【LongD情侶】當鴨脷洲愛上元朗 港男：食得鹹魚抵得渴
1 :
GS(14)@2017-01-23 07:45:54Stan住鴨脷洲，Kathleen住在元朗，拍拖三年多以來，Stan每次約會完都會送女友回家，應該是男人公敵。
近幾年，不時看到與男女關係有關的網絡潮文，甚麼《一生人只為搵一個，與你相隔半小時車程的女友》、《本地Long D有冇將來》……有些住得很遠的本地情侶，往往都會將二人屋企相隔的車程，與香港去台灣的機程（約1.5小時）相比，甚至有巴打話，如果女神住得太遠，還是放棄吧，但愛情來的時候，係咪真係咁理智先？香港話大唔大，話細唔細，交通雖然方便，但假如由港島東去新界西，坐港鐵閒閒地要個幾鐘，如果男友送完女友再返屋企，都咪話唔辛苦。
任職海洋生物研究員的佘國豪（Stan）和女友何嘉欣（Kathleen）拍了三年半拖，男的住鴨脷洲，女的住元朗，拍拖以來，每次放工或去完街，Stan都會堅持送女友回家，一星期至少送五日，Kathleen還要住在需要轉乘接駁巴的錦繡花園附近，Stan每次一來一回，差不多要四小時，嘩……我相信他應該是男人公敵。
Stan說，「我因為工作關係經常都要潛水，好多人覺得危險，我都見過危險的事發生，有時就係爭嗰一吓就出事，我會覺得既然有能力、有辦法、有時間，點解唔送呢？有時我出去飲嘢都會飲到（凌晨）一兩點，但其實送佢返屋企都係一點，你都唔想俾個女仔有機會講『你自己去玩就得，送我返屋企就唔得』架？其實可以見耐啲傾多啲，都係情趣嚟嘅。」Kathleen也說：「有時見佢好攰，都會話唔使送啦，我落到樓下就有車坐返屋企，但佢都會堅持。」如是者，Stan就堅持了三年多。每次送完Kathleen回家，Stan就要開始長征歸家之旅，他要先坐村巴去元朗西鐵站，再坐西鐵去紅磡，然後再轉過海巴士回海怡半島的家，大約耗時1.5小時，車費接近$40。和他實試了一次，其實真心幾攰，他說有時晚上九時多開始起程送女友，自己再回到家中已經凌晨一點，「我以前讀書見身邊唔少外國人係跨城市拍拖，其實香港已相對好得多，只係我地相對其他香港人來講比較遠箒。」二人試過在節日玩得太夜，Stan錯過了尾班車，惟有坐八折的士回家，結果盛惠$288，所以要慳車錢，就一定要早回家。
Kathleen住在元朗錦繡花園附近，雖然有不少村巴接駁出市區，但中環回元朗的尾班車在晚上七時開出，錯過了就要花多一倍時間回家。
雖然送女友回家這動作真的很舟車勞頓，但其實都是一種情趣。
三件不可以做的事
Kathleen家教嚴，是個灰姑娘，不可太夜回家，加上兩人住得遠，所以拍拖以來都未試過一齊睇演唱會，因為散場後先回元朗的話，Stan之後就會錯過回家的尾班車，Kathleen又說，「我哋食完晚飯都唔可以去飲杯嘢，食個甜品，通常食完就要起程返屋企，接機都唔可以，特別係夜機，因為我接完佢，佢再送我返屋企，又拎住所有行李，咪好戇居囉？所以都傾好咗如果太夜機就第二日先見。」
Stan在港島長大，昔日經常在銅鑼灣一帶流連，去元朗的次數，五隻手指數得晒，「拍拖初期，最得意係摸索點樣離開元朗」，自此，二人約會地點變成了新界西及九龍一帶，他們現時多數集中在西鐵沿線食飯，漸漸發現了荃灣西是個新的拍拖好去處，他們又習慣在約會前想好一切，「會多咗計劃，就好似行山咁，會plan好路線，商量吓坐咩車好。」
車費貴八達通密密增值
一個星期來回元朗鴨脷洲五次，除了時間外，車費都幾誇張，Stan說：「最近有篇潮文講新界西居民坐車好貴，我都好有共鳴，會感受到真係好快就要增值八達通，已經唔識計嗰啲港鐵優惠，有時有，有時又冇，有時又九折……計咁多，不如諗辦法賺多啲、儲多啲錢去坐車好過。」現時坐任何交通工具，十個有九個乘客都係低頭族，但在很多人眼中，Stan應該是個原始人，因為他沒有智能電話，手機冇得上網，但幾乎日日坐長途車，到底點消磨時間？「我會先喺佢屋企下載email，坐車時回覆，之後返到屋企再send，或者睇下書，太攰就瞓囉，都三年幾，好多嘢慣架喇。」Kathleen插嘴說：「所以有時佢出trip會覺得時間好好用，因為唔使花時間搭車。」到底在他們心目中，男朋友送女朋友回家是否「老奉」？Kathleen想了一陣子，「我唔覺得係必定要，最緊要你appreciate呢件事，唔係每對情侶都要咁架，我都唔會迫佢每次都送，但會好多謝，感激佢咁做囉，屋企人都會好放心。」每次都管接管送的Stan，原來也不覺得一定要送，他只稱之為「禮儀」，「我知道一定會有人講閒話，話香港好安全，使乜送？都會有人話做壞規矩，但其實每段愛情都要有人堅持和犧牲，其實Kathleen都有犧牲的，佢為咗我而幫我做嘢，愛情一定要有堅持先可以維持落去，既然玩又夜，送又夜，不如今次送完下次先玩啦，外國人跨城市拍拖都係咁，香港相對來講好小兒科箒，都係嗰句，愛情呢家嘢，食得鹹魚抵得渴嘛。」記者：黃子配攝影：林栢鈞2017果籽繼續認真知味。識買惜用。行以求知。好事多為。重修舊好。緊貼果籽報道，即like：
