契完即棄Juno炒陳自強魷魚
|
| |
入行十年，三年前轉戰電影圈的Juno（麥浚龍），有老豆揼水開戲自己捧自己，又同前成龍經理人陳自強上埋契合組公司，搵對方搭通天地線拍cult片攻日本市場，但hea足兩年有多，Juno認為契爺「幫唔到手」兼倒水，早前已將每月袋十萬的陳自強炒魷。冇乜聯絡 上週一（十月二十一日）晚，Juno籌備兩年，投資二千萬的新戲《殭屍》首映禮，新戲參加了多個國際電影節，Juno又被提名金馬「最佳新導演」，當晚有不少圈中人俾面撐場。 頭威頭勢，初做導演兼老闆Juno全晚風騷拖住日籍監製清水崇滿場飛，反而兩年前跟他合組公司的陳自強卻姍姍來遲。 過去幾年，Juno不時孖住契爺陳自強出席活動，就連加片酬、拍危險場面都問過老人家，但近日做新戲宣傳時大多單拖出現，亦甚少提及對方。原來自從有日籍恐怖片大師清水崇做扶手棍後，這一年來，Juno已經鮮有跟陳自強聯絡。 月薪十萬 「Juno幾個月前已經炒咗Willie（陳自強）魷魚！當初搵契爺一齊搞電影公司，都係想借佢老人家嘅人脈網絡同打入日本市場，不過過咗兩年，拍咗套《保衞戰隊之出動喇！朋友！》，之後話會搵關錦鵬監製一套同周冬雨合作嘅文藝片，結果又冇曬聲氣。其實○七年冇再幫成龍之後，Willie今時不同往日，就算佢親自出馬去日本，都冇乜嘢搞到出嚟，所以呢兩年都冇嘢做到；就算今次係Willie嗌惠英紅、鮑起靜同陳友幫Juno拍《殭屍》，但Juno見每個月出成十萬蚊糧俾契爺，又幫唔到幾多，梗係cut啦。」知情者說。契仔用完即棄，有過幫成龍開山劈石，到頭來不歡而散的創傷後，跟Juno只得幾年「感情」的陳自強，已不似當時，晚晚借酒消愁，首映禮當晚，更刻意悉心打扮，好頭好尾。「嗰晚Juno有dress code，叫大家著黑色襯番套戲嘅mood，Willie同佢咁少聯絡，梗係唔知，所以咪著到成身紅咁去睇首映。」Juno身邊人說。 曾經風光 72歲的陳自強，90年代被稱金牌經理人，一手將成龍由香港打入日本市場到躋身國際。事業輝煌期，手執張曼玉、鍾楚紅、張學友、王祖賢、鄭裕玲、關之琳等巨星；後期亦有為吳彥祖及陳冠希出過力。07年成龍不顧恩情，將一手打造他成為巨星的陳自強踢走，難以承受炒魷打擊的他，一度意志消沉，終日借酒消愁。11年，陳自強獲金像獎頒發專業精神獎，表揚他在業界的貢獻；張學友更在紅館個唱為他獻上一曲《My Way》，藉以感激對方。 |
Wyman借Juno搞喊人
1 :
GS(14)@2015-07-23 08:40:13■麥浚龍與謝安琪的《羅生門》搞喊樂迷，Wyman亦指久未試過。
麥浚龍（Juno）繼11年前推出歌曲《耿耿於懷》後，今年先後推出續集《念念不忘》和《羅生門》，前日《羅》面世後在網上被洗版狂loop，不少網友聽到喊，填詞的黃偉文（Wyman）昨在電話說：「好耐冇試過，我都喊咗成晚！十萬個人問我點解咁殘忍，摧毀佢哋十年嚟嘅夢？而家你鬧我狠，但三五七年後，你醒咗會多謝我。」
Wyman 資料圖片
至於將跟Juno合唱外傳《雷克雅未克》的周國賢，就在電話中透露：「其實我只係唱最尾幾句。Juno叫我寫一首好癲嘅歌畀佢，我將畢生功力放入歌，出嚟超難唱。」採訪：皓騫
來源:
http://hk.apple.nextmedia.com/entertainment/art/20150723/19228609
Kay唱得留手開解前度《羅生門》狂熱 Juno席捲iTunes
1 :
GS(14)@2015-07-26 15:06:49■Juno盛讚Kay演繹新歌《羅生門》時，唱得好好。
