| ||||||
上 周筆者以「勿用耳朵代眼睛」為題，籲讀者不要盲目跟隨消息入市，4萬億元人民幣救市方案未必就有化腐朽為神奇之能，結果兩周過去，大部份個股依然乏善可 陳，反而筆者在13700水平造淡，卻有不俗賺頭，並在上周四於11900水平附近平倉獲利，功成身退。周四平倉之後，歐美股市繼續下跌，起初仍只算反 覆，但美國聽證會之後，美股便開始崩堤式下跌，當晚凌晨便收到讀者Annie電郵，話大市擺明再跌，淡倉是否平得太早？筆者今次睇市是否出錯？ 跟隨系統買賣 筆 者明白，大市如斯下跌，沽家得勢不饒人，有此疑問實屬合理，正如筆者早前在13700水平造淡，亦有讀者問熊市追沽是否太過危險一樣。其實筆者平倉，皆因 系統目標已達，是否繼續持倉，純看投資者的個人取向，牛市之時，股價總是會升到你唔信，當時大可嫌賺得唔夠，放心長期持有，但熊市市況反覆，賺夠就要走， 要學識知足，唔強求。市場上經常有「專家」預測大市見底點數，其實股市裏沒有神仙，真正專家都估唔到底，何況筆者只係炒家一名？所以士佳常話投資跟系統， 買賣平常心，周四平淡倉後，手中尚餘適量正股，筆者唔敢講已作出最佳決定，但熊市賺錢殊不容易，今次能夠從淡倉獲利，減低日後儲貨成本，已經無憾，亦懶理 當晚美股升跌。結果，周五早上筆者剛覆完Annie電郵，大市隨美股低開，但幅度遠低於預期，不久更展開極地反彈，由11700反彈至13100，市場氣 氛逆轉，投資者即由問筆者「是否平得太早？」，變成問「係咪撈得貨？」。發問上述問題，證明投資者亦被市場牽着走，見升看升，見跌看跌。筆者不知道大市會 否就此見了近期底，但回心一想，如果前一日未有在11900附近平倉，如今大市狂升，肯定會被市況影響判斷，尤其午後大市高開，氣勢何其凌厲，隨時就在最 高位平倉，利潤即時化為烏有。近日筆者捉到市場節奏，在升前叫揸，跌前嗌沽，全靠多年投資及睇圖經驗，圖表會說話，所言非虛，有長期跟進本欄的讀者，近日 應該有所斬獲。熊市之中，需要幫忙的人越來越多，如讀者能從淡倉之中獲利，力之所及，亦應抽出部份利潤幫助有需要的人，多做善事。張士佳 | ||||||
由於少讀書,所以我不知道"財務自由"呢四個字的來源, 甚至到今天我也不懂何謂"財務自由", 但這四個字似乎已是每個投資/投機人的奮鬥目標, 十幾年前還未見過呢四隻字前, 我們這種爛炒的人只認識"發達"呢兩個字... 根據字面解釋, "財務自由"是指不需要為財務煩惱, 可以自由自由咁生活. 如果我沒理解錯, 那約95%的人根本不用投資已可達標, 另5%在失業中...... 別 以為我又發神經, 這可是我這個weekend的體會. 週六早上行山時遇到一位相熟老伯, 他82歲, 剛入完醫院通波仔, 但已行得快過我, 我要小跑至追得上他老人家. 老伯生果金加綜援, 月入不過4000大元, 住既係自已起既鐵皮屋, 一星期飲兩次早茶, 玩下馬仔, 有病唔睇醫生, 佢話通波仔係佢呢30年第一次見到醫生, 好彩佢老婆係政府度做清潔算係公務員, 所以至可以免費通波仔....老伯好樂觀又好睇得通, 40年前佢係海員, 之後冇得做, 於是就乜都唔做, 佢話佢去完全世界, 覺得做人至緊要開心, 係香港係唔會有人餓死既......(我覺得佢財務自由過我好多) 另一位呀伯七十幾歲, 住我上面, 開會計師樓, 昨日落來看我既裝修以做參考, 大家傾傾下, 佢突然好語重心長咁講:"我呢世人實在錯失太多(發達)機會...." 佢好惆悵因為佢d朋友大多係上市公司主席, 佢問我會唔會有第二波, 似乎仲未死心想發達... 同 兩個呀伯傾完, 我突然有d領悟, 所以今日即刻去左旅行社, 下星期同老婆去九寨睇秋色, 記得98年呢d時候, 曾特首都係去左九寨溝, 99年5月我第一次去九寨, 去到後終於明白點解佢係都要10月份去而唔等到我地11月死晒至去, 事隔10年, 我終於想起呢個塵封多年既心願....
