慳錢飽肚頹食 2014年08月28日
1 :
GS(14)@2014-08-30 22:47:20http://www.am730.com.hk/article-224196\r\n\r\n香港物價高就係人都知，出街食餐飯，閒閒哋都要過百蚊；但如果你要求唔算高，只要食得飽而又唔委屈自己的話，以下喺價錢同口味方面都算大眾化嘅推介，可以不妨參考下。\r\n文：77合作社\r\n\r\n1. 波仔飯\r\n提到飽肚又抵食嘅頹食，點少得高登仔極度推崇嘅波仔飯盒？$12-15一個叮叮飯，有時仲有lunch套餐，$20就有飯有菜仲有糖水飲添！或者你會話，「車！周街都有啦！」咁你就唔識食喇！波仔勝在有N種口味，咖喱、菜飯、意粉，仲有蒸荷葉飯，連沙爹XO醬炒飯都有，問你服未！\r\n$12-20(指定種類)\r\n\r\n2. 忌廉檳\r\n識食麵包，梗係要食兩個再飲兩杯水，就算你個胃有牛咁大都夠晒飽。但我哋做人點可以冇要求呢？頹食唔等於劣食，嘉頓忌廉檳就係麵包界嘅王道，脹澎澎嘅麵包，包住一pat肥到漏嘅cream，卡路里爆晒錶，啱晒鋼條型(即係瘦猛猛)毒男，一邊打機一邊醫肚。\r\n約$5.9\r\n\r\n3. 快熟通心粉\r\n淨係聽個名就知有幾頹，趕食飯趕返工嘅打工仔最緊要快，而且佢味道多，要肉味有牛肉味、雞湯味，仲可以豪食鮑魚雞味；如果你食得嘴刁仲有鮮蝦味，咁都未夠，連食齋嘅人都有鮮菇上湯味，但最緊要都係幾蚊一包，唔夠飽仲可以食夠兩包，10蚊有找。\r\n$4.6/包\r\n\r\n4. 待用飯\r\n待用飯係咩？係善心人幫助捱餓人享用免費食物嘅捐助囉！如果閣下有份工，但係啲人工為咗用嚟還債、交租、供樓、定係養二奶，搞到三餐不繼咁陰公，只要面皮夠厚又過意得去，咪走去有待用飯提供嘅地方食餐飯囉！一蚊都唔使㗎！\r\n$0\r\n\r\n5. OREO\r\n實淨到可以用嚟掟人嘅曲奇，一睇就知係好嘢啦！一筒咁多塊，點會頂唔到肚？食得刁鑽啲，學埋籃球員姚明，買埋盒奶，「一Lam，一浸」，不知幾有營養，都係加多$6.5，Total$15，抵呀！\r\n$8.5/筒\r\n\r\n6. KFC大桶飯\r\n咪睇小呢個大桶飯，不知餵飽幾多冇飯到肚唔識飽嘅人，坦白講，KFC專做炸雞，味道有保證，仲有幾條蔬菜，有纖維到肚，唔怕會便秘，咩話？嫌人哋啲餸少？叫得大桶飯，梗係啲飯先至係主菜啦！\r\n$20.5\r\n\r\n7. 營多撈麵\r\n瘋魔一時嘅營多撈麵，無論七仔、士多、小食店統統都有賣，$5個快靚正，想再更慳？自己去印尼士多買，計起都係$2.7一包！但正常男仔應該食2包先夠飽肚，喂！大佬，2包都係$5.4啫，仲想點？\r\n$13.5/5包\r\n\r\n8. 杯麵\r\n杯麵呢個偉大發明，曾經列入十大窮遊歐洲必備美食頭三甲！加熱水三分鐘就開得餐，飽得嚟真係好食啊嘛！冇益？太空人都食佢啦！又唔係叫你日日食，你淆咩底啫？\r\n$6.5\r\n\r\n9. Subway\r\n外國健康快餐文化打入香港咁多年都做唔起，咪又係因為「貴」！但自從做咗個$25combo，就多咗好多OL幫襯！一個包符合晒健康飲食金字塔嘅營養，多菜少肉，加埋嘢飲都係$25，慳埋慳埋儲起買限量版手袋，又真係幾鬼吸引，唔怪得連球王比利都話正！\r\n$25/6吋\r\n\r\n10. 一蚊雞加白飯(稻香)\r\n睇過唔少勇者share淨叫一蚊雞加白飯嘅經驗，事後當然俾人插爆佢哋厚面皮啦！但又真係你敢order稻香敢serve喎！加加埋埋茶位同加一都係$20左右，抵到爛！怕食唔晒仲可以叫半隻，$0.5，唔使做大嘥鬼之餘又慳到錢兼飽肚，叻叻豬！\r\n$20\r\n(已包加一同茶位)