麥浚龍（Juno）的三部曲《耿耿於懷》、《念念不忘》及跟謝安琪（Kay）合唱《羅生門》，短短三日在YouTube有逾50萬點擊，《羅生門》更被網友捧為神曲，一夜爆紅的Juno連舊歌都翻hit，雄霸iTunes歌曲下載榜，十二大位置獨佔九首，僅何韻詩《是有種人》及陳奕迅《無條件》能守住第五及第九位。
■Juno舊歌翻hit並雄霸iTunes歌曲下載榜，十二大位置獨佔九首。
Juno前晚在電話親自解構三部曲，他說：「其實入行第十年，咁啱我同Wyman（黃偉文）諗到『念念不忘』呢個term，如果冇一個至少十年，點稱得上念念不忘呢？我哋去發展《耿耿於懷》呢個男仔，當佢係一部電影咁，包括Karen（莫文蔚）、Kay、周國賢，甚至乎我自己，其實都係喺《耿耿於懷》個世界。」《羅生門》就是故事的里程碑，Juno說：「有能力摧毀呢個角色，我相信世上得兩個人，一個係我，一個係黃偉文，我覺得Kay唱得好好，Karen喺《瑕疵》都係，佢哋演活咗我幻想呢個世界嘅角色，我搵Karen飾演而家嘅女朋友，我係從中感受到Karen有一種淡然，而透過Kay嘅聲音，感受到嗰種不捨。」
■Juno在《羅生門》MV中輕撫Kay的臉龐。
Kay：最難係感情
歌曲女主角Kay接受電話訪問，笑言自己跟《羅生門》好有緣：「之前我有隻歌《最好的時刻》都係出自狄更斯，另一首《臨崖勒馬》係講福島地震，我又喺冰島影過封套《慢活》，做新人時，有人問我鍾唔鍾意Hello Kitty？我真係唔係特別鍾意，呢啲細微嘢咁蹺同故事主人翁一樣，我都同Juno講番，好似冥冥中嘅緣份。」問這首歌是否好難唱？Kay說：「唱就唔難，最難係感情，有啲人覺得女主角好絕情，其實我覺得唔係，我特登唔唱咁絕，我唱嘅時候都留手，想開解番前度，晚晚睇女仔fb，攞手機睇佢有冇online，令人好心酸！」採訪：盧妹、皓騫
來源:
http://hk.apple.nextmedia.com/entertainment/art/20150724/19229825
Juno冇諗阿嬌唱《羅生門》
1 :
GS(14)@2015-07-30 08:19:38麥浚龍（Juno）和謝安琪（Kay）昨日在商台宣傳合唱歌《羅生門》，外界猜測這歌中提到跟前女友有十年之約的女主角是鍾欣潼（阿嬌），Juno否認並指只是一個角色，他說：「全件事係10年前首歌《耿耿於懷》開始架構，歸功於黃偉文，我只係一個導演。」至於唱此歌時可有想起阿嬌，他說：「我只係成日諗起Kay。」
Juno和Kay同樣感覺此次合作很夢幻，Kay謂二人差不多時間出道，大讚Juno成熟、有男人味。另外，最近有情侶分手，男方激動企圖自殺，女方用他們合唱歌的歌詞抒發感情，Juno說：「希望大家都和氣，聽眾有佢哋嘅智慧，唔好聽到自毀。」採訪、攝影：王連連
來源:
http://hk.apple.nextmedia.com/entertainment/art/20150730/19236438
有話兒：當電影寫延續篇Juno拆解《羅生門》
1 :
GS(14)@2015-07-31 08:43:17■麥浚龍前日接受專訪時，親自剖析在網上被熱炒的新歌《羅生門》。攝影：陳順禎
麥浚龍的新歌被熱炒，連帶出道13年以來的舊作都重見天日。《羅生門》是繼電影《殭屍》後，令他再度被網友瘋狂洗版，被抽水抽到太平洋也乾了。前日Juno接受本報專訪時，坦言如果只做一首歌回應《耿耿於懷》，他沒有興趣，要做便做六首歌講述整整12年的故事，他也笑指自己太誇張、太貪心。撰文：盧妹
