📖 ZKIZ Archives

在電視劇《不懂撒嬌的女人》中的Mall姐十分強悍，經常黑口黑臉鬧下屬，控制慾超強，令人望而生畏。現實中，掌管五間餐廳的博美餐飲管理有限公司執行董事羅雪儀（Cherry）卻剛柔並施︰同事有錯，她會即時直接指出，「唔啱就係唔啱」；把事情交給同事負責時，則放手讓他們發揮。談吐斯文的Cherry直言這都是老闆兼爸爸羅傑承的教導，她六年前加入集團，在餐廳由低做起，侍應、印menu等工作，統統做過。原本是律師的妹妹羅欣儀（Gloria）亦在兩年前加入，性格開朗活潑，目前負責公關及市場推廣，「可能一星期諗一百條橋俾Cherry，佢只OK一條，所以我要不斷俾橋，有時都有挫敗感。」不過見到每次推出的產品大受歡迎，很多人在Facebook、Instagram拍照、打卡，她都有成功感。「快」、「新」二字經常掛在兩姊妹口邊，兩人拍住上，難免有時會擦出「火花」，但「知道大家底線，呢一刻嘈完之後，隔半小時就無事。」姊妹同心，其利斷金，她們更希望明年可將旗下品牌擴展至世界各地。

羅傑承長女Cherry自小愛飲飲食食，畢業於瑞士酒店管理學院，曾在日本、澳門等地的酒店實習，十分清楚自己想走的路。她打骰的博美餐飲旗下有五間餐廳，除了最為年輕人熟悉的K場RedMR外，還有大官廳、The Tonno、上海佬及來佬餐館。愛吃喝，有學歷，並不代表可以即時坐正。初初加入博美時，Cherry隱藏太子女的身份，由侍應開始做起，餐廳每個崗位做幾個月，了解當中運作︰「佢（羅傑承）成日同我講，如果你唔了解一間餐廳或公司運作係點樣，將來行的路會更加辛苦。」近年羅傑承看到Cherry的進步，做事有板有眼，於是放心將餐飲業務交給她打理。Cherry亦不敢怠慢，每天早上未到九時就返到公司，與各部門主管開會，討論日常營運事項，跟進最新情況。到午餐及晚餐時間，通常去巡餐廳，下午茶時間及晚飯後會去RedMR。她笑言︰「唔係『巡』佢哋，係『探』佢哋，有時會買嘢食上去鼓勵吓佢哋。」每個月業績達標的店鋪，該店員工亦會得到額外獎金。

曾日試四十道菜

愛吃的Cherry當然會烹調，但現在「食多過煮」：「坦白講，我性格比較急。試過一日試勻晒成個集團嘅嘢食，試咗三間餐廳、一間RedMR，每一間大約有十道菜，全部有食，有俾意見。」一日試四十道菜，完全看不出眼前瘦削的她如此「大食」！女士總愛美，所以她勤做運動如跑步、行山來keep fit。跟廚師溝通，推出新菜式亦是她的工作之一，旗下餐廳的廚師大多很年輕，而且一開業就合作至今，跟她甚有默契，十分了解她的要求。她不諱言，女性「入熱廚房」亦有優勢，「我始終係女性，行落去同佢哋傾偈，佢哋都會對我溫柔少少，係唔同嘅。」主打中菜的中環大官廳是集團最新的餐廳，開業兩年，Cherry解釋是希望每位顧客都有「大官」的感覺。她喜歡中菜，同時明白飲食業競爭激烈，除了食物質素要高，還須不時加入新元素，才吸引到回頭客。「金龍吐珠」就是大官廳的得意之作，是一個如人頭般大的炸煎堆，靈感來自月亮，「我哋傾，不如加燈泡，令佢發光，好似真月亮咁。上年父親節，我哋都試過喺上面加鬍鬚，效果幾好！」負責度橋的Gloria說得眉飛色舞，提到不少人為此拍照、打卡，她感到十分開心。

棄律師當公關

點子多多的Gloria在英國修讀法律，畢業後曾在律師樓工作。不過她希望趁自己年輕，嘗試不同事物，在家人的鼓勵下，回來打理家族生意，「爸爸當初覺得『行行出狀元』，你放棄咗律師，其實無咩大不了。一個廚師都可以做到米芝蓮，可能公關都有好好發展。」當中跌跌碰碰少不免，「 我可能一星期諗一百條橋俾Cherry，可能佢只OK一條，所以我要不斷俾橋，有時都有挫敗感，但OK。Marketing就係要不停俾人ban，才知道要什麼。」有時靈感女神收工後才到訪，Gloria都會在家中，敲Cherry房門，跟她討論新構思至入睡為止。雖然是兩姊妹，但傾公事難免會有「火花」，幸好大家由細玩到大，知道彼此底線，「這一刻嘈完之後，隔半小時後食lunch就無事。」Cherry亦慨嘆︰「成日都講點樣可以工作（生活）平衡，我覺得係無平衡，尤其是香港，好多時要快。」起初Gloria以為市場推廣很簡單，但發現要做到大家思想一致是需要時間。然而，團隊合作久了，現在由想法到執行，已可以快到僅需一個月時間。就如最近RedMR添置了可流動的DJ booth，讓客人可在房中打碟，由她提出到正式登場，只花兩星期。做事快狠準，皆因以前曾經太慢而被其他競爭對手「搶飲頭啖湯」。

嚴格老闆有趣慈父

在羅氏姊妹的帶領下，擁有四百名員工的博美餐飲每年都保持增長，去年亦增長百分之五。在香港站穩陣腳同時，明年她們計劃將品牌擴展至世界各地如歐洲。訪問期間，她們亦多次感激員工的努力，又形容營運餐廳就如踢足球，需要前鋒、中場、後衞及守門員互相補位和配合，「得一個人係搞唔掂。」得出此比喻，是受熱愛足球的爸爸薰陶，兩姊妹自小都愛睇波。在公司，她們都稱呼爸爸做「老闆」。Cherry說老闆非常嚴厲，開會時，他會直接講出一個人對或不對，「真係一針見血，可能一般人會接受唔到。」但後來Cherry明白到無論對或錯，都要立刻同人講，不要拖泥帶水；但授權同事處理某事項時，就放手不要干涉，「可以有個timeline，guide住佢，中間睇佢做成點。」在Gloria眼中，老闆辦事細心縝密，「我有時都會做好多活動，佢細緻到每一樣嘢，佢都知道幾多錢、喺邊度來。」這亦令她仔細留意每個細節，當被問到活動每個地方，她都可以給予意見或解答同事疑難。提到在家中的爸爸，兩姊妹都笑得合不攏嘴，不約而同讚他十分有趣，並疼愛她們，「成日會講笑，好開心！我哋會一齊玩，佢會同我哋啲朋友一齊玩，一齊唱歌，打成一片！佢會識我哋啲朋友，更有朋友結婚時，邀請佢去。」訪問當日距離父親節仍有數個星期，但她們已為亦父亦友的爸爸安排好慶祝活動，相當孝順。公司有精明能幹的女兒睇住，加上Cherry明年即將出嫁，相信羅傑承肯定喜上眉梢。

撰文：黃嘉慧攝影：葉漢華攝錄：廖健昌[email protected]