|
||||||
|
審計署批評一啲直資學校雖然設有獎助學金，供有需要嘅學生申請，但著名學校嘅撥款少於50%，或撥款不足，呢啲名校包括聖保羅男女中學及其附屬小學、聖保羅書院、男拔萃、聖士提反書院等等。 名 校設立獎助學金，當然唔係俾有錢子弟申請嘅，原意係學習美國著名私立大學哈佛、耶魯、普林斯頓等等採用嘅need-blind policy，即係收學生以成績為主，不理會學生之家庭財政能力，如果學生A獲取錄之後，無力繳交學費嘅，哈佛等就會俾足獎助學金，幫助學生A入學。美國 有一位著名政治人物當年申請耶魯，考到之後，佢嘅爸爸係紐約郵差，對個仔講：「我根本無力供你入耶魯，你自己做埋兼職，恐怕都唔夠錢。」耶魯知道後，就俾 佢獎學金至畢業為止。 美國風氣如此，香港又如何呢？據左丁山聽到一啲在職人士（在名校任職）隱約透露，入讀名氣大嘅直資學校嘅學生，大多非 富則貴，要申請獎助學金嘅學生，人數不多，故此獎助學金撥款不足，並不為奇，令人心酸者，就係一啲中產家庭學生（爸爸做經理級），實際上亦幾難負擔所有學 費、雜費、出外交流費（例如到日本，到澳洲）及做項目（project）嘅特別費用，一啲阿爸阿媽實在頂得辛苦，在職人士不忍，叫爸爸為兒子申請獎助學 金，但爸爸回答話：「唔得嘅，咁樣做就會令我個仔在同學面前冇晒面，令佢有自卑感，在同學面前認有窮爸爸，抬不起頭來！」呢類人士都唔肯申請獎助學金，故 此獎學金基金點會撥款足夠呀？ 俗語云，冇咁大個頭，唔好戴咁大頂帽，勉強為之，可能令兒女終身懷有陰影。左丁山知道一啲名校不時搞出外交 流，帶領學生到澳紐學習，學生就住在對口單位學校嘅學生家裏，所謂home stay。去之時，當然好玩，增廣見聞，但係澳紐學生回訪香港又如何？學校會問學生：「可否提供房間俾澳紐學生home stay？」唉吔，中產家庭何來額外房間俾澳紐學生住一兩個星期呀，認真難搞，唯有猛講鎖你。如此有來無往，你估學校會唔會次次揀呢個學生出外呢？學校都 要面對現實困難嘅。 |
||||||