📖 ZKIZ Archives

盲推電子教學 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20140105/18579077
一月一日在馬場自然碰到唔少人，在廂房內碰到馬主P，佢不久之前先至在快活谷拉過頭馬，自然要恭喜佢頭馬繼續嚟，2014年繼續發威。馬主P騎騎笑之際，拍左丁山膊頭講：「我細個讀書時都冇書枱㗎！」在馬場講贏嘅噃，點解講「輸」呀？十幾秒鐘之後先至醒起，佢係指十二月二十七日本欄內文：「未必人人有書枱」，引起佢共鳴。馬主P話佢小時候家窮，不知書枱為何物，就係揸住一枝筆，一本書，坐一張櫈仔咁樣苦讀至中學會考畢業嘅，後來老竇要佢打工賺錢幫補家計，於是不能升讀大學預科，在工廠做行街出身，學曉咗推銷、搵訂單，十年後自己開一間山寨廠，捱捱嚇就發咗達。而家講起就輕鬆，嘻嘻哈哈做馬主，當年其實吃過不少鹹苦；有此背景，馬主P認為今天拿綜援之人，除老弱傷殘孤寡之外，身體健康成年人根本不應拿綜援，何況今天香港失業率偏低，成年人好易搵到一份工，工資還在其次，有工做就有累積工作經驗嘅時間與空間，將來前途由自己掌握，一旦拿綜援唔做工，成世人嘅前景就立即冇曬咯。
在馬場講馬好過，社會綜援呢啲大道理留番梁振英決定，馬主P講講嚇亦知扯得太遠，即刻講番馬，話第九場二號「神舟十號」冇得輸，黃楚標名下嘅「飛霹靂」臨場落重飛贏咗，佢位親戚黃光苗嘅「神舟十號」同日起孖，理所當然啦。賽馬邏輯就是如此，點知隻「神舟十號」出閘窒一窒，中段有空位唔搶，大熱門跑個第三算數，WQ齊撻，左丁山輸到為之苦笑，賽後知道練馬師徐雨石破天荒地主動向賽事董事查詢騎師潘頓嘅策騎方式，想來練馬師亦係啞子吃黃連也。
跑完馬，再諗嚇今天教育、社工＼社運組織申訴清貧學生冇書枱，或者已經落伍咯，要嘈嘅話，不如嘈嚇清貧學生冇iPad！特區政府除咗盲搶地之外，亦盲推電子教學、電子教科書，搵冇出版教科書經驗嘅電子工程人員策劃電子書，以代替紙本教科書，但資助小學、中學校長就指學校嘅硬件及無線網絡支援不足，對錄取清貧子弟為主的弱勢學校十分不利。一人揸一本書讀，貧富學生差距不太遠，但用電腦上網讀書喎，窮學生就吃虧太大了！
PermaLink: https://articles.zkiz.com/?id=87279
Next Page
ZKIZ Archives @ 2019