日本對於新科技的反應很快，《Pokémon GO》在AR（擴增實境）率先跑出，VR（虛擬實境）AV產業亦發展得如火如荼。至於香港人，亦對新科技觸覺敏銳，打機、AV這些當然不是上進的年輕人發展目標。香港地，最賺錢當然是做地產，今年四月藍穎桐Priscilla聯同幾個朋友，投身地產行業推出room3，將樓盤化為VR短片，讓睇樓客足不出戶便可3D睇樓。意外的是生意與地產息息相關，但Priscilla竟然對地產一無所知。紀惠集團CEO湯文亮了解過這門生意亦覺難做，「香港地產行業很古老，不接受新事物。」 Google主辦的GoogleEYE年輕創業家計劃，有近二百五十個團隊參加，今月初公布了入圍的十五個隊伍，room3是其中之一。評審之一的Matthew說入圍原因是他們的方案是有空間在市場上發展，cardboard有花心思做，產品質量好。只要登記填上地址，room3便會免費送上cardboard，將手機放進紙盒中，播放room3短片，便能3D睇樓，用家亦可不用cardboard，選擇在手機上玩360度睇樓。room3將十四部Go Pro集合，分別向着七個方位，以達到720度全方位，為做到立體效果，每個方位須用上兩部Go Pro。拍攝後以程式將各部相機的畫面連上，後期再以人手調校。目前拍了一個西貢豪宅盤。Priscilla雄心壯志希望能夠與香港、海外發展商合作，「目前與一個發展商傾緊，海外都有。」這門生意牽涉發展商、地產經紀、香港整體樓市，不過Priscilla原來通通不懂，「發展商我講到新世界、新鴻基、信和、合和，老細係邊個我都唔太清楚。」她解釋不會直接與誠哥、四叔等見面，不懂也沒關係。記者再問今年有哪個新盤開賣，未來還有多少樓盤推出，會直接影響生意喎。她面有難色說：「我都唔熟。」未來可能要與中原等地產商合作，識得施永青嗎？「嘩，你真是考起我，施永青我唔識呀。我識做好個產品就得啦。」向地產商收費問題，可以參考他們付出多少錢賣廣告及分佣給經紀，她又知不知呢？「電視、報紙、地鐵站都有落廣告。經紀我相信都應該不會很低，應該有百分之十。」這條答得有自信，不過地產商一般只會給經紀「三隻佣」。她解釋目前只需做好影片，找到發展商合作便可，至於地產的知識、樓市的狀況，並非必要。 用家試玩咁傻？ 做豪宅盤的中原經紀蔡先生試用過cardboard，他覺得對他有用，「感覺好真實，如果客人唔得閒，尤其豪宅客，多數係老闆，時間好矜貴。我可以拎手機連個Box去佢公司，足不出戶可以睇晒成個單位，我估客人會好滿意。」但並非所有經紀都合用，而睇細價樓的客人，多數投資經驗較少，一定要親自睇樓。讚過一番後，他試以普通360度短片模式再看一次剛才的單位，他改口說，其實360已經足夠，他解釋有些客人會顧及形象，「個頭岳嚟岳去，會俾人當小丑。」一般市民又點睇呢？睇樓經驗豐富的羅小姐，剛在美孚新邨睇完樓，她拿起cardboard試用，將頭左轉轉、右轉轉，笑說：「我要成個人郁呀？咁傻要自己郁？都幾得意，不過我有啲頭暈啦。」除了形象問題，羅小姐說自己很易頭暈，所以對3D很抗拒，反而 360度對她來說更好。若將來經紀以這個app向她介紹樓盤，她覺得幾方便，「睇樓好辛苦o架，通常單位都丟吉，大熱天時無冷氣，又要走上走落。」而且她說眼罩輕，對經紀與客人都方便，不過最終下決定前還是要看現樓，「影出來幾爛嘅樓，經過相機都好靚，始終要去睇實際環境，而且呢度無影埋景觀。」 專家判決香港地產守舊 紀惠集團行政總裁湯文亮，打理數百億物業資產，對香港地產業瞭如指掌，不過對這個新科技就坦言不太熟悉，「叫我個仔嚟佢可能會熟悉啲，我哋做投資者，最重要是對單位有感覺，你要到現場先會知鍾唔鍾意，呢個可以初步吸引你，但利用這個工具做決定呢，我估暫時未做到。」湯文亮亦說這個新科技暫時局限一手樓市場，「因為相同的單位數量多，二手樓每間都獨立，比較難做。」湯文亮雖然覺得room3新奇，惟對它在香港普及就不太樂觀。「兩個字，入局。當有第一個地產商用，其他就會唔執輸跟住用。」但他認為第一步最難行，要地產商接受新科技談何容易，「今日我未了解清楚，但我會盡量用我方法了解，但地產商點都會先抗拒。」香港地產行業很守舊，湯文亮說他們不接受新事物，「使錢請世界小姐嚟剪綵佢哋捨得，請風水師講嘢捨得，你要佢用在科技上就唔捨得。」 他提醒就算有第一間發展商用，亦不代表生意會陸續有來，「碰啱呢個盤賣得好，佢哋會話不知道是樓盤本身條件好，還是你的產品有效。但如果碰上樓盤賣得唔好，地產商就會怪你的產品沒有用，幫唔到手。」香港樓市前景正正不太樂觀，湯文亮不願令一班青年人創業夢碎，安慰說：「現在市道不太好，從另一面睇，市道差難賣樓，發展商才會考慮一些新科技。」湯文亮亦點了一條明路給他們：背靠祖國。「你話可以慳時間，但香港有幾大呢？國內不同，又要搭飛機，又要坐高鐵、又要過關，很麻煩。國內的地產商好似萬科，嚟香港起樓你估俾香港人住？佢係賣俾大陸人。你做好段片，佢哋唔使嚟香港睇。」 撰文：孫樂祈攝影：葉漢華、廖健昌攝錄：廖健昌[email protected] | ||||