http://fb.me/AS.AppleDaily
來源:
http://hk.apple.nextmedia.com/su ... t/20170122/19904782
【LongD遷徙】港島東搬入新界西 「本地移民」後悔搬得太遲
1 :
GS(14)@2017-01-23 07:45:55Carrie結婚後成了港島人，在柴灣一住就是八年，她認同港島交通是方便，但日常用品和水電煤都貴得多。
曾經聽過一個來自朋友的朋友的例子，一個在港島東長大的女仔，結識了住在新界北的男友，二人結婚後，決定搬到租金相對較平的上水居住，由港島東搬去新界北，兩個截然不同的區域，幻想每日落街見到的環境、居民、文化完全不同，聽上來好有移民feel。曾任職記者，現職自由工作者的張家蕙（Carrie），自小在旺角波鞋街一帶長大，出來工作後搬過好多次屋，先後住過葵涌、九龍灣，她的丈夫在港島區長大，所以她出嫁後順理成章做了港島人，搬了去柴灣，一住就八年。她以前住柴灣的屋苑，樓下就是各大銀行超市便利店、餐廳酒樓，巴士小巴，應有盡有，「整體上生活網絡是方便的，兩公婆悶悶地想去銅鑼灣吃東西，坐巴士15分鐘就去到，所有事都在咫尺之間。」距離屋苑三分鐘路程還有郵政局，對於工作上經常有文件往來，需要收發速遞件的Carrie來說，最為方便。不過方便背後，其實有代價的，「以前常聽人說香港人和九龍人，原來香港人真的甚麼都貴啲，買餸、電費、煤氣都貴啲。」三年前，因為業主收樓，她決定由港島東搬去新界西，搬到元朗八鄉居住，「移民」去咁遠，平租是主因，「我這裏的租金（八千多元），只可在港島租劏房。」由港鐵路線圖的右下角搬到左上角，她用了很多理由去說服自己，「之前好驚暈車浪，睇屋時都特登揀巴士坐，原來冇事喎，我好鍾意睇日劇，見好多日本人在東京返工，但住喺橫濱，仲遠過我由八鄉出中環返工啦，但佢地日日都咁做，點解我哋唔得呢？」她現時住村屋連天台，實用之餘，總面積比以前大近一倍，住得更舒服，「住過村屋真係返唔到轉頭，交通好容易克服，但屋細咗好難習慣，原來屋大咗，多嘢做咗會好開心，都開始更鍾意陽光，會上天台食早餐、做運動，又會種吓花草，連隻貓都會開心啲。」她還覺得這裏比市區有人情味，起碼鄰居不會各家自掃門前雪，「早幾日我同老公不在家，返來後見到門下有一封掛號信和字條，原來係樓下鄰居幫我收件，那刻會覺得好感動。」不過搬來郊區，附近沒有超市、便利店，買日用品都要坐村內惟一的小巴去錦田或市中心，「以前落街咩都有得食，但而家八鄉，叫個pizza要等兩個鐘，除非好似我咁好鍾意煮嘢食，否則要預咗會好痛苦，同埋租金係平咗，但交通費一定係貴，所以而家坐多咗Uber，因為我唔可以叫部紅色的士入來八鄉接我出市區，又唔可能坐綠的出去再轉紅的嘛。」搬來後，連夜街都去少了，「始終冇咁多車，返到來又黑媽媽，的確係冇咁方便。」她更稱，如果當初有小朋友的話，一定不會搬入來，「除左校網外仲有好多唔方便，要小朋友日日長途拔涉返學，會影響學習成長質素，加上有病痛出入會好麻煩，始終配套冇咁理想。」港九新界都住勻的她，最鍾意又是住哪裏呢？「一定是八鄉，環境真的很好很舒服，我好鍾意山山水水，好後悔遲咗搬入來呀。」
搬入郊區後，生活節奏也慢了下來，Carrie閒時都會上天台食早餐、做運動，甚至睇星星，好寫意。
住在元朗八鄉，最麻煩是交通，如果沒有私家車的話，就只能村內惟一的小巴線或的士出入市區了。
記者：黃子配攝影：陳健邦、劉永發2017果籽繼續認真知味。識買惜用。行以求知。好事多為。重修舊好。緊貼果籽報道，即like：
http://fb.me/AS.AppleDaily
來源:
http://hk.apple.nextmedia.com/su ... t/20170122/19904784