那些眾所X知的事 人在中環
http://manincentral.blogspot.hk/2012/11/x.html響電視睇到盛品儒話王維基盜取亞視機密既新聞，第一個反應係：「唔X係呀…」
我理解唔到當中既邏輯。亞視唔希望政府再發新既電視牌照，係眾所X知既事。對上一次響政總，成班小丑上身響道跳騎馬舞，已經夠夠低能夠蠢了。家陣又搞單盜取機密既新聞出黎，話口未完又傳出新聞部有十個「批評」過佢地既員工被炒，都仲未計之前果幾集，引發大量投訴，又建設派又破壞派既《ATV焦點》…我忽然都有啲懷念林伯。
愚蠢既我最初諗唔通：假設亞視真係好唔希望政府引進新既免費電視台，佢地都冇道理要搞咁多白癡既動作出黎。稍為有腦既人都會諗到，呢啲動作越多，只會越激起民憤，激起更多輿論。政府一直以來按兵不動，冇動作又冇乜回應，係咁拖係咁拖…事情如果一直丟淡落去，大家可能有朝一日真係唔記得左有件咁既事，亞視配合政府，出少兩句聲當幫忙，係咪應該比較切合佢地利益？點計都著數到過搞咁多野出黎，間接地提升市民對開設第三個免費電視頻道既訴求掛？
我唔相信佢地會蠢成咁，但呢單新聞卻令我諗起上星期既
呢一篇文章。
*****
奴才做事，從來都唔係志在解決問題。佢地既人生目標，永遠都只係不斷地向主子示忠。
既然「示忠」先至係最終目標，過程當中，即使顯得佢地幾咁低能白癡，幾咁違反常理都好，佢地都唔介意，而且會樂此不疲地不斷做。你覺得咁做好醜咩？奴才反而擔心做得唔夠醜，主子feel唔到佢真係咁忠心添。
於是奴才總係響度敗事，總係響度幫倒忙。明明有些事情，佢地既主子大概早有策略諗住點樣搞，中途忽然總係又會殺出幾件蛋散奴才出黎爭住用各種低能到冇人有既手段示忠。「忠」可能真係示左啦，不過主子就多得你唔少。用「搞亂檔」既方式去示忠，做主子果個心裡面其實受定唔受呢？
與其話一個奴才蠢，倒不如話，佢地只係同一般人既做事目的有所不同吧。
*****
講遠左了。
個人覺得，以一個正常人既邏輯去諗，亞視正計應該係最唔怕競爭果個至係。三色台怕有新免費電視台出黎同佢爭，這個我能夠理解，多隻香爐始終係多隻鬼，不論新既電視台做得好唔好都好，佢會扯走多少三色台既收視率；所以三色台對此有反對聲音，商業角度黎講我覺得合情合理。但亞視既情況應該唔同喎；一個零收視既頻道，無論加多幾多個新競爭者，結果都一樣係零收視，跌無可跌。話之你王維基有幾勁啦，亞視其實真係唔會因為佢既出現，而受到絲毫影響的。