洗米嫂放全家福宣示主權老爺比like笑晒
1 :
GS(14)@2016-09-28 05:04:27Mandy Lieu同洗米嫂（陳慧玲）嘅「搶米戰」歷時年幾，至今未分勝負。一直想享齊人福嘅周焯華（洗米華），呢頭同完「唯一」周太陳慧玲合體，轉過頭又會做空中飛人，飛去英國陪Mandy Lieu，真係好鬼忙！前日洗米華同洗米嫂又一齊出席活動，同行仲帶咗1歲多嘅「小米女」周善潼（Damiana）到場。洗米華同洗米嫂企埋一齊剪綵，最初洗米嫂都冇乜笑容，當洗米華主動開口撩傾偈，先笑兩吓，氣氛都有啲啲尷尬。其實二人傳出離婚後，洗米嫂對洗米華嘅殷勤態度，一直唔多領情，只係洗米華一直唔肯離婚，所以一直拖住。不過今日洗米嫂喺ig，罕有貼咗兩張自己同洗米華，唔知喺前日活動前定活動後影嘅大合照，相中仲有洗米華爸爸同大仔周柏豪。睇番洗米華同洗米嫂，相中兩個笑容都好燦爛，其中一張相，抱住「小米女」嘅洗米華，仲同洗米嫂貼實企埋一齊。「一家三口」終於企定定影合照。洗米嫂ig忽然放閃主動出擊，唔知遲兩日，又會唔會輪到進擊之Mandy發功呢？
來源:
http://hk.apple.nextmedia.com/entertainment/art/20160928/19783862