|
||||||
2010-12-31 AD
|
||||||
倫敦大雪導致希思羅機場封閉之初,滯留機場之香港留英學生似乎得人同情,仲有評論員聲援,鬧吓呢樣,鬧吓嗰樣,但後來發覺社會人士對「包機之議」反感甚大,於是立即收聲,一場「茶杯裏的風波」,就此完畢,不過原來有少少後遺症噃。 留 學生T自澳洲回來放澳洲暑假,明年二月先至返去上學。佢讀書素來幾醒,在地區名校就讀,以為可以順利升上中大,點知馬有失蹄,人有失手,中學會考成績差少 少,學校唔肯收番佢讀中六,此乃名校習慣也,話知你在校五年,會考成績冇廿零分,就唔該你走投,唔好進入學校範圍。學生T並非有錢仔,但阿媽一於頂住,今 年一月送佢去澳洲讀大學預備班,呢,又俾佢一個翻身,考到澳洲著名大學,明年二月成為大學生嘞,主修商科會計,將來搵工有啲保證。學生T回港並非渡假,立 即周圍去搵散工,爭取兩個月工作經驗及零用錢,去到勞工處見一位女士,等咗一輪,位公僕望佢兩眼就話:「你地留學生噃,屋企有個錢,做嘢未必肯搏,你知唔 知做嘢好辛苦o架?」 學生T為之愕然,自己住居屋長大,何來屋企有個錢呀,阿爸阿媽都捱得幾辛苦嘅啫,但人地咁講,自己亦冇符,唯有返屋 企。阿媽知道後,同佢講:「唉吔,人地梗係誤會你係留英學生,在機場喊苦嗰種呀!」次日在酒樓碰到,學生T阿媽叫左丁山諗吓計幫學生T搵工,咁啱人力資源 經理C亦在,經理C話:「呢排好難搵人啫,有乜理由搵唔到短期散工呀?」
哦,望真吓學生T個樣,經理C與左丁山同聲話唔 掂。學生T得天獨厚,頭髮又濃又黑,加上學生T在澳洲幾個月唔飛髮,頭髮幾乎長到落膊頭,個賣相似足唔憂米好有性格嘅大學生,唔怪得俾公僕潤一句:「做嘢 好辛苦o架!」我地一齊叫學生T去剪短個髮,似番個精神爽利款,先至再去搵工,返到澳洲上課後,咪又再留髮囉。學生T聽到眼仔睩睩,未必服氣,不過現實世 界往往如此,九十後嘅第一課,就係學曉妥協,因為仲係啲六十後在公司機構話緊事噃。 |