張繼聰謝安琪最叻放閃結婚10年恩愛如昔
1 :
GS(14)@2017-02-02 02:34:11張繼聰同謝安琪（Kay）07年奉子成婚，一直恩愛至今，上年Kay胎B女，宣佈暫時休息，喺呢段時間入面，張繼聰多次被影到陪住Kay出街，對老婆照顧有加。結婚咁多年以嚟，張繼聰一直係愛妻號，07年度嘅叱咤頒獎禮，深情咁喺台上話過「我同我自己講，我一定好好照顧我太太，照顧我個仔。」最經典嘅，就肯定係呢句：「就算時光倒流幾多次，我都會娶你做老婆。我愛你。」結果佢講得出做得到，成功將以往女尊男卑嘅印象扭轉。而最man一次，係上年Kay開完演唱會，張繼聰喺Ig貼咗同老婆嘅合照，不過有人嫌Kay樣衰，結果張繼聰迅速回覆：「我覺得我太太是真‧漂亮！小姐，你覺得你在這裡留下這樣的文字，我看到會有什麼反應？」再數近少少，上年11月張繼聰被影到親手幫Kay換走對鬆糕鞋，之後仲公開話：「如果條路個窿，我都瞓喺地下俾佢行過去！」呢兩公婆除咗平時出街恩恩愛愛，都好鍾意耍花槍，上個月兩個人為咗《男兒當入樽》呢套漫畫嘅擁有權「鬧交」，呢個共同嗜好，甜蜜得嚟又溫馨。直到今年1月20號，喺佢哋結婚10周年，張繼聰再次喺facebook撰文感謝Kay嘅陪伴「晃眼十年，因為有你同行，就算走過高山低谷，我都覺得沿途風光明媚。能夠有如此靈魂伴侶，讓這趟地球之旅變得幸福完滿。」
來源:
http://hk.apple.nextmedia.com/entertainment/art/20170201/19914045