【養兔謬誤】兔兔食大便係咪有病？主糧唔係紅蘿蔔呀！
1 :
GS(14)@2017-04-15 23:29:16正確抱兔姿態：一手托起胸腔，食指和中指夾着一手臂，手指公放在另一邊腋下，另一隻手托起臀部，再將兔仔靠向心口。
考考你：兔仔係食乜嘅呢？腦入面係咪即刻彈條紅蘿蔔出嚟？錯喇錯喇，等香港兔友協會幹事董芳宜（Yvonne）一一解答，養兔仔的五大謬誤啦！
兔仔是草食性動物，糧食比例應是七成提摩西牧草、兩成新鮮蔬菜加一成兔糧。紅蘿蔔、蘋果、士多啤梨等高糖份水果可免則免。
謬誤一：兔仔餐餐紅蘿蔔？
兔仔主要糧食不應是紅蘿蔔。牠是草食性動物，糧食比例應是7:2:1──七成是提摩西牧草；兩成是新鮮蔬菜，例如唐生菜、油墨菜、白菜、菜心；一成是兔糧，以補充牠的微量元素。紅蘿蔔、蘋果、士多啤梨等水果糖份甚高，對兔仔身體無益，Yvonne說：「兔仔消化系統生長時冇打算接收高糖份，食咗可能胃脹、腸停，會唔舒服。」故一星期的紅蘿蔔份量只能是手指尾節的一半，不可食太多。
謬誤二：食便便係咪有病？
兔仔食大便實屬正常，因牠們腸道天生較短，有時吃下營養豐富的食物，經腸道消化後，發覺還有營養未吸收，盲腸會產生營養便，排泄時腦部會傳遞訊息，通知兔仔在肛門接下營養便再進食，將營養再消化。
要和兔仔互動，不妨撫摸牠的頭部，別隨意打扯身體其他部位。
謬誤三：兔仔溫馴又無害？
咪睇佢眼仔碌碌咁無害，其實兔仔真的會咬人。「甚至會咬到流血要縫針。」Yvonne說，家長決定養兔前要有心理準備，教小朋友不可亂搞兔仔，因兔仔不會說話，表達不滿的方法就只有踏地或咬人。「好多小朋友見到動物會尖叫，或好好奇，主動摸佢身體各個部份，扯佢耳仔或者手，佢自然會抗拒咬人。」家長最緊要教小朋友別當兔仔做公仔，不可隨意搓圓㩒扁，要尊重兔仔，例如想撫摸牠前要通知牠，「話佢聽我要同你有互動」，因兔仔是地盤性動物，對突如其來的入侵很敏感。
謬誤四：兔仔要沖涼？
兔仔其實不需沖涼，皆因牠們天生細膽又怕水。另外，市面上賣的沖涼粉其實亦非必要，因沖涼粉是化學物質，「但兔毛密，點梳都梳唔晒，佢又好鍾意舔毛，食晒化學物。」其實主人只需每日幫兔仔梳走死毛，再靠兔仔自行舔毛清潔便可。
輕揉兔耳可讓兔仔感覺舒服。
謬誤五：抱兔梗係抽耳仔？
仍有不少老人家以為要抱起兔仔，抽起兔耳便可，但Yvoone說這其實是獵人做法，「準備殺佢先會咁做。」兔耳內有神經和血管，抽起耳朵可能會扯傷部份神經和血管，所以絕對要避免。要正確抱起兔仔，要一手托起胸腔，用食指和中指夾着一手臂，手指公放在另一邊腋下；另一隻手托起臀部，再將兔仔靠向心口，讓牠感受人的心跳，牠便會很鎮定。
facebook：兔協 HKRS記者：封愷瑜攝影：梁志永2017果籽繼續認真知味。識買惜用。行以求知。好事多為。重修舊好。緊貼果籽報道，即like：
http://fb.me/AS.AppleDaily
來源:
http://hk.apple.nextmedia.com/su ... t/20170415/19990535