Trader物語：再升？辨別有法
1 :
GS(14)@2014-09-09 12:04:01上星期三，大市以千億元成交抽升569點，創出六年新高；但到星期四，大市沒有進一步向上，反而收低少少，這時候，有人趁機補貨，又有人趁機走人，感覺就好似「買定離手」的一刻，大家在等揭盅。一個腳痛旅行團，加埋十三五改革，令到大市瘋狂，問我信唔信，我就只係半信半疑。講真，這種鬆「經」收「政」的政策，已見怪不怪，最緊要係市場受唔受，而觀乎上星期三的表現，當然係受晒，但如果講大升，就唔係睇一日半日，更唔係睇第一反應。
弱股帶動強股成關鍵
因為，第一反應通常只係淡倉回補，即係淡友有理無理平倉先，而上星期三只升藍籌，其他個股唔升，就似係淡友投降居多。這種升勢即日急勁，但睇後續力量，就唔係睇呢種，必須要好友肯再開倉，才會升得持久。所以，最低限度要收過極高位像25400以上，再回一回，然後突破，那我就相信28000點唔甩得。講到好似自己好淡，其實我現在仍揸住七成貨，只係留三成子彈，萬一下跌，都可以執平貨。唔入齊貨，只係因為催化劑未夠持久，唔需要太狂熱咁衝鋒陷陣，反正如果個市係真升，係一定會找得到入市機會，現階段唔使太心急。大家只要睇睇最近上升的股票，就可以判斷升勢的持續性。如果強股當道，持續力會較強，因為強股升高，拉高估值，弱股可以借估值過低為由炒落後，但弱股翻身係唔一定能帶動強股的。現在港股大升的多是先前因某些因素而弱勢的板塊，中移動（941）、中石油（857），全部都係炒脫胎換骨，現階段係炒弱股翻身。沿用這個邏輯思維，後市能否再上一層樓，取決於弱股翻身能否帶動投資者追強股了。例如，中國人壽（2628）能升過近日高位，平保（2318）突破，連財險（2328）都升破14.9元，就是好現象。因為保險大股類之中，平保及國壽屬弱，財險最強，而弱強齊升，就當然可以看高一線了；同樣道理，馬鋼（323）升穿1.84元，鞍鋼（347）升到5.65元以上，而最強的重鋼（1053）也升穿1.98元，亦是好兆頭。這種方法，是在極不規律的市場中尋找規律，當然，如只有一、兩個板塊表現出色，可能只係個別原因影響，就不能輕信，但假如十個板塊有四、五個板塊都係咁，就算係確認，可以去馬。事實上，這個方法還可以演化到跨行業的板塊，例如鐵塔公司帶動中移動、中電信（728）狂升，從而令積弱多年的京信（2342）近月急升五成，直至近日才小回，若京信可以再次破頂，中移動中電信亦保持強勢，則這個鐵塔板塊（尤其電信訊）可以成為升市的動力了。技術分析近年來已進步很多，唔再係睇簡單指標、頭肩頂底，而係從價格變化或成交變化去推敲市場的質量變化，上面講的只是折衷方法，當然未夠科學。一般讀者未必有時間或技巧去再深入研究，但只要加入大數法則，以上方法雖不中亦不遠。「弱反帶動強」，經常會係新一波升浪的開始。張士佳註：筆者持有中石油及京信通信。
來源:
http://hk.apple.nextmedia.com/financeestate/art/20140908/18859078
找換店標價混亂 前Trader都未必明
1 :
GS(14)@2018-02-13 03:24:30【本報訊】找換店的外滙買入價、賣出價令人眼花繚亂，前外滙交易員、YBEX行政總裁李振寧坦言，自己有時亦未必明白，「例如點解買入價永遠低過賣出價㗎呢？」他笑說：「咁我不停買入再不停賣出，咪賺好多錢囉？」以百年找換店為例，日圓買入價為7.165港仙，賣出價為7.21港仙，容易令人混淆，事實是買家向找換店賣出1日圓，找換店將付7.165港仙回收；而買家想買入1日圓，找換店將收取7.21港仙。
YBEX直接計算預訂價
故此，YBEX放棄了這種複雜方法，而是買家輸入本金後，直接計算可以換取多少外滙，而且不只是參考價，而是可以執行的預訂價，「我做外滙交易員時，都明白如果得參考價，唔能夠直接落單，意思不大。」在實際操作上，買家首先要在找換店營業時間內，預訂意向金額，找換店職員允許交易後，買家就會獲得二維碼，其後在限定時間內到店支付。記者實測使用YBEX預訂「大使館」等值3,000港元韓圜，可於約9小時內到該店取得。YBEX不會收取用家費用，但將會收取找換店交易費用，但李振寧未有透露數據。
來源:
https://hk.finance.appledaily.co ... e/20180212/20303242