摩天輪下蹺手談情 祥仔毛姐109歲之吻再現銀幕？
1 :
GS(14)@2016-12-06 03:56:19大家仲記得嘛，喺不久之前，無綫為觀眾上映咗一幕世紀之吻，唔係因為經典，而係因為咀嗰兩個人加埋有109歲，講緊嘅係52歲黎耀祥同57歲毛舜筠喇！但呢個世紀之吻好可能唔會再有得睇，因為《愛．回家之八時入席》將會喺明年1月散席，呢個月中煞科。雖然早前有傳毛舜筠同劇組唔係太配合，結果喺無癮嘅情況下，向曾勵珍請辭，唔肯續約添食！不過話晒係專業嘅演員，又點會俾呢啲嘢影響工作，爛尾收場？而喺大前晚9點左右，一班演員就去到中環摩天輪拍戲，拍攝一場好浪漫嘅聖誕節戲，主角當然就係世紀情侶黎耀祥同毛舜筠啦，佢兩個主角拍談情拍拖戲，兩個喺浪漫氣氛下，邊行邊傾，當大家都好期待109歲嘅世紀之吻，哎，再一次失望喇，因為呢場戲佢哋兩個冇鍚，真係浪漫變浪費。話晒摩天輪係一個景點，當然有唔少人去現場遊覽喇，再加上有明星喺度拍戲，所以現場吸引咗唔少人圍觀，劇組方面都有晒安排，出動吊臂喺高空拍攝，唯一最大嘅問題，係現場太近海邊，時不時吹起大風，吹到啲演員啲頭髮亂鬼晒，不過大家都冇理，繼續爭取時間埋位拍攝。著晒聖誕衫嘅湯盈盈，唔駛埋位見嗰陣，好嘆咁坐喺度食嘢，唔知真係以為佢開緊party！
來源:
http://hk.apple.nextmedia.com/entertainment/art/20161205/19855700