| ||||||
之前《壹》仔爆過黃氏兄弟（黃桂芬、桂榮及桂強）犯罪家族後，連葉劉都話跟細強（三弟黃桂強）影咗相後，怕會被人利用，但同為立法會議員嘅毓民就無有怕，之前佢議員辦事處搞母親節晚宴聚會時，不但主動請來細強，仲大方同佢合照，睇來大家關係親密。 講開細強，雖然來自犯罪家族，但交遊廣闊，爆哥有不少江湖朋友都認識佢，不過好多人唔知佢原來跟14K馬德（細圖）出身，馬德都好傳奇，當年撈地下賭檔有聲有色，仲有搞外圍波馬，好多差人劈炮跟佢搵食。馬德後來轉會去咗新義安，03年佢帶人親自踩上向華勝當時女友張玉珊嘅修身堂公司，追討向氏欠佢嘅六百多萬賭債，作風相當強悍。之後馬德過澳門撈賭，跟14K九指華合作，亦因九指華代佢追同門差佬文五百多萬賭債，而引致差佬文在澳門被人殘殺及碎屍，疑犯九指華事後著草泰國，馬德卻因此案而正在澳門服刑，相信出得嚟都八十幾歲咯。 老蘭迴轉黑的屠場 蘭桂坊的士劏客，呢一年警察多次「做樣」掃蕩拘捕，估唔到「黑的」依然有恃無恐，當正自己持牌劏人。上個禮拜爆哥同班股票炒家喺中環老蘭劈酒，凌晨時分大家飲到啤啤夫，於是截的士返屋企睇波。爆哥見到等客的士不斷圍住雲咸街、德己立街同威靈頓街駕駛，睇落好似迴轉壽司，於是用廣東話問：「過唔過海？」問咗十幾架的士，點知全部黑的司機，一見唔係情侶又唔係外國人，即耍手擰頭，寧願空車繼續迴轉等客，好多人又爆粗又拍門，班的士佬一於少理，附近差人又當睇唔到。後來隔籬一pair鴛鴦慾火焚身，睇落係趕住去爆房，唯有捱貴急急腳上咗車做水魚。爆哥聽行內人士講，老蘭黑的有一個「暗標價」，最誇張中環過灣仔要三百，過海去尖沙咀狼死到要五嚿水，如果落雨仲要加價，離曬譜。黑的一晚劏廿個客，月入隨時超過三萬，認真和味！爆哥覺得蘭桂坊係遊客天堂，警方打擊佔中不遺餘力，對佔中黑的就冇大力掃蕩，認真係香港之恥！ 中環大行幫客揀新抱 話說爆哥有個索爆銀行女友Apple，平時佢喺中環總行見到不少富豪大客出入，銀行為咗留住呢班大客，無所不用其極，Apple爆咗一個銀行「keep客」嘅撒手鐧，佢話提供幾多優惠都係假，最緊要親上加親喎！話說某大銀行會幫大客嘅寶貝仔，搵番一個靚新抱囉。早排某上市公司主席個仔，被傳媒影到佢喺殘廁攬女嘆咖啡，做老豆梗係擔心，佢對外死撐話︰「我個仔好乖好怕醜，而家都冇女朋友。」總行高層一聽到，本著加強「客戶服務」嘅熱誠，拿拿臨介紹幾個美貌與智慧並重的女職員俾公司主席啦。不過Apple話，總行內部反應一般，個個職員嫌主席個仔cheap，連幾千蚊開房錢都慳。爆哥即刻同Apple講，爆哥為人豪爽，唔會同女仔去殘廁gathering，閒閒哋都會去半島酒店開支香檳啦，不如介紹來認識嚇。 | ||||||