【《蘋果》專訪】飛圖一代K后 投資損手逾千萬48歲梁雁翎復出開騷
1 :
GS(14)@2017-04-09 10:49:36■梁雁翎曾被封K歌之后，她下月復出開騷，日前受訪時擺出當年熱爆K歌《像霧像雨又像風》甫士。 攝影：陳慧安
那些年卡拉OK在香港掀起熱潮，始祖飛圖唱片股東兼歌手梁雁翎被封K后，其金曲《像霧像雨又像風》、《你歌我歌》晚晚向觀眾洗腦，在無綫廣告時段滾筒式狂播，自飛圖賣盤、嫁醫生老公後退出樂壇，梁雁翎經歷過投資失敗逾千萬。神隱多年的她捲土重來，48歲再踏舞台於下月假麥花臣場館開騷。
現年48歲的梁雁翎生於北京，85年參選第一屆亞洲小姐入行，之後轉戰樂壇投資成立飛圖唱片，成功打開卡拉OK市場做K后。神隱多年的她日前在觀塘的K房接受《蘋果》專訪，當年一把長髮，現在只過膊頭，但兩鬢蠟起的招牌髮型不變，做出招牌台風連唱K歌《像霧像雨又像風》和《你歌我歌》，風采依然。
■當年《像霧像雨又像風》曾於無綫以洗腦式宣傳。互聯網圖片
■舞蹈員出身的謝天華（右）曾為梁雁翎的MV伴舞。互聯網圖片
開創先河
卡拉OK於80年代尾在港盛行，梁雁翎因為有份投資製作卡拉OK的MV生意而被譽為第一代K后，她自信的說：「我當之無愧，我覺得卡拉OK女王或天后係有幾個因素先做到，首先我係卡拉OK公司股東，我未做歌星時都拍咗好多歌，加埋都成百隻，人唱得，個樣都睇得！」問到當年為甚麼投資卡拉OK？梁雁翎說：「當時唱K得日本歌，中國咁大市場，國語歌同廣東歌應該有得做。自己屋企冇太多錢，我投資只係第三大，股本100萬，自己做埋統籌製片，第一首歌拍《千個太陽》，之後大家見到有錢賺，寶麗金、華納加入，佢哋擁有最多歌曲版權，所以我哋成立唱片公司自己創作歌曲。當時好多國語歌卡拉OK由我幕後代唱，其他股東叫我做歌手幫公司。」
■昔日飛圖捧紅過不少歌手，除梁雁翎外更有張智霖、許秋怡和趙學而。
■12年梁雁翎曾擔任黃凱芹的演唱會嘉賓。資料圖片
■48歲的梁雁翎下月開騷，早前性感上陣拍海報。
學識理財
梁雁翎是飛圖第一位歌手，推出歌曲《像霧像雨又像風》即hit爆，首張唱片得到雙白金佳績，銷量高達10萬，飛圖亦是首間在無綫買廣告時段宣傳的唱片公司，梁雁翎笑說：「大老闆葉生（葉志銘）好叻，好多策略係佢諗出嚟。」問到當年一手創立飛圖，是否覺得轉讓了好可惜？她說：「係呀，公司好似BB咁誕生，中途夭折好唔捨得，但當年盜版好犀利，冇辦法，真係好傷心。」喜歡唱歌的梁雁翎，從來沒離開舞台，她說：「05年有喺內地出碟，一直有登台。有段時間投資，金融風暴損手7、8位數，覺得要學理財，喺保險公司進修理財課程。」梁雁翎更決定復出舞台，於下月7日假旺角麥花臣場館舉行一場演唱會，她說：「有壓力，因為要唱20幾隻歌。年紀大啦，肯定冇以前咁靚。」採訪：余燕儀、懷鈺場地：Neway＠apm
來源:
http://hk.apple.nextmedia.com/entertainment/art/20170409/19984207
【神還原】梁雁翎重新演繹飛圖經典金曲
1 :
GS(14)@2017-04-09 10:49:36呢招港女十式其中一式，梁雁翎已經喺90年代做過，算係鼻祖啦。(MV截圖)
當年日播夜播飛圖卡拉OK廣告雜誌，如果你係80前一定上晒腦飛圖嘅經典金曲，梁雁翎(Annie)作為第一位飛圖歌手，佢嘅歌多到數唔晒：《像霧像雨又像風》，當年、同黃凱芹合唱嘅國粵語合唱歌《哪裡的天空不下雨》；同蔡濟文合唱嘅《慢慢地陪著你走》，雖然Annie主力唱國語歌，但都有出過廣東歌好似《浪漫故事》同快歌《你歌我歌》等等。梁雁翎日前喺K房接受訪問時，仲現場演繹佢嘅金曲《像霧像雨又像風》同《你歌我歌》，唔好等，即刻去片！
簡直一模一樣。
梁雁翎唔多廣東歌，《你歌我歌》算係經典(MV截圖)
拍MV嚟講好大製作呀！(MV截圖)
去片欣賞吓梁雁翎嘅歌聲啦！(陳慧安攝)
動新聞入面，梁雁翎都落力演出。(陳慧安攝)
唔夠喉咪5月去睇佢個騷。(陳慧安攝)
同蔡濟文合唱《慢慢的陪著你走》(MV截圖)
場地：NEWAY apm採訪：余燕儀、懷鈺攝影：陳慧安攝錄：馮峰、Neo剪接：Roy
來源:
http://hk.apple.nextmedia.com/entertainment/art/20170409/19984826