、三線股配股等財務顧問業務。

00年︰公司遷入國際金融中心一期。

02年︰拉攏賭王兒子何猷龍等，成立香港上市公司商會，任秘書長。

05年︰入主上市公司邁特科技，注入澳門兩酒店及賭場，改名「黃金集團」，任董事總經理。同年，與何鴻燊四太梁安琪一齊當選保良局總理。

08年︰當選全國政協委員。

10年︰旗下黃金集團以一百二十億元全購金利豐，易名「金利豐金融集團」，變相借殼上市。

PermaLink: https://articles.zkiz.com/?id=20604

📖 ZKIZ Archives

Random Tags