📖 ZKIZ Archives

對一班無甚心思的港男來說，要諗送咩禮物俾女朋友，足以頭痛過諗如何打爆機。三個好友：Mable（劉智美）、Samantha（周綺霞）和Fung（林方龍）的共通點，都是喜歡花心思、諗禮物。結果他們夾手夾腳想出送禮app—Pressie，將不同牌子的商品重新組合，「打包」成禮物或活動，解救一眾港男。可惜此app只紅個別product不紅公司本身。今次，本刊找來想出用手機app捉鬼的荔園後人、香港資訊科技聯會會長邱達根品評。他認為此app似event company（活動統籌公司）多過購物app，要發圍要諗計。我點sell：幫人製造驚喜！

依家香港人工作太忙，壓力又大，我哋推出Pressie呢個app，希望可以透過送禮物去氹人開心。Pressie係一個送禮app，喺我哋平台上，有不少產品俾顧客挑選，大部分嘅產品我哋都重新包裝，背後隱藏驚喜。例如我哋分別搵到做餐廳及餐酒嘅商戶，將兩者結合為一個產品，客人在餐廳食飯後會送支紅酒。又或者客人選購咗份禮物後，我哋會幫你包裝好，送到朋友屋企。有時我哋仲會與不同品牌合作，推出獨家商品。例如之前就同花店合作，在花束旁加上小王子擺設，再用玻璃罩住售賣。呢個產品反應非常好！我哋希望透過貼心嘅服務，及出售特別產品，令香港人唔會錯過任何一個重要時刻，同屋企人、愛人或者朋友分享快樂。暫時Pressie推出咗半年，已有八千幾位用家。我哋亦試過同K-11、HMV、The Grand Cinema合作搞活動，反應都唔錯。我哋九個人的團隊，會不時諗好多創新idea，務求令每個客人都可以喺Pressie度，搵到適合又特別嘅禮物送俾身邊人，可惜我哋唔夠media budget去賣廣告，只好不停搞co-branding event，希望打響名堂，呢方面要請教邱達根先生。

專家盤問：產品唔夠exclusive

邱：邱達根P：Pressie

邱：Pressie現時有幾多download？有無做咩marketing去宣傳？P：Pressie大約有一萬九千個download，我哋試過落facebook和Google廣告，亦會透過和不同的品牌合作做推廣。我哋之前試過和HMV合作，情人節時喺HMV店內做宣傳去谷download，客人如果下載Pressie app，在HMV內買嘢可以享有九折優惠。透過每次和不同品牌合作搞活動，有助增加Pressie的交易量和下載量。

邱：暫時最多人在Pressie買咩？送禮對象是女朋友定小朋友多？P：送俾女朋友多啲。我哋嘅對象係young professional，佢哋部分有自己的family和小朋友。我哋有時都有相應的產品賣，但Pressie唔係專注喺family或者baby gifting。我們賣得比較好的產品，大部分都有talking point，好似我哋會和不同品牌合作，在Pressie推出一些獨家商品，例如搞藝術團，去ATUM品嘗dessert及搵巴塞隆拿的文字藝術師喺筆記簿刻名。一般嚟講co-branding嘅商品都賣得比較好。

邱：你哋exclusive產品唔夠多喎！P：我哋有啲產品睇落平平無奇，但唔少都暗藏驚喜。睇落似normal deal，其實大部分都有add-on service喺入面，例如你可以在app上面買一間餐廳的晚餐，但食飯嘅時候可能會送多一個生日蛋糕，或者一支酒俾你。

邱：有不少香港人都鍾意用好抵嘅價錢去「執筍嘢」，你們有沒有類似的優惠？P：雖然Pressie唔會玩劈價，但我哋都有weekly surprise，有時可能是價錢上平少少，可能是咖啡半價。有時就有特別的產品推出，例如我們有推出過99蚊自己調配香水，反應都唔錯o架。

邱：其實你賣俾個客的價錢要盡量平，唔可以貴過出面，咁中間的margin夠唔夠你營運和用作將來擴充？P：暫時嚟講算OK，因為我們和團購嘅形式唔同，有啲知名的團購公司都係先劈半價，然後再扣commission rate，要好多成交量先cover到筆數。但我們是透過出售exclusive嘅商品，客人喺外面買唔到呢啲商品，自然可以drive sales，變相我們賣的量唔需要好大，但我哋可以做到佢哋（團購）的成績，兼且有餘。

邱：如果你靠搞活動不停在small group drive下載量，每次一千、幾百人，個量唔夠大之餘，上一批嘅客又未必啱你下一個event，咁樣可能會流失之前嘅客，然後你又再搞event去吸客，咁樣其實你會唔會好似一間event company？P：Co-branding event，只是我哋其中一個方法去提高知名度。我哋每個月和不同品牌搞活動，只是想將更多特別嘅禮物放上Pressie app，令客人喺繁忙嘅時候，都唔會錯過任何一個機會去愛身邊的人。所以event並非主導，只是我們缺乏media budget，只好透過活動去令更多人認識我哋。

終極判決：要成為一個trend

唔好講幾多分啦，我唔鍾意用分數嚟衡量一件事，但Pressie透過送禮物去帶俾人開心感覺，和link up朋友間友誼，呢個出發點唔錯。加上現階段香港未有太多同類型app，都是他們的優勢。但透過搞不同marketing events，雖然可以吸到不同嘅客，但要注意點留住佢哋，令佢會繼續在app上面買嘢，之後要重點做多啲同類型活動。Pressie現時的用戶人數不多，知名度亦唔夠高，我認為無論在facebook，抑或喺手機app，都要令佢成為一個trend，先可以吸引更多用家去download。我覺得送禮物俾朋友並唔係大趨勢，唔會有好多人日日送禮物俾朋友，所以我建議他們從慈善方面入手，當客人在Pressie app上買嘢，原來過程中幫到人，做咗件善事，或有助Pressie打響名堂，令更多人認識呢個app。

撰文：蔡璿驩攝影：關永浩攝錄：廖健昌[email protected]