4月1日「愚人節」，中國官方及滙豐中國公佈的3月份製造業採購經理指數（PMI）繼續「向左走、向右走」。官方PMI為53.1%，連續四個月回升，繼續站在榮枯線50以上；滙豐早前公布中國PMI終值只有48.3，連續五個月位於榮枯線以下。兩個數不對稱，但官方數字公布後料對中資股有點支持。
中國官方數據顯示大企業的經營活動3月份回暖。專家解釋，每年的2、3月，訂單一般都比較多，至於兩個數據各走極端，主要原因在於調查樣本以及季節調整技術的區別。官方PMI的 樣本以國企及大型企業為主，而滙豐中國編製的製造業調查樣本比較多中小型企業。中國近年怕經濟過熱導致惡性通賬，不斷收緊銀根。銀行水源唔充足，只好選擇 性放貸，搞到好多中小型企業借唔到錢周轉，即使借到，都要畀好高息，有訂單都交唔到貨，叫苦連天。相反，大型企業，尤其係國企，有阿爺照住，借錢當然容易 好多同平好多。運作沒太大影響。
歐洲經濟近幾個月都比較穩定，美國經濟更在慢慢復甦當中。美國就業情況有所改善，即使汽油價格不斷上漲，美國人對經濟前景仍然樂觀，最新公佈的3月份密芝根消費者信心指數終值76.2點，較上月高了0.9個百份點，創了1年多新高。美國人放膽消費。對中國出口訂單的需求上升，有錢做生意的大工廠生意好景，而中小型工廠由於仍然缺水，所以繼續做唔到生意。滙豐中國編製的製造業指數就繼續下滑。
官方公佈的出口企業新訂單指數達到55.9%，出企業承接的海外訂單增加，減低了主場對中國經濟出現「硬著陸」的疑慮。對經濟及股市都有正面影響。雖然中小型工廠處境仍然十分惡劣，對中國經濟增長會造成一定打擊，但同時增加阿爺放寬錢根的壓力。野村國際的經濟師張志偉就預期中國今年會減息0.25厘及降低銀行存準備金率100個基點。
美股上週五繼續造好，杜指升66點至13212點，標普500指數升5點，造1408點。總結全季，美股創下自1998年以來表現最好的第一季度，杜指上漲8.1%，標普500指數升12%，納指最勁大漲近19%。
上周五講起散戶的羊兒心態，通用係用眼思考，用口思考，不是用腦思考。用眼見到綠草如茵，就飛身撲上開心吃草，不知草地後有危險，而且口口相傳，你又話正，佢又話正，不用腦想想為何有咁正的草地為大家享用。
不止散戶如此，財經評論員如此，有時寫報告的分析員亦如是，他們理論上是講緊較長線的行為，分析緊行業和個股大勢，但有時講法相當投機，跌得多叫人買，好似只講緊兩三個月的走勢。最近講航運股的分析，就有這種情況。
好似隻中國遠洋(01919)
，剛公布去年全年蝕105億人民幣，但股價卻大升，上周五升8.4%至4.91元，股價由一個星期前的低位4.3元大幅抽上。中遠洋蝕105億都大升，理由不外乎是壞消息已見，行業快轉勢，今年首兩個月生意回升，或者更直接一點是有證券行唱好。有人話好，有人跟，股價就升。
先睇睇中遠洋盤數，去年蝕105億，是破紀錄地差，股本回報率為負25%，即係一年蝕咗四分之一資產淨值。單計下半年，每股資產淨值已比上半年再跌20%，到12月底時只有3.4元，現時股價4.91元，較資產淨值還有好大溢價。
睇番佢幾塊業務去年下半年表現，集裝箱航運由上半年虧損9.5億元，急升至虧損54億元。乾散貨航運虧損28億元，比上半年增加３％。其他業務的盈利無法抵消航運業務虧損。中遠洋自己預計，今年將完成集裝箱貨運量730萬個標準箱，按年增近6%，並將維持對經營前景的審慎判斷。我睇中遠洋自己都估集裝箱運量是小升不是大升，油價高企，運費又不是咁好景，要扭虧並不容易。
中遠洋業績出來之後，證券界評價不一，睇淡者不少，如匯豐話中遠洋下半年虧蝕77億，較佢估計多一倍，今年好啲，但現價己反映，重申減持，目標價3.2元。美林美銀話去年虧損超預期，目標價降9%至3.55元。摩根大通本來係評中遠洋為「增持」的好友，但睇完業績都降目標價，話雖然短期前景依然非常疲弱，相信散裝航運行業今年將走出低谷，中遠洋長線將見槓桿式的大幅反彈，故維持「增持」，惟Ｈ股目標價由8.7元降至7元。
當然有人繼續一面倒睇好，瑞信發表報告，認為中國遠洋經營狀況首季見底，目標價由３﹒４元升至６﹒５元，予「跑贏大市」評級。
股市有人睇好有人睇淡好正常，股票短線走勢更難測，但散戶睇好航運股，多多少少受加運費的消息影響，上月中東方海外（316）今年第5次上調不同航線的運費，宣布由3月中開始將北歐至亞洲航線的運費，每貨櫃提升200美元。東方海外加價帶起其他航運股，當日中遠洋就升上5.3元的高位，大家都睇住中遠洋07年見過的40元高位，發吓夢諗吓幾時到。問題是航運業真係咁好生意要加價嗎? 我 聽行內人講，歐洲經濟極弱，美國經濟都不強，航運業不是因為生意好而加價，是因為油費價而加價，因為不加價開一次船來回都要蝕錢，不如加價，即使減少需 求，出少啲船，但每船滿貨一點，就唔使一出船就要蝕多啲錢。業內人士話，航運業有排都未好，整個行業虧蝕，只有做得好的少數公司能賺錢，行業經營極其困 難，這就是行業現況。航運股要轉勢，首先要歐美經復甦，其次要油價下跌，暫時未看到這種狀況。
所以而家散戶去買航運股，人買我買，仲大講行業要轉勢之類「分析」，只是麻醉自己的行為。但不能話航運股不會升，跟大市炒吓升吓唔奇，但長線投資未係時候，行業未有苖頭轉勢，反彈咗咁多價錢已不便宜，若中遠洋跌到2個幾，好似股神巴菲特咁講執個煙頭吸吓都唔妨，但近5元又唔係咁平，炒作的價值都在下降中了。睇長線要多點用腦分析，唔可以好似睇短線咁博佢彈一彈。
陸羽仁