播種三年終於得咗關心妍宣佈陀猴B：開心到喊
1 :
GS(14)@2016-02-04 17:24:07【肚凸凸】■結婚七年的關心妍昨公告懷孕三個半月，她和老公都開心到喊。
結婚七年的關心妍（Jade）終於造人成功，現年36歲的她懷孕三個半月，昨在微博貼跟老公和猴公仔合照報喜：「感謝主！新一年，家裏多了一位小成員呢！」預產期在7月的Jade昨接受本報電話訪問說：「好開心，啱啱有咗三個半月，之前唔講得住，好多朋友都察覺唔到，證明我唔係肥好多。等咗差唔多三年，終於造人成功，去年11月喺澳門開完騷，放下心頭大石努力試，個幾月後知有咗，最辛苦嗰時接晒聖誕新年騷，嘔到不得了，大家又唔知，工作又推唔到，而家好舒服冇嘔，BB好乖好錫我。」
【去年11月】■關心妍（左）在澳門開騷後，即與老公努力開始造人大計。資料圖片
【去年12月】■關心妍去年尾出席新城頒獎禮，有孕在身的她仍着高踭鞋出騷。資料圖片
【報喜訊】■陀有猴B的關心妍，昨在微博貼與老公拿着馬騮公仔的合照。
「不停嘔又暈」
Jade表示懷孕頭兩個月最辛苦：「食唔到嘢，不停嘔又暈，同事以為我腸胃炎，捱咗嗰個月好好多。」一直恨生B的Jade，今次是自然受孕成功：「自己驗咗知道有，跟住去睇醫生，我同老公都開心到喊，真係冇諗過，因為之前試咗好耐，朋友畀好多偏方乜都試，有段時間自己都失望唔再諗，知道有咗真係好驚喜，之前唔敢透露畀人知，呢啲傳統都守住，三個月後先講，費事屋企人失望。」已經見肚的Jade不能再着緊身衫，老公更下禁令：「老公禁止我唔畀着高踭鞋，行路要好小心，唔可以跌親，可能懷孕五個月停工。」問到想生仔或女？Jade說：「真係有得揀想生女，家姐可以照顧細佬。而家自己重咗6、7磅，BB健康就OK。」
試盡中西偏方
之前Jade為求懷孕，四處訪尋中西名醫，又試過好多偏方：「飲燉雞汁，又試過中藥、針灸、瞓熱石、飲豆漿，後來又聽人講飲紅棗水，之前中醫補得太緊要有心悸，要睇足一年西醫，之後老公唔畀食中藥，惟有改試其他方法，夜晚日日浸腳。知道有BB嗰剎那，真係開心到跳起，有少少唔能夠相信，但又唔敢太開心，因為又驚唔係真，直至照到BB，真㗎真㗎真㗎，好似發夢一樣！」採訪：皓騫
來源:
http://hk.apple.nextmedia.com/entertainment/art/20160204/19477952