| ||||||
鏞記爭產案發展至今，隨著甘健成離世及清盤案於上週三被駁回，身為鏞記創辦人甘穗煇的第三房、甘老太一家人四分五裂，輸盡親情。塞翁失馬，焉知非福。鏞記的正牌大少、亦即甘穗煇的「真正」長子，是二房的甘琨華。他早年是鏞記股東，但被父親安排接掌名氣遠遜於鏞記的鑽石酒家，讓鏞記徹底由三房掌管。○二年鑽石酒家結業，他移居溫哥華，閒時與太太釣魚、寫字唱曲，與世無爭。本週日，記者找到回港探親的甘琨華，說起當年如何抽身而退，他以蘇東坡名詩中其中兩句回應：「日啖荔枝三百顆，不辭長作嶺南人。」說罷，哈哈大笑。沒有失望，他教路：「知足常樂呀！」 七十三歲的甘琨華，眉毛生得長，與其父甘穗煇十分像樣，經常笑意盈盈。上週六晚，偕妻女剛由溫哥華回港的他，出席同父同母的妹妹甘秀玲娶新抱的婚宴。當晚大部分已移民外地的二房及四房兄弟姊妹都回港出席，獨欠爭產的三房。甘秀玲說：「同佢哋都親密，不過較少聯絡；爸爸一直希望我哋兄弟姊妹和睦共處，每逢有咩喜慶，我哋都會一齊出席，我哋一家人真係好開心o架。」說到鏞記，大家只會想起甘健成及甘琨禮；其實甘穗煇有四位太太及十八名子女，元配麥女在訂婚不久後離世，未正式入甘家。三九年，甘穗煇娶了麥玉珍，兩人屬父母之命，共生有甘琨華等七個仔女。甘琨華說，當年其母和父親一齊捱，搞起鏞記，「我阿媽係揹住我整燒鵝，又幫鏞記啲員工車衫。」直至他五歲，爸爸認識了三房麥少珍，即大家熟悉的甘老太。甘秀玲說：「雖然三房都姓麥，但無關係的。爸爸同姓麥嘅人真係好有緣，當年鏞記上手老闆叫麥鏞，又係姓麥！」他們說，媽媽是傳統女人，非常吃得開，而阿爸亦非常「識做」，甘秀玲說：「阿爸買一隻戒指，會人人有份o架。我哋下午飲茶，佢哋（三房）就上午飲囉。」其後甘穗煇再娶四房何雪瑩，這名字由二太太麥玉珍所改，甘秀玲說：「佢正式斟茶入門做我阿媽嘅妹妹，仲成為麻雀腳添！」 由鏞記到鑽石 甘穗煇四二年在上環搞鏞記，四七年又與兩位朋友，在皇后大道中開設鑽石酒家。六十年代再在西洋菜街開分店，由二房打理。直至七四年，甘穗煇與拍檔、龍記企業及新會商會合資於上環德輔道中興建廿多層高的龍記大廈，底下七層作鑽石酒家。琨華被父親安排到新鋪，與四房長子琨廉並肩作戰。而鏞記就全權交由三房的甘健成、甘琨禮及甘琨岐打骰，然而翻查公司註冊處，七、八十年代的鏞記，由甘穗煇持七成股份，其餘三成由甘琨華、甘健成及甘琨禮平分。直至九○年，甘琨華於鏞記的股份突轉手予三房幼子甘琨岐。甘琨華笑笑口說：「呢啲係爸爸嘅安排，佢話點就點囉！」鑽石酒家的名氣一直不及鏞記，會否不是味兒？說到這裡，甘秀玲搶答：「媽媽教我哋做人要知足。」甘琨華望著妹妹，又大笑起來：「係呀，知足常樂！」八十年代中，中英談判期間，鑽石酒家其餘兩位股東有感前途不明朗，欲離開香港，故部分鑽石酒家相繼結業，只剩下上環龍記大廈分店，甘琨華一直在那兒做總經理。直至九三年，他亦開始擔心回歸問題，故於五十四歲之齡提早退休：「我每個細佬妹都去外國讀書，有外國護照，我就一直喺酒樓做嘢。