祥嫂爆仲有個揼骨妹凸腩兆尊 坐叮叮呵正印
1 :
GS(14)@2016-10-28 06:24:16【溫柔撥髮】■鄧兆尊前日陪正印女友Carmen搭叮叮，在車上溫柔輕撥女方秀髮。
【跑馬地】慈善伶王新馬師曾（鄧永祥）的長子鄧兆尊於94年加入娛樂圈，拍過多部劇集和電影，雖然事業發展不及亡父新馬師曾，但繼承了逾億身家的他，風流性格亦與父親一樣。
■兆尊於大前年被拍得與Carmen（左）及車厘子三人行。資料圖片
陪睇醫生
祥哥生前曾有四任老婆，包括梅麗芳、梁添添、賽珍珠和洪金梅，而兆尊身邊有兩位紅顏知己，分別是拍拖十多年的圈外女友Carmen及前助手車厘子，三人行如魚得水，前日兆尊更陪Carmen到養和醫院掛號，表現體貼。前日下午約4時許，兆尊陪同居多年的Carmen現身跑馬地，已逃離娛樂圈的他街坊打扮零星味，加上已屆49歲腩凸凸，女友Carmen則戴口罩，兆尊搭着女友膊頭，邊行邊扯煙的他，行到養和醫院外時，乖乖丟掉煙頭才入內。他們去到門診部坐在一角，Carmen先去登記，兆尊都有站起身陪女友。兆尊與Carmen並肩而行去電車總站搭叮叮，上車後兆尊陪女友傾偈解悶，又幫女友除口罩及撥秀髮，表現溫柔甜蜜，難怪多年來可以三人行。本報致電給兆尊，他說：「女朋友唔舒服，有啲皮膚敏感，所以陪佢睇醫生啫。」
【肚腩凸現】■現年49歲的兆尊凸腩加一身街坊裝示人。
祥嫂 資料圖片
女友多多
御女有術的兆尊，緋聞女友多籮籮，01年拍處境劇《皆大歡喜》與陳彥行和鍾嘉欣傳緋聞，女優歐陽海璇則自爆與兆尊曾有一段情。與Carmen拍拖多年的兆尊，又跟安德尊爆出「雙尊爭子」，爭奪當時安德尊的助手車厘子，最後兆尊不但成功奪愛，自此更與Carmen和車厘子三人行。而與他反目的母親洪金梅，去年更怒爆兆尊還收埋一個揼骨妹做女友，關係七國咁亂。採訪、攝影：梁繼光、羅德光
來源:
http://hk.apple.nextmedia.com/entertainment/art/20161028/19814159
靈堂講家事揭一拖三有苦衷祥嫂爆喊：唔好挖苦兆尊
1 :
GS(14)@2017-02-26 13:24:04■祥嫂（右）拎着枴杖，由黃夏蕙陪同下現身靈堂。
鄧兆尊早前接受本報專訪，承認與三女友Carmen、車厘子（Cherry）及Claire戀事，享齊人之福，其母「祥嫂」洪金梅一直未有表態，昨日她撐着枴杖現身紅磡世界殯儀館，由黃夏蕙陪同到資深藝人魯芬喪禮，更大鬧靈堂講家事。
■祥嫂講到兆尊高調公開三女友有苦衷時，激動爆喊。
■兆尊早前50歲生日，三名紅顏同慶祝。資料圖片
■魯芬BB的家人昨日在世界殯儀館為她設靈，喪禮以佛教儀式舉行。
「個仔人見人愛」
祥嫂接受傳媒訪問時，起初平靜講與魯芬相處的軼事。當記者問到兆尊的感情事，祥嫂即顯得激動緊張，更叫記者憐惜她：「我個仔3個紅顏知己係好事，我個仔人見人愛，亦都係新馬仔個仔，其次手上又有……4個、6個都仲應該，仲後生，你哋唔好挖苦佢，要求你哋畀一分鐘友誼畀祥哥，好掛住佢哋，唔好纏擾我仔，令我個仔煩惱，佢唔習慣煩惱，煩我唔緊要。」
「唔好污辱伶王」
之後，祥嫂越講越激動，爆喊流涕講反話：「佢有苦衷，一拖一、一拖三，佢想入返嚟娛樂圈，兆尊，男仔睇到覺得你晒命，同澳門華哥比，天同地比，呢個係身體健康象徵，你有本事唔好俾女人囉囉嗦嗦，幾多個媽咪都支持你，最緊要應付得，唔好俾兄弟姊妹笑你。」祥嫂自言72歲不復當年，依然滔滔不絕，更反指自己錯，仔女唔曳，冇爭過家產：「生命好脆弱，唔好為我難過，我有勇氣講出嚟，唔敢講19年，由祥哥爭產唔敢講，我要顧全大局，終歸新馬仔家人，祥哥教我人過留名，唔好污辱伶王美譽。」祥嫂說畢喊住入靈堂，逗留了1小時後平復離開，而本報曾聯絡兆尊，於截稿時未有回覆。採訪：張俊銘攝影：仇志德
來源:
http://hk.apple.nextmedia.com/entertainment/art/20170226/19940306