做有錢佬司機呢個行業，圈子其實都好窄吓，一般老闆聘請司機都會問吓上手老細是誰做個參考，有個大口司機同小宗講，話做過啤梨張司機同埋龔仁心司機嘅兩個行家，到家陣都未有嘢撈呀，真慘情，事關兩位前東家都惹上官非，經常出出入入法院，啲老細怕唔老黎喎，所以話司機都要帶眼搵老細，否則影響日後嘅飯碗o架。 金融逍遙客：用人首重信得過 游走於中港台併購、私募投資的金融多棲動物，現為多間上市公司主要股東及董事 講起任何生意成敗，至關鍵是用人，但如何找合適的人、如何授權並發揮人的優勢、為我所用？箇中除了大有學問，逍遙客認為更是一門藝術。從董建華、曾蔭權至梁振英，都周不時被嘈嘈閉的政客抨擊用人唯親。呢啲政客，幾咁無知、幾咁不食人間煙火。用人首要條件便是信得過，聽話居次，再論能力。從屋企賓妹到公司總經理，所有老闆大致都循呢個標準。自古以來就有一朝天子一朝臣的說法，西方大選完畢，內閣總辭以便另行組閣也是異曲同工。用人若不唯親，唔通老闆搵個成日窒頭窒勢，踢極唔郁，又成日「藐嘴藐舌」嘅伙記？有雄才偉略的領導人，自有巨大氣場凝聚一群有能力又聽話的幫手。若領導人是一般眼高手低貨色，自然難有有識之士埋堆效勞。一切都是物以類聚，什麼氣場的領導人，身邊自匹配什麼樣的謀臣。逍遙客遇敬仰的大人物時，見到連身邊的擦鞋仔也非池中物，有型過人。現今梁特首用人唯親並不是問題，逍遙客絕對支持，但看其身邊的馮發言人、吳教育局長、樹根校董、志剛行會成員，個個身居要職，理應行出來身光頸靚，唔打得都睇得先合格。但集齊呢幾大金剛開會，逍遙客矇矓中以為是一群市政局小販管理隊成員。呢個，先至係真正問題所在。 中環寸嘴：金絲雀、小三最啱聽 工廈大王楊耀松長子，是各大有名食肆之VIP，喜歡研究城中有錢佬對食之要求，透過美酒佳餚，察看人生百態，讓讀者「嗒」落有味。 呢個禮拜滾水淥腳返溫哥華巡一轉，嗰邊啲老友都講起兩個女星「爭老細」搞到反目嘅八卦新聞；據我分析反目有原因，喺度同大家分享一個真人真事古仔，幾年前有三個大陸女人去一間名店shopping，其中兩個女人買咗三十萬嘅手袋；跟住第三個女人話「她們的愛人都是跟我愛人餬口的，所以我要加雙」，然後買咗六十萬的手袋，是她們的一倍；明冇？小三都分層次嘅。諗起之前去過合和中心八樓嗰間唐宮壹號，一到兩點鐘，個升降機口排滿人上去食特價點心；但唐宮係「有前冇後」嘅，十二點半前埋單，大、中點都係當小點計，兩點後依然係正價；嗱，今次食就其次，呢度裝修過癮，一排好似金絲雀籠咁，令我諗起梁天唱嘅《金絲雀》，我寸嘴楊喺度「些牙」吓呢首歌部分歌詞，啱晒啲小三聽：「金絲雀，金絲雀，金色美麗似鳳，身矜貴，珠光寶氣，可惜困玉籠，令人羨煞令人慕，獲主心愛寵。金絲雀，金絲雀，不憂吃，不憂喝，甘心困玉籠，受人飼養玩弄，實真貪愛寵。」首歌係老餅啲，家陣啲海歸富二代鍾意「金絲貓」，不過驚毛孔又粗又硬「嚡烚烚」，好似食豬皮仲有啲豬毛咁！ 局長頭頂有粒痣 潮流興航拍，公關公司為搞氣氛，從高空捕捉活動鏡頭，亦都係咁，先可以一睹勞福局局長張建宗之富貴相，俗語有云，十個光頭九個富，局長豈止富，仲有粒「頭頂痣」，從面相學講，頭頂有痣嘅人，成世人都會好運相隨，仲可以逢凶化吉咁喎，望吓局長粒痣都幾搶眼，希望能帶啲好運俾香港人吖。 長情打工仔 昔日十姑娘何婉琪的「契仔」吳志誠，過檔四太揸旗嘅澳博都有十年，深得四太器重，佢一生人只係打一份工，一九七八年港大畢業就加入澳娛至今三十七年，滿頭白髮嘅佢今年都六十四歲，原來佢有位胞兄同樣打工都好長情，就係東華三院前執行總監吳志榮，佢服務東華四十五年，今年初才退休；細佬做賭，阿哥服務慈善機構，看似南轅北轍，睇真啲又唔係o架，你睇現任東華主席何超蕸、上屆主席三太陳婉珍，就知慈善同賭博其實係連成一線o架。 插圖：祝健中 | ||||