操盤手札記：六絕定命不該絕？
1 :
GS(14)@2016-06-06 03:00:31中港股市5月食尾糊，喺憧憬A股入摩及深港通入閘下，資金大舉入場，A股前日飆升3.3%，港股借勢衝高0.9%，一度逼近21000關。踏入6月，照例有製造業PMI出爐，內地官方數據按月持平報50.1，財新數據則跌至49.2，與官方數據背馳，A股、港股昨日分別回吐0.1%及0.3%。6月猛料浪接浪，除了油組今日開會，歐洲央行今日議息、聯儲局6月中議息、MSCI本月中決定係咪納入A股，仲有英國6月下旬舉行脫歐公投，成個6月充滿不明朗因素，投資者以觀望為主。6月波動難免，有機會上試21600或下試5月低位19595，不過，無論係「六絕」抑或命不該絕，成交都唔會大，就算深港通拍板都係咁話，滬港通有辦你睇。滬深交易所上周五公佈停牌及復牌新例，為A股入魔掃雷。另外，全球最大對沖基金Bridgewater已於上海註冊投資公司，阿爺開綠燈，擺明係爭取MSCI機構大戶支持。據彭博數據，對沖基金合共持有MSCI新興市場ETF總值11%，Bridgewater係最大投資者，佔5.5%。深港通作為開放A股嘅一張王牌，阿爺唔會留住唔發。5月尾期權call成交活躍，可能係有春江鴨。市場一向憧憬深港通可帶旺估值較低嘅本港上市科網股，科網龍頭騰訊（700）即告連日破頂，不過，昨日已露疲態，回吐1.7%。股市向來唔止一個主題，板塊輪動唔會停，我近日心水係友邦保險（1299）。人民幣自舊年811滙改後持續貶值，內地人千方百計搬錢走避險，最普遍係來港買保單。雖然內地今年初起收緊境外投保嚴防走資，但香港保監處最新公佈，首季來自內地客嘅新造保單有132億元，按年增長94%，按季增長26%，佔整體比例34%。美國加息預期升溫，美元呈強，人民幣有加快貶值趨勢，南下投保勢頭有增無減，繼續成為友邦增長動力。此外，里昂揣測股神畢菲特將會入股友邦，該行認為，全球壽險股已結構成熟，符合畢菲特投資要求，而當中唯一之選係友邦。該股昨收45.6元，10天線升穿20天線，出現黃金交叉。
割柑人本欄逢周四刊出
來源:
http://hk.apple.nextmedia.com/financeestate/art/20160602/19637003