| ||||||
| 8 號仔電盈呢排有幾亂，睇怕唔使點講。呢頭高院批准證監會介入私有化聆訊，嗰頭由鬼佬董事總經理AA艾維朗揸fit嘅裁員行動就搞到一鑊泡。之不過，諗住同 阿爺（新聯通）一齊畀4.5元私有化8號仔嘅主席李澤楷就話之你，靜靜雞咁繼續增持。繼本月17號，佢間盈科拓展掟近3000萬元增持750萬股之後，喺 證監仲有21日搵證據預備整佢單大茶飯、股價復牌預咗會跌（噚日真係跌2.51%到3.89元）之時，噚日佢再掟1921.5萬元，增持500萬股，每股 平均價3.843元，令持股量增至28.6%。 罕有地即時公佈 本來，佢對公司有信心冇乜好講，但奇就奇在噚日佢增持就即刻公佈，有別於過往幾日後先至睇到。雖則話銀碼唔大（對佢嚟講），但呢啲「信心的表現」可能意義深遠，至於係乜意義同有幾深遠，咁就真係任你估嘞！ | ||||||
| ||||||
岳少做嘢出名小心，不過，老馬都有失蹄時。小宗有個老友記，打算喺廣州富邦廣場租個鋪，要攞業主資料去註冊，呢個商場業主為林建岳間麗豐，老友睇一睇佢哋提供嘅資料：「咦，無眼花嘛，呢張咪林建岳嘅ID？」小宗核對過岳少身份證冧巴，無花無假。呢張副本已經有啲模糊不清，相信係經過多次翻影所致，唔少商戶都有喺手。不過，依然清楚睇曬所有資料，同岳少好嚴肅嘅「證件樣」。 翻睇年報，呢個富邦廣場，由麗豐（1125）持有商場及停車場部分，位於中山七路，有好多香港品牌都喺上面開店，好似稻香、大家樂咁，著名足球評論員丁偉傑，都喺度開咗間CAFE「丁‧煮場」，佢仲會喺度講波。以麗新系喺內地有咁多物業，唔知張證已經傳到去邊呢？ 岳少做咗旅發局主席，拋個身出嚟宣傳香港，以表親民係好應分，但身份證呢啲嘢，涉及私隱，都唔使「周街派」嘅。 六星戰隊「納財」好日子 上星期五，六間公司齊齊上市，一字排開敲響銅鑼；咁熱鬧嘅情況，未試過。一般程序，上市公司會委託投資銀行揀日子，再幫佢哋向港交所申請。而港交所發言人就同小宗講，同日幾多間上市，根本無限制；收到要求後，只會通知大家當日有幾多公司上市，至於仲堅唔堅持同日逼，就閣下自理啦！咁多人都揀呢日，唔通真係好日子？小宗好認真咁問過麥玲玲、李丞責同蘇民峰三位師傅，三位都話今年農曆九月好少大吉日，尤其係頭半個月，只係得初七（即上星期五）嗰日適宜「納財」；「納財」，即係進行集資活動啦！十月份又係傳統股市淡季（嗱，過去好多大股災都係喺十月o架）！咁上星期五，就真係「無選擇中嘅選擇」。的而且確，六隻新股都受到投資者捧場，上星期開市後，升幅唔錯。不過，李丞責補充，從「董公擇日」嘅角度，當日上市的公司日後容易損財，人丁不旺喎，投資者要見好識收啊！ 報業前輩買少見少 報業老前輩岑才生先生行年九十有一，佢自一九五三年起即加入老爹岑維休喺一九二五年創辦之《華僑日報》；自此除咗出版報紙，佢仲參與過不少公職，防癆會、公益金、消委會、市政局、區議會等都有佢份，又出過力創辦中文大學嘅前身聯合書院；退休後出錢出力為港大、中大推動傳媒教育；其瓣數之多、歷時之久，搵勻全個特區，堪稱少見。可能因為咁，佢嘅舊部友好於是出版咗本《岑才生服務社會六十年特刊》誌記其人其事。岑翁咁嘅前輩買少見少o架啦！ | ||||||