胡孟青：金融MT與VIP的綑綁銷售
1 :
GS(14)@2012-05-19 10:33:24http://www.sharpdaily.hk/article/fin/20120518/91470
想成為金融機構MT，老竇要係VIP。內地報道有金融專業大學生應徵Management Trainee的親身經歷，引起很大迴響。揸兜銀行羊城分行確認同等條件下，優先錄取客戶子女；正在該行實習的大學生，不少通過VIP客戶管道取得實習機會。不知是否少見多怪，銀行有大條道理，VIP客戶子女肯定對該行認知度較高，整件事即變得理所當然。
壽險代理生意，幾時唔係靠人脈關係？金融業是人的生意，建基對機構的信心及從業員的專業服務水平，靠打關係打開所謂「通路」，內地人見得少嗎？功利社會，輸打贏要，講道德者只會被笑扮正義。幾多早已放洋的富二、三代，父母已安排好暑期工Internship，更何況係畢業後首份工，連CV都可以後補給人事部；客戶已係VIP，等於已盡職審查，唔怕佢不明來歷，只怕香港地寸金尺土，唔知哪個部門肯捱義氣接收預咗無貢獻的人，透過家族戶口資產管理佣金收入彌補一下，對銀行來說又未必係蝕本生意。唔肯就範？仲大鑊！佢老竇隨時把戶口連根拔起搬去貴行的競爭對手，屆時出現存款流失，因小失大，該當何罪！
內地有人批評上述行為違規，罵用人單位有違職業道德，以內地蓬勃的走後門送禮文化，不過係「一百步笑五十步」。
胡孟青
獨立股評人