咁啲仔女要去外國讀書，我咪走囉，我爸爸同意o架！」其實，甘琨華於皇仁預科畢業後，曾去香港電台跑了三年新聞，才被父親召回幫忙。他也挺懷念在外打工的日子：「出去打工，一個月有四日假。我返鑽石酒家做，同事年尾收爐，但我係太子，人哋放假，廚房要維修，我都要睇住，幾十年無休息。」 百五萬龍鳳大禮堂 除琨華外，二房的兄弟姊妹皆沒有沾手飲食業，這或許解釋了為何沒有大家族典型的兄弟相爭。二弟琨強在三、四歲時已去世；已故的三弟琨偉是律師，四弟琨得曾在科威特當研究博士，五弟琨泰做資訊科技，大妹秀玲是藥劑師，而細妹惠玲則做酒店管理。琨華退休後，鑽石酒家由四房的大哥琨廉一人打骰，直至○二年結業。甘琨廉說：「咁大間酒樓，我唔想一個人做。」秀玲說：「我哋諗，幢大廈轉為收租都唔錯吖！」他們其後把大廈租予喜悅皇宮，據知每月為甘氏兩房人帶來約四十萬元租金收入。直至去年，更以二點一億元沽出龍記大廈由他們持有的七層，秀玲說：「收租都要管理呀！」公司註冊處資料顯示，持有龍記大廈部分業權的創業有限公司，兩房人共十二個股東，其中三名成員以海外註冊公司持有；決定是否出售，過程難免有爭拗，美玲說：「我哋做每一個決定，都好理解每一個兄弟姊妹感受o架。」她指由於大家都「無咩所謂」，「最終幾個電郵問嚇大家，好快有共識。」 二房及四房一起搞鑽石酒家，即使酒家已結業，仍經常聯絡。本週二，鑽石酒家的雕塑及餐牌等於沙田文化博物館展出，他們齊出席。左起為四房的琨亮、淑玲、愛玲及其丈夫、琨廉；二房的琨華及太太、琨偉太太Susan、琨得、秀玲、惠玲及琨泰。 甘氏家族表 雖然鑽石酒家名氣不及鏞記，但食物質素卻不下於後者。《香江知味：香港的早期飲食場所》一書的作家鄭寶鴻說：「其實我當時都唔知兩間嘢係同一個創辦人，不過嗰時食鑽石酒家隻燒鵝，都覺得味道同鏞記有得揮喎。」甘琨華說，他們用的是鴻基煤，是正宗明爐燒味，父親興建龍記大廈時，起了一條煙囪：「全港只有我哋同鏞記係有煙囪嘅酒樓，之後政府無再批牌喇。」他憶述，雖然鑽石是中式酒樓，但也創造不少西式菜，如沙律煙熏魚及梳乎釐布甸等。但最令人印象深刻的，是鑽石酒家的龍鳳大禮堂，「嗰時都有啲酒樓有龍鳳，但係塑膠嘅，我哋係搵上海師傅人手造，手工好仔細，同埋真係用金箔鋪o架。」琨華指酒家其中三層是大禮堂，七四年興建這些龍鳳雕塑共花一百五十萬元，而每年保養亦是數十萬。鑽石酒家結業後，他們把這些物件連同菜牌、紙袋等近二百件物件收藏，今年二月捐予沙田文化博物館，本週二率先展覽二十件，讓從外地回來的弟妹一起預覽。現時甘琨華在溫哥華樂得清閒，過去曾有傳他打算以鏞記的名義在外地開分店，他說：「根本無可能，你幫我澄清嚇。」然後繼續侃侃而談他的退休生活：「我鍾意釣魚、寫毛筆字。仲喺溫哥華參加咗合唱團，叫溫馨（Vansing）合唱團，出年仲會去上海表演添。」塞翁失馬，最重要可以繼續逍遙自在。 甘家二房物業 | ||||||