樓民講場：噩夢由買舖開始
1 :
GS(14)@2012-11-03 14:46:14http://hk.apple.nextmedia.com/financeestate/art/20121103/18055828
成日見報紙講天價成交，睇到我百般滋味。
八十年代開始，我在港島區開小酒吧，算係搵到兩餐，又有個竇與老友相聚，可謂人生一樂也。以為可以做到退休，殊不知，計漏租金暴升，升到冇辦法要轉嫁去消費者，租金由4萬加到6萬元，再加到12萬元，唉，惟有執笠。不過，因為儲落一班熟客，我好唔捨得，覺得仲有得做，為免再被加租拖累，於是決定易地買舖，時為1996至97年間，但噩夢亦同時開始。
冇幾耐金融風暴爆發，班熟客都周身唔掂，生意差咗好多，舖頭生意我可以慢慢守，但可恨的是，銀行追我還錢，追巨額差價！呢一招之陰毒，即刻就宣告我間舖頭死亡，我雖然唔使破產，但辛苦半生，一切歸零，當時我冇去尋死，都算硬淨。
事隔十數年，呢個舖斷估值幾千萬，若然捱得過，已經印印腳，但係銀行要你三更死，我又可以點？但係每次行過，唔心酸就假。
講番呢件事，係想告誡各位，真係要提高警覺，自用、長線就唔怕？我當年何嘗唔係自用兼長線？金融機構話要保持體系健全，就絕對有權KO你，你連翻身的機會都冇。家民粹抬頭，政府唔會睇住你死，但你必須留在低下層，中產只能打落門牙和血吞。
讀者 吧佬