【首部曲《耿耿於懷》】■《耿耿於懷》系列，第一代女主角吳日言。資料圖片
【二部曲《念念不忘》】■Juno上月推出新歌《念念不忘》，向首部曲《耿耿於懷》作致敬。互聯網圖片
【三部曲《羅生門》】■Juno邀得女神Kay合唱的《羅生門》MV昨日終在網上公開。互聯網圖片
麥浚龍（Juno）的出品雖然不多，但他的麥氏風格越來越成熟，由青澀地訴說《耿耿於懷》，害怕再沒法戀愛，到12年後幽幽地透露念念不忘的心情，淒美愛情故事中間原來隔着《羅生門》，他說：「如果只係做《念念不忘》講番12年前呢個男仔，吸引唔到我去做，我好貪心，想知道12年後呢個男仔更多嘅事。」《羅生門》令人憶起心裏的那個「她」以外，亦令人猜想Juno心中的女主角是否前緋聞女友鍾欣潼（阿嬌）？他斷然否認：「唔係，因為我哋個方向明顯係12年前《耿耿於懷》，的確Hello Kitty同茉莉香水係有解釋嘅，12年前真係興呢兩樣嘢，但係我阻止唔到人哋嘅幻想空間。」
■Juno前日帶來一支來自紐約的黑色礦泉水blk.受訪。
■做過導演的Juno，愛上以第三身角色說故事。
一早睇中Kay與Karen
其實Juno思想是「堅離地」的，他笑指自己是監製，與黃偉文同時擔任編劇：「係承接12年前個故事，睇吓可以點進化。人性好複雜，分離唔代表兩個人唔愛，相愛亦唔等於好了解對方，《羅生門》兩個人係分開但愛對方，不過唔了解對方，當中有好多誤會，就連佢哋承諾10年後相約嘅地方，竟然都係誤會，男仔以為去冰島，女仔以為去福島，去表達個男仔嗰種盲同缺點。」當過導演的Juno，明顯愛上了這個第三身的角色，為歌曲注入電影感，以六個分段集合為一齣戲：「拍完電影，我習慣咗講故事嘅模式，有得呢個12年前嘅男仔，就會想知12年前嗰個女仔，即係Kay（謝安琪）嘅相反視點，同埋呢個男仔12年後嘅現任伴侶點睇，即係Karen（莫文蔚）。」Juno直言自構思「他」的故事開始，已經意屬Kay與Karen：「我同Karen識咗好多年，佢有種淡然感覺，而Kay好叻運用把聲、有種不捨，兩個都係我第一人選。」
■Juno與女友戴庚玲感情穩定，但暫無意結婚。資料圖片
「如果結婚我會講」
提到Juno近年常涉足做導演，問他會否考慮把《耿耿於懷》系列拍成電影？Juno坦言有人邀請他把故事拍成電影：「暫時未有時間。我唔排除12年後再做，但係一定要有message畀大家，唔會為而家反應好而做。」回到現實世界，日前戴庚玲（Janine）被指在Instagram上疑似暗示二人訂婚，Juno聞言謂：「幻想力豐富，而家冇諗過結婚，但係唔特別相信愛一個人就等於要結婚，而且現實好多人結婚都可以唔牽涉愛，如果有日結婚我會講。」化妝：Khaki場地：day off cafe
來源:
http://hk.apple.nextmedia.com/entertainment/art/20150731/19237672
Juno爆劇情：去過冰島
1 :
GS(14)@2015-07-31 08:43:36Juno的《耿耿於懷》加上新碟的六首新歌完成橫跨12年的七部曲，由《耿耿於懷》開始，然後是思念成癮的《念念不忘》、繼而是與現任女友的《瑕疵》，12年後前度坦白心聲的《羅生門》，男孩赴約到他以為相約的地點冰島而衍生的《雷克雅未克》。然後呢？
Juno預告新歌的概念：「個男仔最後有去到冰島，不過遇唔到呢個女仔，因為個女仔去咗福島，其實呢件事係幾浪漫嘅。之後《睡前服》講個男仔失眠，以為自己打電話畀個女仔，又好似唔係，好似夢遊咁。《單魚座》就真係一半真一半假，Wyman（黃偉文）有日話想寫我個星座（雙魚座），我發現有啲準有啲唔準，於是就寫咗呢個有缺陷嘅雙魚座變成《單魚座》。」 Juno又謂真的有去過冰島旅行，因為自小已經覺得那裏很美。
