📖 ZKIZ Archives

地產代理Ｋ榮升做中國大陸地區CEO，頻上深圳開會及到所謂一線城市巡視，呢日見到佢，開口就問：「溫家寶臨別秋波，搞單房地產增值稅出嚟，賣樓賺錢要交20%增值稅，即係賺到一百萬要交二十萬稅，會唔會打沉你地呢行？」代理Ｋ話：「暫時未會，北京下達命令，各省市要自訂實行日期，在執行徵稅之前，業主盡快賣樓，所以最近生意好到不得了，做到踢晒腳。」左丁山再問：「會唔會上有政策，下有對策，各省市地區為了地產發展，遲遲不推行徵收增值稅？」代理Ｋ話：「呢次怕幾難，胡溫走，習李來，反貪腐之風四起，地方諸侯唔敢故意違抗中央嘅，相信開完兩會後一個月就會全面徵收增值稅嘅嘞，所以下半年內地房地產交投可能會好淡靜，我地依家就係預先透支下半年嘅生意額。」
內地僱員除了忙於應付最近突然急升嘅交投量之外，原來最緊張買奶粉，地產Ｋ最近在港召開全國地區工作會議，各地都有人來港開會，內地代表一開完會就撲去買奶粉，一人兩罐，另外每個香港僱員出差到內地，都會收到柯打買奶粉，即使冇柯打，買定兩罐上去做手信就最受歡迎。點解咁緊張呀？代理Ｋ話：「以前冇限奶令，佢地落到嚟就買番十罐八罐自用或應酬親友，但有咗限奶令之後，佢地一次唔買得咁多，就更加刺激起需求，人人都話要兩罐配額唔好蝕底！」記者小Ｇ聽到，不禁失笑：「你公司咁大，咁多人，不如買定一兩千罐擺響度，每次上大陸就執兩罐上機、上火車，當係員工福利都好噃！」代理Ｋ為之苦笑。
為奶粉而搞到傷咗香港與內地和氣，實非梁振英始料所及，香港商界反對限奶令，佢當聽唔到，內地傳媒一出聲佢就腳仔開始軟，正一係欺善怕惡之輩。香港有大把奶粉，絕不會出現一啲BB冇奶飲嘅情況，一啲傳媒人係咁噏之前，唔該搞清楚。前幾日在萬寧中環店外，見到一位老友買奶粉，問佢係唔係有咗二奶生嘅新BB，還是阿女生咗個女，已經榮升阿公？佢瞪左丁山一眼：「邊度有二奶吖，你唔好亂咁講，我個外孫已有五個月大，好得意，我代阿女買罐奶粉呀！」一睇牌子唔係美贊臣、美素佳兒呢啲貨，周街有啦，正想叫佢去翠華飲杯茶，佢話：「唔得閒呀，親家兩公婆同我地爭住要湊孫，大家達成time share協議，今日下午時段係我地嘅！」言畢，快步離去。湊孫啫，咁緊張做乜呀！
（昨日本欄言及「千杯豪情」馬主是呂少文，實誤，呂先生自「豪情穩勝」退役後，已無本港現役馬，謹此致歉。）

講開買奶粉湊孫，即刻有老友提供趣料：「財務L前個月飛過去溫哥華湊孫，高興到不得了，點知女婿嘅父母亦聞風而至，從吉隆坡飛過去，於是四位退休人士，爺爺嫲嫲大戰公公婆婆，為咗爭取湊孫權，由斯文討論，升溫至失控口角，搞到四老嘅仔女不知如何是好。最後還是爺爺嫲嫲大啲，公公婆婆（即財務L與太太）怏然回港，還是頂住度氣！」此乃廿一世紀現象，戰後嬰兒潮（baby boomers）一代，已是退休一代，佢地出生之時，周圍係嬰兒，爺爺嫲嫲，公公婆婆皆忙於打工養家，唔得閒湊孫，那會爭奪。時至今日，社會富裕好多，新生一代（即70後或80後）不願生兒育女，出生率偏低，於是四個老人家可能只得一兩個孫兒，梗係愛之錫之，希望湊孫為樂啦，故此爭取湊孫權！
投資M睇完恒生銀行嘅業績報告及公關部發出之補充資料，對左丁山講：「如果你有孫，不如買一百股恒生股票，收埋保險箱四十年，留俾個孫，睇吓到孫兒四十歲之時，佢會唔會擁資千萬元！」
何出此言？投資M根據恒生提供嘅資料講：「恒生銀行於1972年上市，IPO價錢每股100元，一手係一百股，認購一手要一萬元，與今天要一萬三千元差不多。好嘞，1972至2012年間，每一手恒生共派股息共一百九十萬元以上，加上歷年派發紅股，1972年之一百股變成2012年之19315股，以每股130元計，值二百五十一萬幾，升咗25.1倍，若歷年以股代息，就會累積至105,512股，時值一千三百七十一萬元，喂，即使計埋通脹，如果你爸爸在1972年留一手恒生俾你，你今日都有一筆可觀退休金呀！」
原來咁盞鬼，買到一隻好股票，果真一世無憂，翻查紀錄，1971年港股每日成交額創下六億五千九百三十四萬元歷史新紀錄，一九七二年頭十個月總成交額係293億元，只係今日嘅半天成交額，1972年9月底之銀行總存款達231.4億元，今日一間大型公司集資已不止此數，睇呢啲歷史數字，得到一個結論，就係物價一定愈來愈高，買股票不一定賺錢，但唔買股票就一定吃虧，如有兩個青年30歲，1972年時中馬票得到一萬元，一個保守將一萬元擺入紅簿仔，一個大膽認購一手恒生，眨下眼大家今年70歲，你話邊個感覺更良好呢？