自認入行靠父蔭杜如風靠老竇找卡數
1 :
GS(14)@2015-01-11 20:21:53
自從無綫播出《流行首爾》之後，主持杜如風被網民封為「世界級港女」，成為部份網民嘅狂插對象。有人話佢成日咁鍾意買嘢，質疑佢屋企係唔係好有錢，先至成為「天生購物狂」。其實，杜如風唔係大家想像咁「大富大貴」，佢曾經講過自己唔買嘢會身痕，中學擁有人生第一張信用卡，就碌爆咗！搞到爸爸媽咪好頭痕，碌爆卡嘅次數更多不勝數，後來佢媽咪要用到調低信用額，等佢碌唔到。杜如風都多謝爸爸退休前一直幫佢找卡數，屋企人冇要佢破產。依家有收入嘅佢，又出旅遊書、寫專欄、出騷，搵搵埋埋應該都夠使。而作風大癲大肺嘅杜如風，一向冇咩秘密，惟獨係真實年齡，神神秘秘唔肯講。翻查維基(Wiki)網頁，早前曾標註佢嘅出生年份係「1982年5月16日」，即係32歲；後嚟又有人改咗佢出生年份係「1979年5月16日」，即係35歲；2010年有報道話佢當時「33歲」，即係依家可能約「37歲」，真實年齡依然不詳。但就有曾經喺北角衛理小學讀書、兼夾係杜如風同班同學嘅「二五」爆料，指杜如風出生年份係1975年。由此推斷，杜如風今年五月，應該會踏入40歲。
來源:
http://hk.apple.nextmedia.com/entertainment/art/20150109/18996864