來源:
http://hk.apple.nextmedia.com/entertainment/art/20150731/19237674
Juno現身合唱《羅生門》Kay澳門騷即腩爆爛Gag
1 :
GS(14)@2015-10-12 14:25:42【不慎露腩】■謝安琪前晚在澳門開騷，着露肩裝襯半截長裙，失手露出豬腩肉。
人妻謝安琪（Kay）前晚在澳門舉行「拾回謝安琪數愛世界巡迴演唱會」，為入行十周年的巡唱揭開序幕，Kay以神奇女俠谷胸騷腿look勁歌熱舞，性感打扮令觀眾大飽眼福，不過，Kay換露腰裙跟麥浚龍（Juno）合唱《羅生門》，卻不慎即出一團豬腩肉，大煞風景。連續三屆蟬聯高登女神的Kay，一直迷倒萬千網友，前晚以六套性感戰衣登場，唱《羅生門》時着露肩裝襯半截長裙，失手露腰間贅肉，當時台上螢幕播出Juno錄像的唱歌片段，觀眾還以為兩人隔空合唱，怎知尾聲時Juno突然出場跟Kay合唱，掀起全晚高潮。
Juno自嘲不善辭令，加上沒甚台風及多着黑衫，笑說：「我喺後台諗，你可以做一個紙板嘅我，倒咗我嘅模加啲白鬚上去，公仔只要識左右郁動同揮手就得。」Kay聞言回以爛gag：「如果面前有隻猛獸喺籠入邊，我想走入個籠，你會同我講啲乜？」Juno靜了幾秒，台下觀眾搶答：「麥浚龍（勿進籠）！」全場大笑。
【世紀合唱】■謝安琪和麥浚龍合唱《羅生門》，掀起全場高潮。
【谷胸女神】■人妻Kay以神奇女俠look騷腿，在性感女舞蹈員陪伴下勁歌熱舞。
【百變形象】■謝安琪全晚換了六套性感戰衣。
觀眾盜錄擺上網
完騷後，Kay自爆有件歌衫因太大不停下滑，工作人員要衝上台為她換衫，Juno笑說：「你之後嘅演出，換衫位置可請我做。」昨有網友已急不及待將在場內盜錄兩人合唱短片擺上YouTube，指Juno似感冒唱歌好細聲：「Kay好似特登細聲啲畀Juno把聲出？」、「Juno把聲係咪畀佢pat鬚隔咗音」。此外，前晚Kay唱出十年的代表作，包括《勢不兩立》、《獨家村》、《鍾無艶》等歌曲，最後以首本名曲《囍帖街》為個唱劃上句號，而Kay的香港站演唱會將於明年4月假紅館舉行。撰文：皓騫
來源:
http://hk.apple.nextmedia.com/entertainment/art/20151012/19329483
阿嬌唔怕Juno同場
1 :
GS(14)@2015-11-02 08:53:00■阿嬌前晚與因工作缺席頒獎禮的Juno（小圖）緣慳一面。
「香港流行音樂MV頒獎禮」前晚在九展舉行，鍾欣潼（阿嬌）與蔡卓妍（阿Sa）的Twins和麥浚龍（Juno）分別憑《LOL》和《羅生門》MV攞獎，除阿Sa外，Juno亦因工作未有出席，與阿嬌緣慳一面。問阿嬌會否親自執導拍MV？她表示未有此想法，問是否喜歡拍片？阿嬌說：「真係好少。」會否怕跟Juno同場尷尬？阿嬌說：「冇呀，佢嚟唔嚟關我乜嘢事箒？見到咪Hi囉。」跟Juno是否沒聯絡？阿嬌反問：「佢唔係自閉咩？」
麥浚龍（Juno）資料圖片
同場的吳若希對於有報道指她與鄭俊弘一齊出騷合共收2萬5千元酬勞，吳若希寸爆回應：「你哋信唔信吖？呢啲新聞都係搵嘢嚟寫。」採訪：盧妹攝影：陳俊強
來源:
http://hk.apple.nextmedia.com/entertainment/art/20151101/19355334
Next Page