|
||||||
上星期在台灣小巨蛋舉行一連兩場「舞臨盛宴」演唱會的郭富城，完成手頭上的電影後，下半年將會放更多時間作世界巡迴表演，加上今次台灣站大收旺場，令城城的巡迴檔期爭爆頭。 有價有市，與李澤楷旗下「大國文化」的合約今年九月期滿，為免這嚿肥豬肉落入其他公司手中，小小超指派了Now話事人何麗全出動人情牌，又開出天價一億，誓要將金蛋留低。九月約滿 郭富城將「變形金剛」舞台搬到去台灣，作為海外演出首站，最高票價要五千八百元台幣（約港幣1560），較一般演唱會貴，但依然全場爆滿，當地人更對城城演出有高度評價，台北市長郝龍斌更專誠前往捧場。 開頭開得好，其他地方包括國內多個省市及美加，紛紛敲門要求鎖期，但到目前為止，郭富城只落實九月的新加坡及澳門演出。 據知，由於城城與「大國文化」將於下月底完成澳門演唱會後便正式約滿，未傾妥新合約前，經理人小美謹慎行事，其他地方演出，一律hold住。 「其實小美同城城有考慮過唔再簽唱片公司，好似之前有兩個大陸財團，出高價想簽城城大陸演唱會代理權，再搵埋小美做其他人演唱會監製，條件吸引，但小美都 冇興趣；況且向來演唱會同唱片製作都係佢公司自己做番，只需要傾掂發行就搞掂，的確可以做到肥水不流別人田。」小美身邊人說。 不過，李澤楷旗下的「大國文化」卻不願放人，加上電視台Now要大搞，爭取免費電視牌，絕對需要有個天王坐鎮，壯大聲勢。 三年五十場 為留低公司金蛋，李澤楷一早委派向來同城城及小美關係良好，有超過廿年交情的Now話事人何麗全出馬，希望動用人情牌留人。今次城城到台灣開騷，何麗全特登跟住飛，爭取共處時間氹掂城城。 「城城嘅巡迴啱啱先開始，但國內好多唔同地方都主動搵『大國文化』傾，爭住出價，想今年內搵城城到當地演出。不過一日未續約，都冇辦法傾落去，為咗唔想走寶，公司開出一億續約費利誘，當中包括三年內做五十場巡迴演唱會。」知情者說。 開設頻道 為表誠意，何麗全打算在Now開設一條郭富城頻道，專門播放他的MV、演唱會及電影，進一步肯定城城鎮台地位。至於城城是否九月與「大國文化」約滿，小美 直認：「係！而家同何生（何麗全）係有傾關於續約嘅事。（進展如何？）暫時未有嘢可以講到，不過合作咗咁耐，雙方都有默契同感情。（係咪收一億續約費？） 數字呢樣嘢我一向都唔講。」 大牌話事 樂壇天王、天后買少見少，唱片公司為了招攬大牌，不惜開出天價利誘，合約條款自由度高，阿哥阿姐話晒事，乜都得。 鄭秀文04年，Sammi約滿華納，有傳林建岳以六千萬包薪三年力邀她加盟東亞，又請埋其經理人郭啟華加入任職顧問，合約中並沒有規定Sammi每年的工作量，自由度甚高，最終成功打動天后過檔。 劉德華07年，傳劉華袋1.5億天價簽約東亞做歌手，為期三年，內容包括由92年開始推出的500首歌曲版權賣斷，至於經理人合約仍屬華仔自己擁有。 王菲97年剛誕下竇靖童後，王菲以六千萬簽約EMI兩年復出，並要求不再出廣東大碟，只錄製國語碟。 | ||||||